الحكومة السودانية تصدر ضوابط فنية وشروط جديدة لإستيراد العربات

مدير للمواصفات والمقاييس واسمه سكراب ؟؟؟؟؟؟؟؟؟؟؟؟؟؟

كلام خارم بارم.. البلد كلها امجادات وركشات وأتوز وكيوت ويقول ليك مواصفات

أسا وين العربات هنا؟

طيب خليني أفهمك ..لمن زول يجيب عربيه عمليات الفساد كالتالي :
يمشي لمهندس المرور يدفع حاجه
و يمشي وزاره التجاره يدفع حاجه
و يمشي لمهندس المسح و الرقابه يدفع حاجه
و يمشي لناس الرقابه و يدفع حاجه
و يمشي لناس المسح الميداني يدفع حاجه
و يمشي لناس الهيئه و السلامه و كمان بالتنسيق مع ناس المرور يدفع حاجات كتيره
و قبل دا كله في الميناء هناك تدفع حاجات كتيره منها ناس المواصفات و المقاييس
و اوع تنسي ناس القيمه المضافه يحبوا النضافه
كدا اتنضفت و فهمت حاجه و لا عايز تفهم ؟؟
تلتين سنه ما تفهم شنو انت ؟؟؟؟

خليك بتفهمه طايره البطل أمريكي في القصر و طه سعودي كمان كان في القصر

ماهو يا يتركبوا انتو ولا نركب نحنا.

ما المغزي من دا كلو فتح نافذة جديدة للمأكلة

ياخي ما عاوزين عربات ان شاء نرجع لعهد الابل والحمير قاتلكم الله يا شرذمة

كلام الطير في الباقير

اتمنى حظر اي خبر من المصيبة الاسمها المدارية دي لحد ما يتعلموا يكتبو كويس.

دا بقول فى شنووووو !!! اقطع دراعى اكان فهمت حاجه
يا احبابنا واحد يشرح لينا

دي ماكلة جديدة وتعم الفايدة ناس الجمارك والمواصفات وناس المرور وكمية من ايصالات التحصيل
كدة ان شاء الله تكونو فهمتو اللعبة

أصلها دى مواصفات كبائن سيارات ولا مواصفات غواصات نووية!!!

عنوان غلط الكلام عن الشاحنات
وليس جميع العربات

مجرد سوال لو واحد من القطط السمان جاب ليه كابينة قديمة حا ترجوعوها . اتحداكم يا ناس المواصفات ياخي ديل بدخلو شحنات مخدرات خليه كبائن

عوض احمد ( سكران )
ياخي صور لينا العربية الانت قاصده دي..
شنو الكابينة والسائق والركاب..
الله يركبكم جن كلكي
امنجية..حرامية
×××

كدى وفروا المحروقات وسوا خزانات تمسك البلد شهرين ثلاث لحدى ما تصينوا المصفاة بعدين الكباين والمواصفات يعنى لو مواصفات 100 فى المية حتمشى من دون جاز دا كلام يا سكراب وين الجاز وين البنزين ما تقول دى ما شقلى البد لحدى ما تتوفر المحروقات

خدمة للإخوة الراغبين في تحسين حالة مركباتهم اعيد تنظيم هذه الشروط لبسيطها حتى يستفيد منها من له رغبة في استيراد كابينة وصندوق لعربة والله الموفق :
ضوابط وقواعد استيراد كبائن (غمارات) العربات والشاحنات
الشروط الفنية من هيئة المواصفات والمقاييس
1 ? يقصد بالكابينة الحيز او الجزء من المركية الذي يشغله السائق والركاب
2 – يتم فحص الكابينة في ميناء الوصول لمطابقة المواصفات والمستندات قبل السماح بفسحها للتركيب
3 – يتم استلام اصل تصديق الاستيراد الذي يستخدم لمرة واحدة فقط ويتم إلغائه بعد ذلك .
4 ? يجب ان تكون الكابية منفصلة عن هيكل العربة (الشاسي) وغير مدمجة معه (( يعني ما تمشي تخم ليك بكسي بدون مكنه ودفرنش وكفرات وتقول دي غمارة وصندوق الشاسي بشهد عليك )))
5 ? يسمح باستيراد كابينة مكتملة التجهيز بما في ذلك دوائر الكهرباء والانارة ووسائل التحكم في المركبة مثل دعسات الفرامل وخلافه
6 ? يسمح باستيراد هيكل الكابينة فقط كمنشأة واحدة دون التجهيزات الداخلية
7 ? يسمح باستيراد صندوق خلفي منفصل عن الكابية شرط ان يكون مطابق لنفس موديل الكابينة والعربة المزمع التركيب عليها
8 ? يسمح باستيراد كابينة بغمارة واحدة مفردة او مزدوجة بغمارتين وفق الشروط المنصوص عليها
9 ? يجب ان لا تقل الحالة الفنية لجودة وسلامة الكابينة والصندوق عن 80% من حالتها وهي جديدة ( يمنع استيراد الكبائن التي تعرضت لحادث وتمت اعادة سمكرتها )
شروط الاستيراد
1-تقديم صورة من تقرير مهندس المرور (( انا فهمت من هذه الفقرة انها تعني تقرير عن حالة العربة التي يرغب المالك في استيراد كابينة لها لأنه لا يوجد تفسير منطقي غير ذلك ))
2?الحصول على تصديق استيراد من وزارة التجارة
3?تقديم صورة من تقرير مهندس المسح والتسويات المعتمد من الهيئة العامة للرقابة على التأمين (( يمكن يكون نفس الشيء تقرير عن العربة اللحق امات طه ))
4 تقديم صورة من تقرير لجنة الفحص الميداني للسيارات والمواتر بالهيئة
5 ? يجب فحص المركبة بعد تركيب الكابينة الجديدة عليها بواسطة لجنة الفحص الميداني بالهيئة (الفحص الفني )
6 ? يجب الحصول على موافقة كتابية من الهيئة على سلامة تركيب الكابينة التى تم استيرادها وذلك بالتنسيق مع الإدارة العامة للمرور
7 – يتكفل صاحب الشأن بجميع تكاليف ومصروفات لجنة الفحص الميداني ورسوم الفحص وفق لائحة رسوم خدمات الهيئة
((وبصراحة ارى فيما يرى النائم لو اشتريت ليك عربية تانية أحسن من كل هذه التعقيدات )) ع القادر مدني

اساسا البلد حالها واقف ومافي حد عنده رغبة يستورد اي شي شوفو ليكم شغلة الظاهر كترة العطالة الانتو فيها بتخليكم تتحفونا بمثل هذه المهازل

يعني ح تمر بجميع تلك المراحل وفي كل المراحل لابد لك من دفع رشوة اوكما يحلو للبعض (تسهيلات) والا لن تحصل علي تصديق واحد حتي لو كانت جديده ميه في المية

يا جماعة الكلام دا مجرد ذر للرماد في العيون والهدف منه أن لا يفهمه إلا القطط السمان المتفقين مع الجماعة النشروه، يعني كلام لا يفهمه إلا التماسيح ناس القطط السمان ويقوموا يستوردوا ما يشاءون من مركبات والمأكلة مشتركة، أما باقي المواطنين الما فهموا أي شئ من الكلام دا، حيقولوا أبعد من الشر وغنى لو وبلاش الدخول فى متاهات.