ياسر زمراوي
اتطوطحت
سيرتك علي تيران الخلا
شافوك اقل من الطريق
خسروا المناجل والرواكيب ملتك
زينتك رماد النظرة في كل هضاريب النغم
يااغلي من نفس الرواحات والبصر
ارتاحوا فيك الا ما ارتاحت حمارة الشوق في عينيك
والدسائس تنفلت من ايدك الاصبع تقيل
من شهقتك وقت المناولة والرحيل
يا شهد عنوان المباصرة في الخلا
اتلموا فيك الاندياح
ساكت نجومك نجضت حزنك ولسة في بلد
لا سكتت اطفال حزاني مع البكا الصباحي
واولاد الطبول الجات تقول
ايقاع فرايحك منكسف
انا ليك بجيك وبعترف
انو مرات بنهمك في عكس عنوانك وابعد من شقاك
وانو مرات بنخسف
وانو مرات حيل غنانا مع المهانة بيبقي زيف
وانو موسيقي الشتار في ها الودار
ايقاعو ما سوداني لا جنوب لا شرق لا شمالو ولا غرب
وانو حبر الشعر جف
انا جد بكيت لمن اشوفك مختلف
طامح كهادي النجمة في قلب السما
ساطع كقمر الحلة في سوق العمي
خليني القاك وافتح الشعر بمسافاتو
والحقك في نص بلادي واعزما
انا يا غرق جيت حازما
عنوان وداري انو كل السيناريوهات اترواحن في ضهب الفريق
وانو البنيات الجميلات امات صفائر من بلدنا
او حتي بنوت البنادر الجابت الحرب التفات الي الاقاليم هندمة
كلهن بحب حبي لي الله ورسوله وموسي وايوب والمسيح
انا قلت بالعربي الفصيح
كل الضفائر والبشائر هودنة
كل الجفون فرح العيون سودنة
كل الخسارات بي قفا
كل المشاعر في غنا
كل المواصلات في الطريق
شائل صمت الساكتين في محزنة
كل اللي قاعدين في الرصيف
بيبعوا بالله وشعاراتم صلاة علي الحبيب سيد المني
انا كل سوداني بحبو صيف واغنيو شتا واضمو في مطر الخريف
شكرا جزيلا ياوطن
رغم المعاناة المزمنة
وجزاك خير للمصلي البدعو تحت الميضنة
وجزاك خير يا الفي كنيستك صوت غنا
وجزاك خير قاسم ابوزيد يا يحي يا قدال يا حميد
يا هاشم المحجوب شريف
يا عاطف الخيري اللطيف
يا جمال سعيد
يا ضحكة في الزمن العنيد
يا اصدقاء
يا مهدي يا فادني
وامنة امين
يا شبلي يا عادل ابراهيم خير
وصلاح سعيد
يا النور يا جيلاني الغنا المليان قصيد
شكرا لكم
يا من احب خلكم
في سفركم في حلكم
في هذه البلد الامان بي نهلكم
في هذه البلد التزيد كل يوم حلاوة بي شغلكم
