يا سعادتك
يا سعادتك
طلقة غاشمة .. وطلقة أثمة
طلقة أفاكة وأجيرة
طلقة عايبة .. وطلقة خايبة
طلقة باعت لي ضميرا
وطلقة تغتال البراءة
وتسرق الروح النضيرة
وطلقة كافرة في صدر عاري
وكذبة في عز الظهيرة
أبقى أفهم يا سعادتك
إنو دي الكذبة الأخيرة
ومهما طالت واستطالت
قبضة الغدر الحقيرة
دا الشهيد ما زال بناضل
ولسة هادر في المسيرة
وكم شهيد حالف يحاسبك
بلّو راسك للعسيرة
ولو بتجرد لي حسابك
تلقى سنواتك ضريرة
ولو بتحسب لي سنينك
تلقى كذباتك كتيرة
ابدأ بالكذب المقدس
كذبة (الإنقاذ) شهيرة
كذبة صنعت.. وكذبة زرعت
وبرضو حصدت في سريرا
كذبة باعت لي جنوبنا
وكذبة نشفت الجزيرة
وكذبة قايلة الدنيا دايمة
وديمة ترتكب ( الكبيرة)
كذبة ضبحت .. وكذبة سلخت
وكذبة في دارفور مريرة
كذبة شايلة الفتنة حايمة
وفي أزرق النيلين صفيرا
وكذبة النعرات أصيلة
وفوق جبال النوبة طيرا
كذبة في كجبار غريقة
كذبة فرتقت العشيرة
وكذبة باص الجنة سيرة
وديمة في نفس الوتيرة
وأبقى أفهم يا سعادتك
صبحت أيامك قصيرة
ويللا أرحل عن سمانا
كلمة واحدة ومافي غيرا
قبل ما تبيع المقابر والجماجم
وروح مظالمنا النخيرة
قبل ما تبيع الصحاري
وسكة النيل والدميرة
وقبل ما تبيع البوادي
وكلْ سحاباتنا المطيرة
قبلِ ما تبيع المساجد
وكلْ سجدة و كل شعيرة
أرفع إيدك عن شموعنا
وكل جامعاتنا المنيرة
شوف جموع الطلبة مرقت
وزي أسود الغاب زئيرا
قبل ما تجرب تغامر
ما حا تنفعك الذخيرة
وكل شهيد حالف يفرِّح
كل عازة.. وكل كنداكة.. ومهيرة
وأبقى أفهم يا سعادتك
جامعة الخرطوم أميرة
وبكرة تشرب نفس كاسك
وكورة (الجيش) مستديرة
ضياء الدين مدثر رجب
[email][email protected][/email]
