بلا أقنعة
زاهر بخيت الفكي..
قُلنا لا
لا للعناد
ما إنتو لسه كمان جُداد
الطريق بحتاج رفيق
والرحلة تحتاج ليها زاد
ألزموا الصمت النبيل
قالوا لا
لن نُذلَّ ولن نميل
ولن نقيف موقف حياد
أمريكا لميهوا الجداد
اتفرتق السوفيت تزعّزع
خلصت أيام الحِداد
أمريكا جات بنظام جديد
تأمُر وتنهي بلا نديد
قُلنا لا
كيفن نخالف للدُول كيفن نحيد
كيفن نفارق ننزوي ونقيف بعيد
كيفن تخاصِم للخُلوق
وانت دوبك زول جديد
أسمع الرأي السديد
قالوا لا
نحنّ أسياد ما لينا سيد
كيفن نكون للغير عبيد؟
نظامنا ذاتو نظام فريد
قُلنا لا
والقصة بس كانت نشيد
حا نشيِّد نحن بلادنا
حا نفوق العالم أجمع
حا نملأ سلال العالم
يأكُل من خيرنا ويشبع
حا نعمل بُكرة نسوي
زي حشّاش بي دقنو بيزرع
والخاتمة الوطن اتشلّع
وقفت مكنات المصنع
الأرض الكانت عامرة
صبحت بوراً بلقع
لا لحقنا الفات قُبالنا
لا عارفين كيفن حا نرجع
الجريدة
