الجامعة للبيع في المزاد..!!

رطِب لسانك بالذِكِر ..
لا تنسى الله..
أذكُرِ المعبود إلهك في سؤالك..
بث هُمومك واشكي حالك..
والشكية لغيروا ياخي..
قالوا فيها كتييير مذلة..
لي غيروا مين المُشتكى..؟
نحنّ عارفين وإنت عارف ياخي يلّا..
نبتهل للمولي ربي..
يُخرِجنا من عُنقِ الزُجاجة..
حالة مالت..دُنيا ضاقت..
شالوها غيرنا ولبسوا تاجا..
خيرنا داك يا سيدي ولى..
أرفع إيدك واشتكي..
أنسى كُل مسؤول هنا ..ما عندو ليك يا سيدي شي..
بدّد مواردك بالسفر ..ضيّع زمانك بالحكي..
خاتيكا في خانة السذاجة..
يا سيدي كلّا..
واللهِ حاشا ..لا إنت ساذج لا غبي..
لابس السماح والطيبة حُلة..
غير الله قط لا تشتكي..
لا شيخ بفيدك لا فكي..
قادر يفك الكُربة هُو..
يجعلّك أسباب إنفراجا..
لا تبتئس لو قطعوا عنك كهربا..
لا تبتئس لو للغريب باعوهوا نيلك ..
وبكرة يصبح فاضي زيرك ..
مافيهوا موية بتشربا..
لا تبتئس لو باعوا قطرك وسِكتوا..
تشهد جزيرة الخير عليهم..
باعوها ليل سِكتنا بي تُرماجا..
باعوا هيثرو الخط هِناك..
باعوا البُيوت ما خلوا حاجة..
لا تبتئس لو قالوا يوم الجامعة للبيع في المزاد..
ما دام قبيل بانيها غُردون الخواجة..
لا تبتئس للمولي خالقك إشتكي..
ما تنتظِر فرجاً يجيك مِن ثُلة أدمنوا للحكي..
ما تنتظر فرجاً يجيك من ثُلة أدمنوا للحكي..

بلا أقنعة..
صحيفة الجريدة..
[email][email protected][/email]