(الخواجات) يحسدونني لذا قاموا بتلفيق تهمة ضدي..أبو سن : جهات تسعى لاغتيال شخصيتي وهدم ما بنيته لأكثر من 30 عاما من العمل المتواصل،

الخواجات حاسدينك و السودانيين برضو و كمان الخليجيين حاسدينك انت قايل نفسك اسامة بن لادن

مع التحية و التقدير للنطاس البارع (كمال أبو سن) . لكن بصراحة كدا إنتقال البرنس هيثم مصطفى كرار (حفظه الله و رعاه) من الهلال إلى المريخ حارقاك أكتر من إيقافك عن العمل يا هلالابى .

البلد دى كلها حقد وحسد ولو ما عملت حسابك بكرة بلحقوك دكتور عمر خالد لما لفقوا ليهو قصة القعدة والنسوان والسكر

كتلوا مشروع الجيرة وكتلوا السكة الحديد وكتلوا الخطوط الجوية والبحرية كتلوا الجامعات والمستشفيات كتلوا كتلوا كتلواااااااااااا-ثم اخيرا جاء كتل دور ابوسن الانسان والدكتور البارع-البلد دى بتقتل كل جميل

((وشبه حالة إيقافه عن العمل بشطب هيثم مصطفى من الهلال وانتقاله للند التاريخي المريخ، الذي لم يحرمه من ممارسة موهبته وتمريراته القاتلة مع فريقه الجديد، قائلاً إن الطب موهبة ويمكن ممارستها في أي دولة، ورأى أن من السهل اغتيال الشخصية لكن من الصعب قتل الحقيقة)).

والله يا دكتور ابو سن بقيت تقول كلام خارم بارم، كونك تشبه- ايقافك عن العمل و انت المؤتمن على صحة و عافية الناس و خطأك إن حدث ثمنه موت – بشطب هيثم مصطفى الذي رأى المسؤولون عن ناديه السابق عدم جدواه و فائدته للفريق.
لكن الحنك بتاع الخواجات حاسدنك دي ما مبلوع كلو كلو ، لأننا كلنا عارفين بريطانيا دي بتموت في الكفاءات و بالذات الطبية و ممكن يقدموا كل الإغرءات عشان الطبيب الشاطر يشتغل عندهم.
لكن كونهم اوقفوك عن العمل و هنا أيضا تم ايقافك فلابد أن في الأمر إن.
و لو مظلوم فعلا دافع عن نفسك بالحقائق الدامغة و بلاش لغة الاستعطاف و الدموع دي.
بالنسبة للبي بي سي ، ابناء الفقراء و الغبش ما اظن يقدروا يساعدوك عشان تشتكي القناة و هم ما لاقين حق صحن الفول.

صدقوني يا جماعه ابو سن ده دكتور محترم عالمي – كل ما لحق به لحماية الاخطبوط مامون حميده

فهم يعلمون ان مامون حميده كادر من كوادر المؤتمر الوطني و ممول للكثير من برامجهم و لحمايته قاموا بقذف التهمة في الطبيب الحلقة الاضعف

يا جماعه القضية دي وراها المؤتمرجيه لا تنجرفوا وراءهم
وصدقوني ابو سن ممكن يذهب لاي مكان و يعمل بنجاح و الابواب مفتوحة له
لا تكونوا عاطفيين

مامون حميده هو المسؤول عن تردي الوضع الصحي في البلاد فهو رجل لا يهمه الا المال

اتقوا الله في الدكتور ابو سن و اقفوا معه كما وقف مع الضعفاء و المساكين

وحاربوا امثال مامون حميده الاخطبوط السام

والله انت فخر للسودان والغلابة وربنا يحفظك ويكثر من امثالك واولاد الغلابة اصلهم نجبا لانهم ياتون من رحم المعاناة والتعب ولكن الاعمار بيد الله الطبيب بيبذل الجهد من اجل علاج المريض وانقاذه ولا يسأل عن النتيجة طال ما بذل الجهد والعناية العالية ولم يكن هنالك اهمال

أبو سن نشهد لك انك طبيب انسان ورجل ضكر مزارع بن مزارع كم انقذت من الفقراء والمعدمين واجريت لهم عمليات بالمجان لكن السياسة دخلت في الطب فابشر فالله لا يضيع اجرك وإنه أكيد ناصرك

