الزول البسيط

أنا الزول البسيط
هل بتعرف يا رئيسنا
كيف يعيش زولاً بسيط
البيت مهدم
والشبابيك ..
بالحبال مربوطة تربيط
لا ملابس فيهو
لا صابون غسيل ?
والحذاء واحد تلبسو الأم والبنات
والغرفة واحدة ..
ما فيها تبليط
أنا الزول البسيط
جسمي منهك
والتعب هداني
من كثر ما فكرت في الدنيا العريضة
وانت يا سيدنا بتعلن
كل يوم عن ألف تخطيط
والبلد ما فيهو تخطيط
أنا الزول البسيط
أصبحت عايش
في الهموم ..
والفلل من حولي تكثر
والعماير ..
والرئيس أصبح مشير
والشعب كله جندي بي واحد شريط
أصلي ما الزول البسيط
انتو هديتوه
من عشرين وأكثر ..
بعدما كان المعلم
أصبح الولد العبيط
إيه يا الرجل البسيط
كيف بتنهض
بعد ما الست الجليلة
الاسمها الانقاذ ..
قطعت بصلك
وسوت منك يا حلو شوربة قرنبيط
إيه يا الرجل البسيط
قاعد تكبس في الظلام
لا موية .. لا نور
والجميع حولك بخبط ألف تخبيط
فوضى عمّت
وانت حلمك
بـي عصا موسى
التفك سحر الرئيس
والبلد وا أسفا عليهو.. كلنا
فرطنا فيه الليلة تفريط

[email][email protected][/email]