بدرالدين محمد
القنقريب والعنقريب
والضل جميل
بين الدفو وبين الوفو
كانوا القليل
والزاد شحيح
بس حبل الصبر ما طايله ليل
ما دام في رب
باكر سفننا بترسى
في ظل المقيل
والاِنس جميل
مع زول ذواق
بصطاد الكلمة في صمت الليل
قول يا زول هل زارك رقراق الطيف
صحى خيالك
انا عارفه اكيد زارك بالحيل
وانا وانت قبيل
قلناها سوا
لفجر الصبح في دف الليل
والقنقريب والعنقريب
والضل جميل
والحوش وسيع
ما عنده حد
وجواهو نيل
يا زول تعال
قرب قريب
قول لي قصة
او حتوته حلوة
تصحي جواي الصهيل
يا زول تعال
يا زول حلو يا زول جميل
يا زول منمق في الكلام
يا زول نبيل