والله يا دكتور الناس كانت تتعاطف معك ولكن تمثيل قضيتك بهيثم مصطفى تجعل كل جماهير الهلال تتراجع عنك وكذلك ثلثي جماهير المريخ المعارضة لتسجيل هيثم لأنه باع قيم ومثل وعقيدة فهل أنت مثله رغم الفارق الكبير بين الطب والكورة

لك ان تقول ما شئت بس لنا الحق في تصديقه او تكذيبه

لا تنكروا فضل الراجل ودا افضل من مليون اسامة بن لادن دا بيسعى لانقاذ حياة الناس وداك اصبح طاحونة موت لا تتوقف خلونا من السياسة وانصفوا ولو على انفسكم يا ملاحدة

((((((((((((( يا دكتور ,, زودتها حبتين , وفي حديثك الأخير ظهرت عليه شوية (هترشة) :
(1)”الدكاترة في انجلترا لمن تغلبهم أي عملية بينادوا أبو سن”
(2)وحول ايقافه عن العمل بإنجلترا قال إن (الخواجات) يحسدونه لذا قاموا بتلفيق تهمة ضده، وأكد اعتزامه مقاضاة قناة البي بي سي التي قامت بنشر حلقة كاملة ضده، لكنه أوضح أنه لا يمتلك المال الكافي لمقاضاتها وطالب المواطنين وخاصة أبناء الفقراء والمحامين بتجميع (شيرنق)

يا ابسن لو ما مشت معاك في الطب… افتح محل عطارة وبيع الصمغ لمعالجة الكلى بدل تبشتن خلق الله زي كدا

اسمح لي أقول لك :ضيعت نفسك ( بسطحيتك )

إنسان وصل مكانك يرجع يعمل مع الأفراد؟!( النيمة ولا …)

العاطفة الزايدة سبب دمار السودانيين والسودان عامة.

والله والله ثم والله ياالسنجك انت محسود بس بصراحه انا تابعت البرنامج علي قناة الخرطوم وحقيقا انسان واثقة من نفسوجدا عندما سألته مذيعة البرنامج كيف تخرج من هذة المنحه قال(انا جراح وانجرحت بهذا القرارولكن اعرف تمام كيف يلتئم الجرح لاننى لى عقل قوى جدا)صاح ان الموت حق ونساله الله ان يتغمد الحاجة الزينه بواسع رحمته لكن كم مره انقذت مريض ومريضة والدليل ذلك اجراء400عملية بانجلتراواجراء259عملية بالسودان.

يتحمل المسئوليه في اي عمليه عملها وكانت غير ناجاحه هو فاكر ان حياة الناس رخيصه ..السودان انجب الالف الدكاتره …

شاهدت جزء كبير من المقابلة التي اجرتها قناة الخرطوم مع الدكتور ابوسن
يا جماعة الخير الاخطاء الطبية تحصل في كل مكان .. ومستشفيات السودان كما ذكر دكتور ليس بها امكانيات والسودان بلد وسخان والبئة ملوثه .. فوق دا كلو الدكتور بيجتهد وبيعمل . انا الشخص الضعيف .. لدي راي .. كل من يحاول ان يروج نفسه عبر الاعلام والفضائيات السودانية مصيره البهدلة ,,, والامثلة كثيره
يا دكتور ابوسن اعمل بصمت وساعد الغلابه وربنا يعينك ان كنت صادق في نواياك
قتل المواهب في بلادي .. مهنه محترفوها بالمرصاد لكل من يظهر علي الملا

يا ناس الراكوبة بالله كفاية مواضيع عن اب سن، فالرجل لم يصدق ان
الزينة قد قامت ببتعريته تمامآ فرفقآ به. بالله ركزوا على مامون حميدة.
اكرر ركزوا على رأس الحية.

