خبير اقتصادى : المؤشرات الاقتصادية المتوقعة للعام القادم أفضل من الأعوام السابقة

بالله كان البلد فيها رجال اقتصاد بحق وحقيقة من الاستقلال وحتى اليوم البلد في انحطاط اقتصادي لا مثيل له .

العيب فيكم يا من اعتليتم وزارة المالية جميعا جميعكم فاشلين من اول وزير لاخر وزير الإ الشريف الهندي فقط ومات زمان لكن من بعده لم تعل وزارة المالية رجل اقتصادي حتى اليوم .

بالله متاكد العام الجاي ح يكون افضل دليلك شنو وحلمت بيه في النوم .

الجاك
____

جاكات تقيلة

هديمك يا وليدمقدود
و صابحنا الفقر
و الجوع
صبح باب التكل
مسدود
كمل حتي الملح
في البيت
وشن همّ
الملح في البيت
وكت ملح
الدموع موجود؟!
دحين يا وليد
هو ديل
موُ قالوا ناس
إنجاز ؟!!
وشن سّولنا
مما جونا
غير حرقو
الفضل بالجاز ؟
كّل شيتا
صعب في السوق
من الكبريتة
للطايوق
و كان جانا
البخت تموين
رطيل سكر
و صابونتين
نجيب من وين ؟
و اخوك مرفود
و عدمان الشهر
ملين ؟
أمس زازيت
اكوس الدين
مشيت لسمية
بت مامون
لقيت جابولها
تلفزيون
سمح بالحيل
تشوف الصورة
بى كم لون
وكت في نشرة
ألأخبار
ظهر مك البلد
يضحك
جضومو كبار
مزرر الكرش
بزرار
لا مهموم
لا مغموم
لا زعلان
و شيهو
يراري بالألوان..
وقّد في حشايا
تباق نار
طريت رفد
الوليد و الجوع
و سال
دمع الغبينة الحار
اريتك يا ملك
فد يوم
يخلى الجوع
عينيك ما تنوم
أريتك يا ملك
فد يوم
تحس بي غصة المظلوم
دحين يا وليد
هو ديل ما لهم
و مال الدين
وكت قولهم
كلام الله
و فعالهم
ما فعال صالحين
كتير فيهم
عديل حقار
و بالقرآن
كمان تجار
و كضابين
أكان بنزين
عدم .. أو جاز
وتعبوُ الناس
و ضاقو خلاص
صفوف واقفين
يقولولك
إرادة الله
وكان عدم الرخيص
و الغالى
في التموين
يقولولك
ده . غضب الله
و كان الموية
صبحت طين
يقولولك
ده من امريكا
والعملا
حمونا الشب
ولاد الكـــــــــــلب
عشان الشعب
يحرن تب
يقبّل
من صراط الدين
دحين يا وليد
هو ديل
ما لهم
و مال الدين
أكان كنزو
الدهب و المال
بلايينهم
تسوى جبال
وعرباتهم تخطف
العين
و بناياتم قصور
في قصور
وحاة الله
و كتاب الله
أكان ادونا
طوب فد سور
كان سوينا
الف أويضة
لي مسكين
فترنا من الخطب
يا وليد
و من طيش العقيد
و عميد
و من قل القرش
في الايد
و من تعب الوقوف
في الصف
ومن غبن الرصع
بالكف
و من حفر الدروب
و اللف
و من خت الحلم
في الرف
كل يوماَ
نقيحنا يزيد
دحين يا وليد
هو كم دغشاَ
عشان نلقاهو
دافرنا
و تعبنا شديد؟
و كم حولا
صيامنا صبر
عشان يشرق
هلال العيد ؟!
اح ح يا وليد
لا حتى الخبيز
إنضاق
و لا هدما
كسانا جديد
و شوف المغسة
يا وليد
سموُ شقانا
صالح عام
و كل دمعاَ
نزل من عين
و كل جوعاَ
سكت بالدين
و كل زيناَ
محاهو الشين
ختو وقعيتو
في الإسلام
حرامهم يا وليدي
حلال
وا نحنا حلالنا
كلو حرام
يقلبو الدين
نصّل سكين
و ناسين
الحساب قدام
اخر زمن
يا وليد
نشوف كل البشاتن
لون
يفوت هولاكو
دوب نرتاح
ينط في الكرسي
نابليون
اريتك يا أمير
حالي
جعيص في الكرسي
في الخرتوم
و ساويلك
الف والي
نبايعك للظلم و الجوع
نبايعك
وكل ضيم مشروع
نبايعك
و جيتنا جيش
و دروع
نبايعك و الحكم
مقلوع
نبايعك
و القسم مخدوع
نبايعك
من سجن عالى
أخر زمن يا وليد
حصيف العين
يلاقى و يشوف
زمان
ظلم السلف
بالسيف
و حسه السيف
كلاشينكوف
غير زمن
الهوان و الجوع
كمان طالع
زمان الخوف
ديل ما برتو
لى إنسان
كم ولداَ
وقع نشفان
وكم زهراَ
كِتل و اتحت
في رمضان
لا شهراَ حرام
إتصان
لا كفنا ستر صبيان
لا شاهد
قبر معروف
لا اماَ
برد نارها
سكت و إرتاح
نزيف الجوف
دحين يا وليد
أ كان حسع
ده ديش مصعب
و أكان بيرق
علي الكرار
منو الكفار ؟!!!
منو القاصدينو
بالتكبير
و بالتهليل
و ضرب النار؟
اخاف نحنا
و أكان نحنا
أخير نضحك
كتير سبب
الضحك بخته
شوف المغسة
يا وليدي
ديل ما حسه
ناس حُقار؟
ده ذى دق الطبول
للموت
وذي وقد البلد
بالنار
* *
إلا نشوف
أ كان ساهرين
معاك يا جوع
و أ كان ضيقنا
إتحفر في ضلوع
و أكان صابرين
علي الفجار
وحاة الله
و كتاب الله
وكت نغلي
و نكوس التار
لا سوراَ
بقيف في وش
و لا لهب الغبن
بترش
و لا صفاَ
يميل بالقش
كل ظالماَ
يقع و يندش
و سيل دمع البلد
ينقش
لا بحبس حلقنا
الخوف
و لا بترجع
اكان لعلع
كلاشينكوف
هديمك يا وليد
مقدود
و صابحنا الفقر
و الجوع
صبح جلد البطن
مشدود
شن بتسو
و أخيك
من شهر مرفود
قالو صالح عام
عشان قال
العوج في العود
* *
نان ما يقول
أريت يقول
عديل يا زول
هديك
البغلة في الابريق
ما هامينا
-صالح عام-
وديش مصعب
و لا الحجاج
و لا بكتل
قلبنا الجوع
و موت منقذنا
ولا الضاج
خلي الضيق
يزيد يا وليد
بكرة الضيق
يخلى الناس
تبقى عُصّار
علي الحقار
و تبقي حريق
* *
قريب يا وليد
صيامنا يتم
و يهل و يشرق
هلال العيد
نحس طعم الخبيز
و يتبدل هدمنا
جديد

