لو جبت إسمه الهواء بقسموا يا عثمان ميرغني ؟؟؟

لو جبت إسمه الهواء بقسموا يا عثمان ميرغني ؟؟؟

أسماء الجنيد
[email protected]

الأخ عثمان ميرغني . السلام عليك وعلى الإخوة والأخوات قرآء الراكوبة
لو جبت إسمو الهواء بقسموا يا عثمان ميرغني ؟؟؟
ــــــــــــــــــــــــــــــــــــــــــــــــــــــــــ

الأخ الزميل عثمان ميرغني لا اعرفك إلا من خلال كتاباتك هنا في الراكوبة
وللأسف اختلف معك والكثيرين جملة وتفصيلا في طرحك الما واضح نهائي,
الصحفي والكاتب عموما يجب ان يكون صادقا مع نفسه ومع القرآء وان يتطرق للقضايا بحيادية وشفافية، تجعل القاريء يحترمه ويحترم مصداقيته ومواقفه أيا كان توجهه وإختياره
لكن طرحك المتناقض هو المقصود في هذ المقال تحديدا
بصراحة يا خوي سؤالي ليك هو مراعاة المشاعر لزومها شنو لي حرامي ومختلس وفيه كل البلاوي الذكرتها في مقالك اليوم
هل ده نوع من التهديد كما ذكر احد المعلقين ؟ ام إستخفاف بعقول القرآء وضحك على باقي الشعب الفضل؟ أحيانا اشعر في كتاباتك بعدم إحترامك للقاريء في طرحك الساذج وضحكك على الدقون فيما تورده خلف السطور !!! لماذا لا تكون واضحا وصريحا ومتصالحا مع نفسك فيما تكتبه ؟؟
شخص عمل كل العمايل الذكرتها وعندك ما يثبت إجرامه بالوثائق كما تفضلت وذكرت !!! لماذا الإفتتاحية الكبيرة دي والتمهيد والخروج من لب الموضوع بذكر إسم شخص آخر ؟ وجر القاريء في متاهة متعرجة ، وجرجرة كلام لا يسمن ولا يغني من جوع …هل دي حدوتة على قول المصاروة ولا لغز للقرآء ولا فقعان مرارة وورم كبد وطوحال وتلفان اعصاب ؟؟؟
هو فضل شيء يتضارا ولا يتغتغت ؟ ما الفساد عم البلاد تبارك الله وما شاء الله , الخم بقى بالكوريق والحفر مطامير والشحن قندرانات ولواري! واللهطي مشاريع وعمارات ومصانع وما خفي اعظم
اها الفضل شنو ؟
مستكتر على الشعب المظلوم ومطحون بالسنين ومسروق قوت عياله , مستكتر عليه معرفة السارق عديم الضمير وفضحه على الملأ؟ طيب هو عمل كل العمائل دي ابسط شيء تشدوه في السهلة دي ويحاسبه الشعب ، ولا تقول ليه تقدم إستقالتك ؟؟ اها لو قدم إستقالته ما بتجيب إسمه ؟ وبتحرق الوثائق العندك ؟ وخلاص حق المظاليم راح شمار في مرقة ؟؟ إنتو زاتكم منو يا عثمان ميرغني البتهددوا في الحرامي ده ؟ وبتخوفوه يقدم إستقالته ولا تجيبوا إسمه ؟ هل إنتو ناس الحكومة ؟؟ ولا ناس التيار ؟ ولا إنت ده في رقبتك ؟؟ لو ناس الحكومة ، إتلومت لوم الجبال والحجار !! إطرشنا ما شفنا حكومة بتحاكم ناسها وتهددهم وتديهم فرصة يختاروا نتيجة الحكم !! (( يا إما يستقيلوا وتنوموا بالمسروق بالشراكة فيما بينكم أو تجيبوا اساميهم وتفضحوهم لكل الناس )) ولو بتقصد ناس التيار برضو إطرشنا ما شفنا صحيفة طابة الحكومة تحت إيدها وبتتفسح في المواطن كما يحلو لها!! وكان إنت في رقبتك دي عثمان ميرغني !! برضو بنقول ليك ما من حقك تدس مجرم وما تسلموا للعدالة , ومن حق اي مواطن يعرف السارق والمسروق بالوثائق الإعلنت على الملأ إنها بحوزتك !!!! وتسترك على الحرامي بالقانون إنت زاتك مدان . ومشارك في الجريمة النكراء دي ,, طبعا بقصد القانون الواحد ده ما قانون الإنقاذ الحسب الطلب والمواصفات والمقاييس والمعايير !!!
دحين نوع الأساليب الملتوية وملونة كالحرباء شينة والله في حقك كصحفي وكاتب يفترض إنه تكون صادق مع نفسك والقرآء وتحترم عقولهم عشان يحترموك ويحترموا قلمك وكتاباتك
المصداقية والشفافية والدقة ايا كان الإنتماء يا اخ عثمان مطلوبة من الكاتب والصحفي
قد يختلف معنا الآخرون في التوجه , لكن المباديء يجب ان تكون لها مكانتها بيننا جميعا
ياخوي احسن عديل تحدد موقفك وزول بسألك مافي , احسن من مناصرة الظلمة بإسلوب الخفاء و دس السم بين السطور وسط الحروف المنمقة لتخدير القرآء المغلوب على امرهم, الراكوبة هي المنفث الوحيد للآلاف من القرآء الما عندهم عضوية في اي منتدي وممكن يعبروا بكل بساطة عن رأيهم بالردود على المواضيع الحيوية البتخص البلد والمواطن في ظروفنا الراهنة,
مع متابعتي للكثير من كتاباتك للأسف بحس فيها مكايدة اكتر من انها مناصرة للمواطن المهضوم حقه ولأهلنا المطحونين 22 سنة من حكومة الزيف والضلال ,
ما عارفة هل إنت قاصد تستفز القاريء بإسلوبك ده ؟ ولا إنقاذي و مدسوس لينا عشان تفور دمنا ليس إلا؟؟ ما حاسي بمعاناة الناس ؟ ما حاسي بضيقهم في ردودهم ليك ؟ التمادي لزوموا شنو ؟؟
هسه زولكم الحرامي ده ما داير تجيب إسمو خايف الهواء يقسموا على قول الأغنية ولا شن قولك آآآآ ود ميرغني ؟؟
الله يهدينا ويهديك ,,,

متاوقة
ــــــــــــــــ
يا خبر بفلوس بكرة يبقى ببلاش على قول المثل , ويمكن الخبر طلع اصلا ,
ربنا ينتقم منهم ويفضحهم جميعا بركة جاه النبي , لا واسطة لا تهديد , ويخلص حق المظاليم
يمهل ولا يهمل