الله يحفظك
وكفى ليك الناس البيدعوا ليك بالخير
في كل ساعة

يا بلسم جراحاتهم

والله ينصرك ويقويك يا دكتور

نحن نريد سرد الحقائق المجردة عما حدث للحاجة الزينة رحمة الله عليها ..ولسنا بحاجة الي دموع التماسيح يا د/ ابوسن ..الاعتراف بالخطأ فضيلة وتحمل النتائج هي شيمة الشجعان ..اما هذا الإنكار والصاق التهم جزافا لن تفيد ابوسن في شئ بل بالعكس ستعريه اكثر واكثر و سيفقد ما تبقي له من تعاطف ودعم من بعض شعب السودان الفضل …الحكومة تكذب وتنكر ..واعلامنا يكذب وينكر ..وساستنا واطباؤنا يكذبون وينكرون …..ماهذا البلد الملئ بالافاكين والكذابين …بلد ما عندها سيد

دي تمثيلية واستدرار للعواطف اين كان حبك للشعب عندما كنت تقف مع مصاص الدماء مامون حميدة في خدنق واحد ؟؟ بالله عليك كم الراتب الذي تتقاضاه من الزيتونة وحدها هذا غير ما تدره عليك العيادة من اموال من عرق ودم الغلابة بسبب تدمير المستشفيات العامة لصالح طفيلية المؤتمر اللاوطني امثال وزيرك مامون حميضة ؟!!
لا تستعطف الناس وتب الي خالقك واعلن انك كنت مصاصا اخر لدماء السودانين .. لا يمكن ان يجمع السودانين والانجليز علي سوء عملياتك وخطورتها علي الانسان وانت برئ ربما اصابك الغرور او اللهاث خلف جباية العمليات من مستشفى لاخر فكنت في عجلة من امرك

تقاضي القناة او لا تقاضيها لا يهمنا نحن ابناء الشعب بل يهمنا ان انسانة ظلت تعاني رغم صراخها وصراخ ابنائها لدرجة ان تصورو الي جوار لوحة وانت ووزيرك حميضة لم يحرك فيكم جفن واحد !!

لماذا لم تعقد هذا المؤتمر اثناء معاناة الوالدة الزينة لتاتي اليوم وتحكي قصة حياتك ؟!!

عين المرة فيها الشره وعين الحسود فيها عود قال شيرنق نصاب أفندي

لا يوجد طب بدون اخطاء الكمال لله ولكن الاهمال ماحبابو

يحلنا الحلا بله

ما قلت ليكم الزول ده بكرهم يوما وقفوهو فيه

صحيح الاختشوا ماتوا

مع احترامنا الشديد لدكتور ابو سن كطبيب متميز كافح ليدرس و يتخصص في جراحة الكلي و قام بالكثير .. الا ان حديثه و جقلبته الآن بدأ فيها كثير من النرجسية و الاستعراض .. و مجرد احساس البني آدم بان كل الناس يحسدونه و يلفقون له القضايا ليس في السودان فحسب بل حتى الخواجات، فعليه ان يتحسس دومته … الاخطاء الطبية تحصل و يتم التحقيق فيها و تحديد المسؤولية كجزء من اخلاقيات المهنة و للحفاظ على سلامة المرضى و تفادي حدوث الاخطاء …
على الدكتور ابو سن ان يصمت و ينتظر نتائج التحقيق ان كان هنالك تحقيق و تقديم دفوعاته العلمية لتبرئة اسمه…. الظاهر انه ينوي الاستثمار في الطب في السودان و مثل هذه القضايا تخرب عليه لذلك كثرت التصريحات و المؤتمرات الصحفية و الجقلبة، علما بان تلك الجقلبة تفتح عليه مزيدا من النيران

يااجماعة لازم نكون واقعيييين كلام ابوسن كل هترشة وخالي من المنطق ومتناقض واخطاءه كتيرة ليس الزينه فقط لكن فيما فعله مامون حميدة في الشعب السوداني توجب الشنق حتي الموت باع كل المتشفيات التي يملكها الشعب السوداني لنفسه وحرم المواطن الغلبان من العلاج وبعد دا كلو توجهوا سهامكم لابوسن تترك الذئب كل صباح جديد سارق ليه نعجة اقصد بايع ليهو متشفي ويلقي بالمرضي الي خارج المتشفي … بعدين ابوسن لو اوقفوه في انجلترا اودبي حاجة تخصو هو شخص فقد وظيفته بسبب اخطاءه لكن مادخل الموطن الغلبان هل نسي ان ثلث الشعب السوداني نزلو صالح عام عند مجيئ الانقاذ … مامون حميده استخدم دكتور ابوسن كبش فداءحتي يلهي الشعب بما فعله وسيفعله…وجهوا سهامكم اولا لمامون حميدة

قال شنو قال يعملوا شيرين عشان يرفعوا ليهو قضية ضد القناة والله الشيرين دايرنوا الناس القديت جيوبن انت بتمل العملية بي 50000 جنية عندك مليارات من جيب اهل المرضي تقول شيرين ارفع القضية ولو كسبتها نحن نلم الشيرين ؟؟!!!

