وَ هَـلـُمَّـجَـرْ

و هَـلُـمَّـجَـرْ

طلال دفع الله
[email][email protected][/email]

********

و مرقنا .. في قول المثل
جابرك شنو !؟
المُر !!
تقول : منو الأمر.
ما فيها إيدنا خلاف حجر
حبة هتاف بالحق جهر
ضد السلاح .. قهر الكجر
حبة هتاف ضد الفساد
ضد الأذى الساموا العباد
و هتفنا دايرين الخبر:
ديمقراطيه لا شق و طق ..
حريه محروسة عقايد ..
دستور .. و ما قيد مزاجات أو نظر
عارفين حقوقنا المن جدودنا
لا في النهانا و لا حظر
دايرين نكون فعلآ بشر
دايرين وطن :
واحد موحَّد ما انشطر
فيهو المَزارع ..
مسقيه بى عرق المزارعين ؛
بالنيل .. بالحفاير و المطر
طارحَه الأرض بدل السنان ..
بـ البدِّي في الآخر ثمر ,
فيهو المصانع
تهدر هدير الكادحين
تنتج معينات الحياه
لا بندقيه لا طايره و خطر
دايرين وطن آمن أمين
العين تشوف ..
جيهة الغرب جيهة الشرق
جيهة اليسار أو اليمين
بلد السلام و التنميه
سافنا صحرا ..
و غابه أؤ ساحل بحر
آمن أمين ،
فتريته .. قمحه
خضار .. ثمار
مراعي لى قدل المراح
ما الأرض في
و لو نيه صادقه و طَيْبه في
تعليم و صحه و بيئه صاح
نفوسنا سمحات إنشراح
دايرين نكون فعلآ بشر
أحلام .. أماني بدون حدود
أشعار و أغاني .. جمال وجود
لوحات .. كاركتيرات .. تأمُّل و إبتسام
صحافه .. تلفزيون و رادي ..
و كلهن حُرَّات لسان
لسانها بالحق و بالحاصل جهر؛
إسفير أثير ممدود عنان
لا حظر لا قيود عليهو سوى الضمير
دايرين كتير .. زي البشر
لا أم ضناها وقود حروب
لا شِعبة الأسره البعول مفصول ظلم
و بعد الظلُم .. سدّوها قدامو الدروب
لا في الشتات عش الأمان المُر يكون
الشي الأمَّر
من شدة الويل و العذاب وطناً بديل ..
و إن فيهو شر
يختارو زول .. منجاه و هروب
دايرين سلام في محبتو الكل إستقر
عدل و عداله و إحترام
دايرنوا دا .. و دايرنوا داك
و هلمجر.