عـسـل الـورد الخامـل هـمسـكِ …
بسم الله الرحمن الرحيم
عـسـل الـورد الخامـل هـمسـكِ …
عروة علي موسى
[email][email protected][/email]
عسل الورد الخامل همسِك
وخدر الصوت المس أوتار العصب الهام بي مسِّك
أراجيف الطبل الدقَّ حنين في نص الليل
والطبع الحاد زي حد السيف
ورقيق كالموية
هداها الخدر الساكن فيك
الليل مسكون بي الوحدة وشوقي إليك
هزيت نصل الحرف المشتاق
ادّفق عِطر النيم رقراق
وكيف إسمح لي زول مشتاق
ومشلول من وخز الهمس الدفّاق
إفوق بي عِطرو
من خَدَرو الشاق
إحساس الفجر جواي وين راح
وبقيت في زمناً ما هو الليل
وما إظنو صباح
وقفت على ناصية وردو الخامل
وإحساس معدوم
غير زمنو الكامل
مولاي …
الناس نامت وقفلت أبوابا
شالتنني الريح قدام شجر الغابة
والطير النائم في غصنو
مشتاق لي صباح
زقزق فرحان
ولا مِن حس بي الفجر الكاذب
غمض عينيهو ونام ..
وبقيت حيران
خشيت في سح الصوت النعسان
عبِّيت من وجع الخدر الفتّان
غشتني ملامح المطر الما حقنوه بي ركعات زيف
المطر الرطَّب حرقة صيف
المطر الطيف
المطر الهدّ بويت الطين
بويت حاج أحمد ود الزين
وجات الناس من آخر الحلة
الخير مو جاك آود الزين
وطيبوا خاطرو
ما الخاطر الطيب ما بخبر شين
ولاحقني الصوت .. الرجعو معاي
فجتني جحافل ليل قسّاي
وبقيت مقسوم
ما بين إحساس الخدر النام جواي
وبين ترديد همسات لي صوت لولاي
حاولت أجمّع في لحظة
مقدار الخطوة البرجع بيها
لي أول نقطة من دفق الورد
لي شغف الحس السبق اليد
لي الفجر الطال ميعادو
ومستني خلاص من ضلَّمة ليل ممتد
ومن وهم الخدر الفات الحد
مستني خلاصو
يا ريق الروح الحاملو الورد
مستني خلاصو ..
عروة علي موسى ،،،
كيا عروة الورد ،سلاما،ومعذرة،انه بوحك وصادف هواي،فجاءت من الكي بورد،،،
ذي همسك الا حلاة الورد الدافق عسلا
يا صوتك ناثر في اوتار الروح من مسكه
الطبل الدق حينين هز سكون الليل
دا السيف الحاد ذي طبعك
والموية ترقرق بي رقك
دوزن نغماتها الساكنة بجواك
والليل يتيم وحداني وداخل فيك
شديت علي وتر الحرف العاشقك
اتساقط عطر الشوق من شجري المشتاق
الساكن من سريان البوح جواه
صحاهو شذاه
من صمتو الواصل جوف الاعماق
ليه انفاس الفجر تتغابي كياني
وانا تائه مابين دمعات الليل
وانسام الصحو البتتحاشاني
واقف في المابين
راجيهو يتنزل في بي حسو الكامل
يافجر الصحو
الناس ارتاحت من لذع الريح
وانا بشاغلني وخز الشوك من شدر الغابة
والطير الحاضن حلمو
بتشيلو افراح الصحو فوق غصنو
تسريبو ،وهو الشارب لسماحة الفجر
تدنيبو من حيث الضوء الطالع والافراح
الطير كان بحلم نام فرحان
وانا مابين البين ووجع البين
اصحو حيران
ذوبت كياني في الهمس الساكن في الوجدان
شربت من جرحي الطامح بالاحزان
غمرتني في الساعة امطار الصحو النورانية
هدت بنيان الاشياء المبني بالاهة
وزرعت في وجدان حاج احمد ودالزين الراحة
فطفق يغني للوادي الاخضر
لمدين تدركه ويشرق فيه عشق الاحياء
وتغني عصافير الاشواق بروحه
يااحمد ود الزين،توحد،انزع عنك حذائك
ماانت الا هذا الطير الحالم فوق الغصن
ماانت الا الغصن الفنان
وماانت الا صحو الصحو
ونبض الحلم
ونفس الفجر
يااحمد ودالزين سيطلع منك الانسان الانسان