اعذار اقبح من الذنب يادكتور وكلام فارغ وعامل ليهو مؤتمر صحفي لتحسين الصوره بتقول المجلس لفق تهم واكاذيب ضدك طيب الراي العام وحاله خاله الزينه رحمها الله وادخلها فسيح جناته تلفيق وافتراء فعلا اذا لم تستحي افعل ماشئت وبعدين تشبه حالتك بالايقاف بحاله شطب هيثم يعني مالقيت غير العذر ده يعني قمه الامتعاض والامبالاه في ان واحد وذيت الطين بله كمان تشبيه بليغ يادكتور وبعدين دموعك دي وفرا لركعتين في جوف الليل اللاخير تناجي الله ان يغفر لك وفي راي مؤتمرك الصحفي اساء اليك اكتر مما تتوقع

أصبر ولاتيأس وكلامك يوزن بالذهب والله لوكانوا يعقلون ويفقهون (“اشعر بالفخر والاعتزاز عندما انقذ حياة مواطن سوداني فقير من الموت”. ودمعتك دمعة أولاد البلد الطيبين لايقدرها حق قدرها هؤلاء الحاقدين ويعتبرونها ضعفاً منك وهزيمة لك يفرحون بها ويهنئون بعضهم بعضاً. لاتضعف أمام هؤلاء وكان الله في عونك وعون البلد التي أصبحت مخطوفة ومنكوبة من شرذمة فاسدة من بعض الإعلاميين الذين عملواويعملون لجعل بعضاً من شبابنا يصفقون ويمجدون الأرازل ويصفرون لصد الناجحين .

والله الخواجات ديل أتاريهم حاسدين … جنس حسادة!!! يا راجل ماتخلى الجرسة دى وتعمل ليك مزرعة قطع فيها الفجل و البصل و الويكة وعيش فيها باقى ايامك

وذرف أبوسن الدموع في المؤتمر الصحفي الذي عقده بالخرطوم أمس الاول ، أثناء سرده لمعاناته

تعليق: ارجو ان لا تكون بتاعة التماسيح

ابوسن بطل كفاية انو تخرج فى جامعة الخرطوم ايام الزمن الجميل وكمان طب . وراجل ممتاز فى الطب لكن حسدوك يازول ادوك عين . عشان كده الكورة صرجت فى قونك . معليش مايهمك الله بينصرك ولانامت اعين الجبناء (وكل نفس ذائقة الموت ) والشهرة لها ثمن .

They should stop him from practice until complete the investigation

أبحث عن عمل خريج زراعة جامعة نيالا

ابو سن بطل دخل جامعة الخرطوم وكمان تخرج فى كلية الطب ايام الزمن الجميل والجميلة ومستحيلة مش ايام الحرامية والطب بتاع القروش والجامعات العشوائية . لكن معليش نحن لانستطيع تقيميك لانك اذكي مننا بس انا اقول الكرة صرجت منك . الله ينصرك

