شطرنج الخوازيق !!!
تبادل الأدوار مخطط له من زمنا خدو مشلخ،والخازوق الكبير البحرك هذه الأدوار كما يحلو له ، هوهذا النائب الأول على عثمان،، قنطرها مظبووووط لي روحو عشان يجي يفجخ باقي الشعب الفضل بمزااااج….!
اصلواالبشير كان محرق روحو بي هواريطو وجعجعتو الفارغة الكان بسوي فيها، وكضبو الكان ببلعوا ناشف! وكلامو الكان بقولوا بإرتجال و دون وعي!!مثال إنه حا يخت كلو زول يداقرو تحت جزمتو الله يكرمكم ،والحشرات الشعبية وغيرها كثير من الورجغة الفاضية!!
ده كلو كان كلام ساي في نظر علي عثمان ، الفجخ الجد جد لسه جاي قدام! حتى صفوف الرغيف الشايفنها هسه حا تنعدم تماما!! الناس العندها بيوت حاتبيعها عشان تهج تخلي البلد الأصبح جهنم يحرق من طرف! وده الدايرو شيخ علي الحوار الغلب سيدو الترابي !!
شيخ على كما يحلو له ان يخاطب ،،كان خاتي البشير قدامو للربا والتلاف وشيل وش القباحة! لما يخلص من مخططو الجهنمي ويعمل مسح عااااام ويقسم البلاد ويفتن العباد ويدمر روح الشباب !!!
يكتل حيل الإقتصاد ويشل حركة البلاد في كل المجالات! من بيع مشاريع زراعية وصناعية ! لي بيع اراضي ملك للوطن و تمليك الحرامية لمراكز البلد الحيوية من صحة لي جامعات ومراكز السياحة المهمة في البلاد ! كده يكون اصطاد كل العصافير بي فد نبلة ! دمر البيئة والإقتصاد واسس لي جهل وفقر ومرض لعشرات السنين لي قدام وتحكم في زمام كل المواضيع بخبث ودهاء ما يحسده عليه إلا شيخو الترابي!!!
وبعدها يشيل من قدامو ناس نافع المداقرنو في القصر الجمهوري، اصلو من يومو مكجن نافع اكتر ما الشعب مكجنو !!! كان خاتيه زي البشير ونجح بجدارة إنه يفوز بالإجماع إنه نافع اصبح مكروه في كل مكان وشيلتو ساااهلة بعدما ادى كل مهامو الموكلة ليه من تفتيت العلاقات بين السودان ودول الجوار ، وزرع الفتنة بين ابناء الوطن الواحد، وتعذيبو للأبرياء ظلما وبهتانا! وتكميم الأفواه وتمزيق كل الأنسجة الإجتماعية !!
كده إنتهت مهمة نافع ومهمة البشير و وزير دفاعهم الترجلة ! والبلد بقت خربااااااااانة ومشلعة في الصقيعة, والشعب قنع من خيرا فيها وقنع من المطالبة بي حقوقو بعدما شيلوهم جنا حشاهم مقتول قدام عيونهم حمرة عين !! اكتر من 220 شهيد في اقل من اسبوع معظمهم من الشباب والقصر المغلوب على امرهم!!
رجعوا الناس لمرحلة اسوأ من المربع الأول !! كمدوهم في جحورهم وسكتوهم وبلعوهم عبراتهم و حسرتهم في صمة خشومهم ورضوا بالوضع المر غصبا عنهم ، ووكلوا امرهم لله الواحد الأحد ولزموا الجابرة !!
كده البلد اصبحت إدارتها ساهلة ليتحكم فيها علي عثمان بكل عنجهية وتسلط وجبروت !! يخلف كراع فوق كراع ويبقى الملك في زمن العبودية ! ولا يقدر واحد يقول ليه تلت التلاتة كم !!!
ده قصدو ونجح فيه بجدارة في تفتيت البلاد وتسريح الوزراء الكان زارعهم كومبارس ليه هو ! يساعدوه في تشليع البلاد وخرابها !! وفي نفس الوقت يشغلهم بي لملمة القريشات، اصلهم داخلين مهرولين للغنى من لحم الشعب الحي !! حا تقروا وحا تسمعوا كيف حا تتقلص الوزارات من 56 حرامي لي 15 حرامي لكن بي عبقرية 500 حرامي ومجرم خطييير!! يسهل لي شيخ الأبالسة على عثمان التحكم فيهم وتحريكهم كما يحلو له!لأنه الكنترول كلو حايكون معاه هو الفهيم رئيس الجمهورية القادم بي قوة صاروخية اكثر طمعا وجشعا وتحكما في الفضل من هذا البلد الماعندو وجيع !!
وهذه هي خطة الإسلامويين لتقسيم وتفتيت ما تبقى من البلاد! حاتكون الحال اسوأ ما عليه الآن ، تكتر العنصرية والقبلية وتتفشى الفتنة والجريمة بين ابناء البيت الواحد !!
والشماعة الحا يدرع فيها رئيس السودان المرتقب ، هي الحكومة السابقة من البشير لي نافع لي غيرهم من رعاع !! كل ما تجي مصيبة ، يقول للناس ديل المجارمة الكانوا ماسكين الحكم و الخربوا البلد !
عارف الشعب غشيم وحا يصمت تاني ويسردب كم ونيف سنة ! ويقدل هو فوق جثث الأحياء قبل الأموات
ويصر إنه هو الشيخ الوقور الحا يغير الدستور ويطلق البخور ويقلع الفساد من الجذور !!
ويتحكر في سدة الحكم لامن كل الشعب يرحل للقبور !!!!
متاوقة
هل صدقتهم فعلا إستقالة إبليس من الوسوسة والخراب ؟؟
إن لم يعي الشعب لهذا المخطط الخطير سوف يتقسم باقي الوطن لي جبة دراويش !