يعنى حتكرروا معجزتكم للقفزة الاقتصادية للمرة التانية, لما العالم كله عانى من الازمة الاقتصادية قبل عدة سنوات قلتوا اقتصادكم الاسلامى على العكس ازدهر, دلوقت اسعار البترول فى أدنى مستوى لها منذ سنين وانتو متوقعين انتاج البترول يحقق معجزتكم الاقتصادية للمرة التانية, أكان جامعة الخرطوم فيها اساتذة من النوعية دى أقروا عليها الفاتحة.

حسب معرفتي … أي واحد يسمى نفسه خبير أو خبير إستراتيجي ….. خت تحته خطين…. طوالي أعرفه زول مدعي المعرفة…. يريد أن يتمدد على حساب الناس ويوهمهم… والله انا بكره أي زول يسمي نفسه خبير استراتيجي….. خبير شنو؟ استرالتيجي شنو؟؟ ياخي ما تفكونا بلا وهمات ……

يا ناس تفاؤلو شوية كدي
كلها تعليقات محبطة
الله يسمع منك يا دكتور
امين امين

دا خبير حله بس آل ايه خبير اقتصادي

يا ود الجاك درستونا في الاقتصاد جملة اعتراضية مهمة جدا وهي other things remaining equal .موسم أمطار جيد ما اختلفنا ومحصول جيد ما اختلفنا . ولكن كيف يتم التعامل مع هذا المحصول من قبل الجهات المختصةالمسئولة عن الفائض والمخزون الاستراتيجي وشراء الفائض بأسعار مجزية ؟ هل هذا سيحدث ؟ لا ولم ولن يحدث .هذا انهيار وعدم استفادة من أول المؤشرات الايجابية ، وقس على ذلك بقية الأشياء. وياخبيرنا الجهبوذ ، هل تصدق حكاية توفر التمويل للمواسم الزراعية والعروات المختلفة، تلك الحجوة والفرية التي نسمعها في بداية كل عام حتى صارت اسطوانة مشروخة؟؟

يا استاذتا الفاضل انت تعلم ان النبته الناجحة تحتاج الي جملة عوامل اذا توفرت اتت اكله فهي تحتاج الى ارض خصبة ومياه وبعض الاسمدة ورعاية وخبرة وكذلك الاقتصاد لا ننظر عنصر واحد او مورد معين ونقول انه سيؤدي الى خير وفير ولكن لابد من توفر عوامل ليؤتي اكله وانت اعلم بها واعلم بالحال لا كوادر وكفاءت ولا بيئة اقتصادية ولا اصحاب وجعة ولا استراتيجيات …………… والاايه يا استاذنا