يعني كلامك دا عجيب شديد انا عندي بعض التقاط المهمه لتضع النقاط علي الحروف
1/في بريطانيا حاكمك القضاء البريطاني واتحداك انك تقول هو ما عادل وانت بتقول انك داير تتقاضي البي بي سي في ذات القضاء.
2/المجلس الطبي البريطاني انصفك ونظر الي تاريخك المشرف وما اتخد ضدك اي اجراء .وهذا اعتراف صريح منه بتاريخك وقالوها عديل كدا.لاكن القضاء ينظر في القضيه المقدمه امامه ولا ينظر الي تاريخك وهذا قمه في العدل.يعني اضرب مثال بسيط لو انت بتسوق عربيه وليك 30 سنه سايق بدون اي مخالفه لو في يوم اتهورت وسوقت عربيتك بي استهتار وضربت زول ومات او اتعوق داير القاضي يقول انك ليك تاريخ مشرف شديد وما ينصف الضحيه,ممكن ما يسحب الرخصه وتتحاكم عادي.يعني ببساطه كدا الناس ديل انصفوك شديد.
3/ اتحداك انك تحاكم البي بي سي لان كل ماورد صحيح وانت لو كان عندك حق كان حاكمتهم من ٢٠٠٨ مش هسه.
4/الحاجه الزينه اتوفت في الزيتونه ما في احمد قاسم يعني انت عملت ليك بعض العمليات للفقراء والمساكين علشان تشتهر وتعمل اسم والناس تقول د. او سن وووووو…..
عيب تقول كلام ذي دا يعني انت بتمن علي الناس دي ولا شنو.الناس لو فعلنا عندها تقدير لي شخصك لكانت من خلفك واستماتت في الدفاع عنك.وانت شفت كيف وقف السودان والسودان الجنوبي مع المرحوم الحوت.وانا بعد وفات الحوت سمعت وقرات العديد من القصص عن هذا الرجل الذي كانت يده ممدوده للفقراء والمساكين ولم يتحدث عن ذلك البته ولم يطالبهم يوما بالوقوف معه في محنته عندما سجن .
5/بريطانيا تعج بالاطباء من كل دول العالم وخبرات و بروفسرات وبحث علمي وتطوير واكتشافات وبحوث متطوره يعني انت في بريطانيا نقطه في محيط,خصوصا وانت جراح وبتنقل كلي ود يعني ما عادت حاجه كدا صعبه ودايره رجل المستحيل.
6.كذا هم الطباء في بلادي غرور تكبر وعجرفه في الفاضي

واللة الدكتور ابو سن عمل عملية لاحد افراد عائلتي وكانت عملية ناجحة وان الذين يتكلمون عنة بهذة الطريقة هم حاسدين ياشعب ياسوداني من المفروض علينا الوقوف مع هذا الدكتور الطيب

ياأخوانا والله أنا راكب قطار في السعوديه ومسافر من الرياض الى المنطقه الشرقيه قابلني واحد سعودي والله العظيم مابعرفوا ولا شفتو قبل كده جاء قعد جنبي في القطار وقال لي ياأخي أنا بعز السودانيين شديد لأنو عندكم دكتور إسمو كمال أبوسن قبل سنتين عمل لى بتي عملية نقل كليه وكانت تعبانه شديد لكن الحمدلله هسه بحاله ممتازه .. بالله ألآ يحق لنا أن نفتخر بهذا الرجل بدل من السويناها فيهو دي ، صدقوني ده لوكان مصري كان طبلوا ليهو تمام … لكن للأسف الشديد السودانيين تغيرت طباعهم خالص والله يرحم أبهاتنا وأجدادنا للأسف نحن ماأخدنا منهم أي شئ .

سير و عين الله ترعاك يادكتور اصلوا طبع الناس الحاسدين تحطيم الناجحين و الله العظيم نحن نفتخرك بك كدكتور سوداني ملئت شهرتك العام و عسى ان تكرهوا شيئاً هو خيراً لكم ان شاء الله يادكتور هذه الهجمة تكون خيراً لك و تزيد من شهرتك و ربنا ويفقك وسير دون ان تكترس لهؤلاء

يا دكتور ياأخى بغض النظر عن إنك مخطئ ام لا الترحم على الأموات متى ما ذكرت سيرتهم واجب أخلاقى وأراك تترفع عن هذا.

ثقافتنا البلهاء كسودانيين ننظر للمهندس والدكتور بأنهم وصلوا لدرجة الكمال فى المعرفه والفهم فى كل نواحى الحياة كما قال المدعو سامى بكل عبط (لانستطيع تقيميك لانك اذكي مننا) ولم ينتبه المدعو سامى حينما وصف الدكتور بالذكاء بأن هذا فى حد ذاته تقييم ولكن نقول شنو ناس بتربرب دون ان تعى .

