نجوي ست الشاي تخرج الهواء الساخن : ناس الحاكومه ديل صعبين

عبد العزيز الننقة

(ست الشاي) مجلس وامرأه يقصدها الكثيرين للمسامرة فيما بينهم والترويح عن همومهم مع ارتشاف ما تجود به من مشروبات ساخنه (شاي ، جبنه ، شيره ، نسكافي …الخ) .
(ست الشاي) ايضاً شكلت للبعض منصة لتقديم الشكاوي وتبادل الاراء والنصائح .. كثيرون تغنوا لها ، تغنوا بها من ابرزهم الراحل محجوب شريف في قصيدته الشهيره (يابت احسن من غيرا كفتيره تفك الحيره) … ورغم ذلك هناك كثير من الاشكالات والحكاوي التي تواجههم .. جلسنا مع نجوي علي ابو دقن احدي بائعات الشاي (بالسوق العربي ش ، غ صينية القندول تفترش حاجاتها امام مكتبة الرائد)جلسنا اليها لمجاذبة الحديث حول المهنة ومعرفة المعوقات ونظرات المجتمع فكانت الافادات التاليه :
ــ الاسم ؟
نجوي علي ابو دقن .
الحاله الاجتماعيه ؟
أرمله .
ـ وسيلة كسب العيش ؟
أعمل بائعة شاي ـ هنا بالسوق العربي جوار صينية القندول .
ـ من بتين وانتي بتشتغلي في المهنه دي ؟
منذ العام 2001 م .
ــ السبب الخلاك تخشي هذا المجال شنو ؟
نسبةً لوجود الأطفال ووفاة زوجي وانا بربي في اولادي براي .
ــ عدد الابناء ؟
عندي ولدين “الحمد لله” الابن الاول درس الجامعه ، نحمد الله واشكره وقفت عليهم لاحدي ما خش الجامعه وحصل القدر اتوفي في نهاية العام 2013 م ، توفي قبل التخريج ب 7 ايام فقط (تكمل وهي تغالب الدموع) ربنا يرحمو ، والابن الثاني “علي” في المرحله الثانويه بالصف الثالث ربنا يحفظو .
ـ هل هناك عائل للاسره معك ويساعدك ؟
يسكن معي والدي ، واخي يساعدني في مصاريف المعيشه .
ـ حدثينا عن هذه المهنه واقعها صعوباتها والمعوقات والمشاكل وكافة التفاصيل ؟
هي كلها لو ما الظروف انا ما كان اشتغلتها انا تعبت منها خلاص والله ، في بداية دخولي لها كان لا توجد صعوبات ومعوقات ومافي شئ اجهني كتير ، اهو يعني مواصلين ، لا اريد ان اتكلم في مشاكل الكشه وناس الحاكومه ديل صعبين ، ما بيرحمو ، وغير كده هسي العمر اتقدم والسخانه وكل شمس النهار الانت شايف ده والسكن البعيد وصعوبة المواصلات ودوامنا بيبدأ من صلاة الفجر وحتي قريب المغرب وبعد داك شوف زمن الطريق والصباح بطلع بدري شديد عشان اذان الصبح تكون هنا .
ـ بتسكني وين ياخالتي نجوي ؟
اسكن الحاج يوسف ، ورا هناك ، التعويضات .
ـ هل تكفي احتياجاتك بهذه المهنه ام ان لكي عمل اخر؟
هو الاكل والشراب “الحمد لله” يتتمشي ، بنقدر عليها لكن المشكله العوارض والحاجات التانيه ، يعني الجاي علي قدر الاكل والشراب ، والمستشفيات بتتم معاملتنا فيها بطريقة اننا ناس ساي ، المهمين وباقي الناس ونحن خلفهم ، هناك بعض الدكاتره وهم قله بيعاملونا بصوره كويسه وولاد حلال لكن هناك الباقين نسال الله انو ربنا يهديهم .
الامور الحمد لله بتتقضي كده كده بنجازف والحياه ماشه الحمد لله .
ـ خالتي نجوي مبسوطه انتي من هذه المهنه ؟
غير مبسوطه منها ولكني مجبوره ، انا ما براي في هذه الحاله كثيرات ، حتي في صفي ده (شاديه وعشه وسميره وديل) واقرب واحده مرة ود خالتي ، اتوفي ود خالتي وترك لها خلفه اطفال ، عدد من الابناء وزوجتو ، ما لقت اللقيتو انا ، لا محل ولا غيرو .
ـ هل لجأتي للمنظمات واصحاب القلوب الرحيمه ؟
المنظمات بجرجرو الزول ساي وما بدو ايي شئ ، غير يكمل الفي يدو بي امشي وتعال مافي شئ تاني .
ـ رساله الي … ؟
ما تيأسوا من الحياه ، والعمل ما عيب في سبيل معيشة الابناء ، وانا كمثال تعبت شديد في تربية اولادي وابني الكبير فارقني وهو زي ما قلتا ليكم رحل قبل التخرج بي اسبوع وكنت انتظر هذه اللحظه بفارق الصبر (لكن دي الاقدار مافي يدنا شئ غير نحمد الله عليها) وهو كان يشتغل في شركة الهدف وبيقرا ومواظب وناجح في قرايتو وكان بصرف نفسو وانا بيساعدني برضو .. وتوفي زوجي في العام 1989 م وابني الصغير “الهسي في تالته ثانوي ده” ما شافو .. ورغم كل هذا وناس المحليه وندفع غرامه 51 جنيه والخمسين جنيه دي عشان تطلعا عايزه زمن .. الدنيا فيها الحلوه وفيها المره .. بقول لي كل الناس انو ما تيأس وربنا ما بيخلي زول .
ـ كلمه اخيره ؟
اشكركم ونحن زي ما قعد يقولوا (ضاحكه) مره واحد اظنو كان سكران قعد هنا وبيقول (انتو الشرائح المنسيه) وجلستكم دي معاي حسستنا بي وجودنا وكونو تهتموا بينا .. شكراً ليكم .