وبدل السودان كان فيه 5 اقاليم لي وطن واحد! حا يصبح السودان يحمل إسم خمسة دويلات صغيرة تطحن في روحها حد الموت !!! وجعي عليك يا بلدي ……..
نسأل الله ان يفرجها من عنده ويسلط علىهم غضبه ويأخذ كل مجرم اخذ عزيز مقتدر
عليكم بالدعاااااااااااء دعوات المظاليم ليس بينها وبين السماء حجاب ، ادعوا في كل صلواتكم,,
حسبي الله ونعم الوكيل عليهم اجمعين ،، يمهل ولا يهمل
أسماء الجنيد
[email][email protected][/email]
مثل علماء السوء كمثل صخرة وقعت على فم نهر لا هي تشرب منه و لا هي تتركه يخلص إلى الزرع
لماذا هذا التشاؤم يا استاذة أسماء بالرغم ان كل ما ذكرتيو ليس ببعيد عن الحقيقة الا اننا ما ذلنا نؤمن بأن الظلم لا بد ان ينتهى و ان الليل لابد ان ينجلى و ما ذال املنا كبير فى الله وفى هذا الشعب مهما طال الزمن .
علي الطلاق انت مره بي الف راجل سلمت اخت اسماء الجنيد وتحليلك للواقع السياسي السوداني مظبوط مية مية ……. ومعروف عن علي عثمان انه انسان مرابي وحرامي وللاسف هنالك من يدافع عنه حتي بعد مرور 24 عاما كان فيها مخططا لتدمير البني التحية والاقتصاد وساهم الرجل بقدر كبير في تغبيش الوعي لدي الانسان السوداني الطيب عبر فترات تواجده كمساعد لاسواء ريس مر علي البلاد بل علي الكرة الارضية جمعاء قاتلهم اللهم وقد كان كازبا باسم الدين ولا ننسي مقولته الشهيرة ايام هبة ابي كرشولا حينما ارسل الشباب نفاقا ليتم قتلهم هناك حينما قال : هي مسيرة ماضية الي الله .
الله يكضب الشييييييييييينة يا أسماء يا اختى .
دة بالذات اب وشاَ فحم عليه اللعنة في الدنيا والآخرة.
الجبغة الثورية كسحت قشت و مسحت و ماشا في اتجاه المحطة الرئيسية الخرطوم محل السدنة و القطط السمان
في اخر استبيان علي مجموعة عشوائية تضم حوالي 300 شخص اعمار مختلفة ( نفذته مجموعة شباب من منظمة شرارة )— الاستبيان من سؤال واحد : –
هل تفبل باستمرار عمر البشير رئيسا للسودان ؟ — النتيجة كانت كالاتي
1 – %2 لا اعلم
2 — %6 تؤيد البشير
3 – %92 ضد وجود البشر رئيسا علي اليودان
مع العلم ان في 2010 كانت شعبية البشير وصلت الي 35% كاعلي شغبية له في 10 سنوات الماضية .
سلمت يداك يااختاه الان فعلا الابالسة الخبثاء يدبرون مخططا اكثر فتكا بهذا الشعب الصابر المغلوب على امره القاعدة الثابتة ان الانسان لما يكون حرق ورقو والباقي ليهو ورقة او ورقتين فلاشتعال بكون حامي وربنا يستر على الشعب من اخر ايام هؤلاء المعتوهين وكل ذي عاهة جبار والانجاس ديل ياأخت هم حاكمين الناس فعليا من 1982وقت صلحهم مع النميري يعني31-2الانتفاضةتكون مدتهم29سنة دجل وتعذيب وقتل وسرقة وتقسيم وعنصرية وخراب لمصدر حياة أهلنا وعنجهية وتغييب لعقول الشباب بعبارات ان امريكا قد دنا عذابها وفتح ارض السودان لجميع المرفوضين من شعوبهم والسماح لهم بالتدريب وانطلاق فكرة الارهاب من السودان حصريا والعالم كله الان لن يرفع اسم السودان من قائمة الدول الراعية للارهاب ما لم يذهب هؤلاء التعساء
سلامات يا بت الجنيد. كلامك ده كلوو صاح , لكن يا أختي هسه انت لو عندك عدو مش بتستعملي كل قدراتك لتمكن منه . ابو العفين ده خاتيكم عدو هو من حقو يستعمل كل مقدراتو يعني ذي الجرثومه مابتتمكن الا في الزول الضعيف الماعندو مقاومه , يعني يا أختي الشعب خلاص ضعيف والناس ديل من زمان عرفو يخترقو جهاز المناعة للشعب السوداني و ده من غفلة الشعب الطيب علي قول المصريين اهه هسي نحن دورنا شنو وعملنا شنو الانتفاضه ونامت قلنا عصيان مدني ولا واحد قال بغم يا اختي انت فاقعه مرراتك في شنو . الكل عاوز جغمة مويه من الانخاذ الناخذه الشعب . الدباره في العصيان المدني . لو ما استجاب الشعب ده معناتو الناس راضين بالمقسوم والفرج من الله
لو فعلا هذا السيناريو تم يكون شيخ علي من دهاة السودان ويكون ركب جماعة المعارضة الطرورةويكون مافي فرق بين الصندل والطرور والا شنو ؟؟
والله صدقت… دا كلام صحيح 100% وهذا الملعون الحية الرقطاء احقد الحاقدين ومعروف انه مدور الشغلانة
كلها. ونسأل الله ان يجعل تدميره فى تدبيره والا يبلغه مقصده …اللهم آمين
I agree with you,he is Snake,Basherr is a rat,and Basheer will swallow the bait.Done