لحد الآن ماقادرين نفهم ونستوعب بأن هذا المهندس او الدكتور إذا تعطلت سيارته تعطلت حياته ما لم يذهب للميكانيكى الذى لم يفك الخط والأمثله لاتحصى لأنه ببساطه الحياة كده.
مرارتى إنفقعت

يا ابو سن حفظك الله وعظم اجرك ,,, مشكلتك انك لم تكن مؤتمر وطني ,,, فعليك بالخروج من البلاد التي رفضتك ,, كما رفض الهلال هيثم مصطفي واستقبله المريخ بكل ترحاب وحفاوة ,, فعليك الخروج لكي يستفيد منك المسلمين خارج السودان ,,

هؤلاء يريدون أن يدمروك كما دمروا الذين من قبلك ,,, الناس في انتظارك للاستفادة من خبراتك في هذا المجال النادر ,,

يا جماعة الحكاية دى فيها شئ ناقص , شئ مامعروف للناس العامة , ولا أحد من المجلس الطبى أو مستشفى الزيتونة ومالكها حميدة أو أبو سن نفسه يريد ان يضع كل الاوراق على الطاولة . كلهم أعطونا أنصاف الحقائق وليس كل الحقيقة و داسين النص التانى لسبب غير معروف للعامة . لذلك نزلت أغلب تعليقات الناس بالهجوم على ابو سن فقط و تركو باقى الاطراف التانية ,

و للامانة فقد ساهم د. ابو سن بالهجوم عليه بكلامه المغرور عن “الخواجات حاسدنى” و “الدكاترة في انجلترا لمن تغلبهم أي عملية بينادوا أبو سن” و غيرها من الخطرفات .
يجب علينا كمعلقين ان نكون منصفين فى حُكمنا على ماحدث , وهذا غير موجود الآن بسبب عدم إكتمال كل الصورة و نقص المعلومات .

المعروف ان المجلس الطبى و ناسه كلهم مؤتمر وطنى و مالك الزيتونة مامون حميدة برضو مؤتمر وطنى و الإثنين فاسدين فى مؤسسات فاسدة وليس ببعيدى أنهم يكذبون فى حق د ابو سن , فأرجو ان لا ينجر القراء للهجوم على د. أبو سن فقط ويتركون البقية والمعلقين لا يعلمون بكل التفاصيل . كما نرجو من د. أبو سن الإنضباط و التواضع و ان يخبرنا بالحقيقة الكاملة لأنه فى شئ مدسوس و ناقص حتى يتم إنصاف الجميع و خروج الحقائق للعلن .

و بأمانة أنا ايضاً فى البداية الاولى لظهور الخبر كنت قد شنيت هجوماً قاسياً على د ابو سن وعلى تقصيره الذى ادى لوفاة مرضاه (لهم الرحمة والمغفرة) .. ولكن و بمرور الايام ومن خلال المتابعة الاعلامية شعرت بأن هناك شئ غير مكتمل و معلومات ناقصة خرجت للناس وخاصة كتابات صحف النظام الصفراء وتعليقاتها من جانب واحد من صحفيى الغفلة و جدت بأن وراء الامر إن ..

ما بقي من عقلي يكاد يطير و انا اري حكومة تلزم الصمت تجاه اهمال طبي لمريضة تتعافي بمستشفي احد وزرائها الي ان لاقت ربها عليها الرحمة .. و ليس لدينا سوي رمي التقصير علي بعضنا سوي من جانب طبيب موقوف و مسافر بعد اجراء العملية او مالك مستشفي يزايد بتشكيل نيابة للاخطاء الطبية و هو لا يزال باق علي سدة الحكم !!!!!!! و لندع القضاء يدلي بدلوه ( بعيدآعن الوزير ) مع وجود شبهة الجشع واللاانسانية من جانب الوزير و ازدرائه لابناء المريضة بان يتصرفوا.. الي جانب تقصير الجهات المعنية بالسماح لطبيب موقوف باجراءعمليات مهما كان وزنه .( ولا تزكوا أنفسكم هو أعلم بمن اتقي ) .. صدق الله العظيم

السلام عليكم.والله اخر زمن انا لا اعرف ابو سن لكن كنت متخيلة ان تقفل الا ززززززززززززززززززززيتوووووووووووووووونا وليس ابو سن (حمي البروفسير الوزير نفسه وضحي بابو سن)مش كده وبس والله اخر زمن.يا وزير انت تعرف جيدا ان الا مر تمريض اكثر وليس اخطا اطباء,مش كده وبس لا تخططط لموتمر لمناقشة اخطاء الا طباء في السعى لاعادة الثقه للزيتونة يا بروف نحن تلاميذك ونعرف مدى مكرك و دهاك اما كان من الاجدي والا فيد ان يكون المؤتمر لماقشة اخلاقيات المهنه

