الهادي بورتسودان
البوست ضروري جداً و مخصص للناس البنتقدونا في مواصلتنا الحرب على تجار العملة والمهربين .. وتحديداً ناس التنظير المالي والأقتصادي ناس الكتب الما نزلو سوق في السودان ولا عارفين الرصّـة.
اليوم الدهب عندنا بي 22400 جنيه للجرام للعيار 21 وهو المتبع في السودان للشراء للمحفظة أو التعاملات الكبيرة في السودان
طيب سعر الدهب للأوصنة في السوق العالمي للعيار 24 بي 1742.54 دولار
– يعني سعر الجرام دهب عيار 21 في السوق العالمي (تقسم سعر الأونصة على 35.54) يعني الجرام بي 49 دولار
اضرب 49 دولار بسعر 445 جنيه تلقى الجرام في السوق العالمي ما يعادل 21.805 جنيه سوداني
يعني الدهب الليلة في السودان أعلى من الدهب في السوق العالمي
..
أحسبها ليك بطريقة تانية عشان ما نتغالط
سعر الجرام في السعودية الليلة 183 ريال للعيار 21 خام
يعني 183 ريال ضرب 118 جنية للريال تلقاها بما يعادل 21600 جنيه للجرام في السعودية
وقع ليك ؟؟؟؟
…
قد ما تكون الاسعار كده في كل الأحوال ربما في طلب عالي من المحفظة لكن الناس الملمين بالموضوع ما اقل كتير يعني استحالة يتجاوز 2% أو 3% أقل
…..
الكلام بيلغي أي ورجغة نحن شغالين عليها في بورصة الدهب ، ونديهم زي أسعار دبي ومش عارف شنو .. لأنو عملياً نحن بنديهم أسعار أعلى في السودان أو على الأقل ما بفروقات تسمح بالمجازفة
….
من ناحية تانية برضو الخبراء بيقولوا البورصة حا تواجه صعوبات أنو المصفى في السودان ما معتمدة عالميا في المعايرة والفروقات دي زاتها أنا ما حسبتها ليك فوف لأنو البشيل الدهب هنا تاني بيمشي يعايرو يعني 21 في السودان زاتو ده أقل شوية مرات المعايرة
…
طيب لي الدهب بتهرب ؟
….
السبب الأول والأهم : ما يسمى بتعزيز المركز المالي أو بناء الأحتياطي الخارجي لعمليات قادمة بعيد عن العيون والدولة ، زول عندو كاش هنا محتاج يوديهو دبي لعمليات استيراد مثلاً ( زي بتاع الشاي المشهورمثلا ) ، يقوم يشتري الدهب ويهربو مش عشان مربح عشان زول ما يسالهم من عوائد الصادر ، وتجيك القروش في شكل شاي وهو ربحان فيها 200% يعني شنو لو خسر في الدهب ؟ ..
برضو زي تجار العملة العندهم أرصدة عالية سوداني بشيلها دهب يوديها دبي عشان يضمن أنو القروش دي يقدر يودعها في الحسابات في دبي بشكل سليم (يغسلها يعني ) ويحول منها زي ما عايز
الغسيل في العموم في السوق العالمي بخسرك حوالي 40% من القروش عشان تنضف شنو يعني كان خسر في دهب 3أو 4%
….
السبب التاني : دولة جارة تعطي الدهب السوداني أعلى بكتير من أسعار البورصة بحيث ترغب المعدنين والتجار على الذهاب اليها بدل الذهاب للخرطوم وخصميات الشكرة السودانية للمووارد المعدنية .. هذه الدولة تستخدم الدهب لتقوية مراكزها المالية وتعزيز أحتياطاتها بهدف السيطرة على عملتها والتضخم ( دي ما نظرية مؤامرة ده كلام تجار وناس شغالين في الدهب بشكل متوراث)
….
ماعندنا خيار في الجو السالب ده عير نحارب المهربين وتجار العملة .. لعوامل كتيرة ومتشابكة
..
التضريبات في البوست مراجعو من تاجر دهب في المحفظة
الهادى نسي احتساب الضرائب و الزكاة و تجميل المدينة ودمغة جريح و دعم مجاهد ورسوم الهجرة الى الله و رسوم عبور و ضريبة الارباح و الجمارك و القيمة المضافة و رسوم محلية و المسئولية المجتمعية و حماية الحياة البرية و ايصال خدمات و دعم الاجهزة الامنية و رسوم ترحيل وسداد القروض الدولية و احتساب رفع الدعم و نسبة المخاطرة على الجنيه مقابل الدولار.
ليجد المنتج ان بيع السلعة بالخارج أفضل له دون احتساب كل هذه الفواتير.
اما الجزء الاخر من الاسباب فهو _سيادى_ بحت ، و اللبيب بالاشارة يفهم.
وهذه الرسوم اعلاه ليست على الذهب فقط ، لذا كل المنتجات السودانية تفوق اسعارها العالمية ، و بعضها يتجاوز ذلك بأكثر من سبعة اضعاف كمواد البناء.
و يمكن وصف ذلك بالالمعية الاقتصادية السودانية السمحة الاصيلة!.
يا اخوي الهادي حسبتك دي عايزه وزنه نعم دي سعر جرام الذهب في السعوديه حسب المنشور لكن لما تروح للدكان بزيد اقل شي 10% لزوم التصنيع الي مشغولات ذهبيه وتباع بسعر اعلي من السودان وهو مايسمي في الاقتصاد القيمة المضافه والله اعلم.