نكرر نصيحتنا للدكتور اعتزال المهنة كان واجب وأفتكر رغم الصور المنشورة تكون فى عمر التقاعد واكرر رأى سابق فى هذه المسألة : الاعتزال هذا هو المطلوب فالجراح مهما كانت براعته ففى يعض الدول المتقدمة يتوقف عند الخامسة والخمسون ..فالاعتزال ليس من ثقافتنا السودانية فالرقاص لايزال يرقص ويعرض ما يربو عن ال23 عام ونيف وبعشوم السياسة وأد الانتفاضات السندكالى مدمن الفشلالكاذب المهدى منذ اكتوبر 64 ينتظر أن يرثها .. اما نسيبه الذى شاخ وتشيخ فيمارس السياسة حتى يصبح اسم على مسمى والى أن نقضى نحبنا وبآخر رمق لانملك الا الاحتقار لكل الهؤلاء المعلوم منهم والمجهول لعدم الاعتزال والبصق على الفاشلين وأخ تف تف تفووو

أعجبنى هذا التعليق ((منقول بتصرف)

التعليق:

يمكن تسمية المقابله ” رد أبوسن الحبِّى على أبوسنين المجلس الطبى”

* كان “يا ما كان” فى السودان “حكيم الزمان” أبو أسنان ,درس على حساب بلد كريم فقران , هاجر لبلاد الملك و الصولجان , فكرّموه خير تكريم عندما أصاب , و حاسبوه عندما أشان , فخرج من الحلقه فاشتد عليه البرد, فشد الرحال الى الأوطان ,يمشى كما الطاووس بل فوق الأرض قدمان , أدمن المسرح و الصحافة و السلطان , وقال لأهله ” بكيت عند رحيل زينه السودان” …ليته بكى ” نفسه ” يوم أن صعّر خده للأخوان…يوم إستجدوه و الدموع فى الأوجان … ماذا ينفع الندم بعد موت الإنسان .

وإعترف “حكيم الزمان” باستلام الفرمان و بلع ما كان ينكره قبل يومان . و تعذر و تندّر بما لا يليق بالصبيان مع من علّمهم حرفان, ولم يأتنا بالدليل حتى الاّن ! وزاد “حكيم الزمان” عندما اشتد عليه البرهان … بأن الإنجليز حاسدينه , و العرب قاصدينه , والسودانيين ما فاهمينه ,ده كلام يا جدعان ….ولم يتبقى له من الهذيان , إلا أن يقول بأنه محسود من الألمان و السوفيت والأمريكان ….و ما براهم معاهم حماس و معاهم الطلبه و الطالبان , … ياربى حكيمنا ده إنس ولا ” جـــــان ” ؟. (إطلع وبان عليك الأمان)( فأهل الشرق يبكوك وأهل الغرب يبكوك , اهل الشمال يبكوك وأهل الجنوب يبكوك ….يبكوك , يبكوك, يبكوك ……….و “بيحسدوك” كمان.

طبعا لم ينسى حكيمنا أن يقول بأنه بحب الفقير و الغلبان , وبينتظرهم فى الزيتونه كما الولهان , علشان يحاكمو ليه الـ BBC وبنى علمان…ثم بكى “حكيم الزمان” وعبس و هذر فى ذات المكان … وقال “إن الحقيقة لا تغتال ” و نسى ما أمامه من بيان , فلو لا الضمير ما ينفع القلب الخفقان , فبين الأذنين عقل وأمامهما عينان .والحق أبلج لا يختلف عليه إثنان,…….. و ملك الموت يأتى دون إستئذان .

أعوذ بالله
هذا الشخص الأسمه كارلوس دا عديم الإنسانية مليء بالحقد والحسد
اتقي الله في الدكتور
اذا سؤل عن الدكتور فانني على يقين لا يعرفه اطلاقا ولكن لأنه انسان نكره ورغبة في ان يظهر في الراكوبة فوجد في الحقد والحسد وعدم الانسانية سبيل لذلك

¨الله يحفظك للغلابة