نفرة وحيدة..ما بتكفينا يا هارون..!!
ما بتكفينا يا هارون..
ولا بتكـفيـك..
نفرة وحـيدة..
تعدِل بيها حالنا المال..
محال..
محال تكفينا ياهارون..
عايز ليك كم نفــرات..
تعمل بيها..
كم بنيات..
تحتية.. تبقى أساس..
تبنى عليها مشروعات..
فى بلداً جريح مأزوم..
يتألم يئن ممكون..
فى أب كرشولا..
الجرح نوسر..
ملفوف بى رباط بالى..
وفوقوا رباط..
نسأل ربى يحميهوا..
من الهجمة والغارات..
شر الدوشكا والدانات..
ناس (الجبهة) والحركات..
مالوا بلدنا يا هارون..؟
يمكن يكون مسكون. .؟
أكيد مسكون..
فيهوا قبيلة من الجآن..
كل أولاده والشيطان..
كمان معيون..
منك يا بنى الإنسان..
نحل أزمة..
تظهر من جديد أزمات..
نقفل جبهة..
تنفتح جبهات..
نحاور حركة..
تنسلخ حركات..
نصد مجموعة..
تعود من تانى مجموعات..
نفتح صفحة..
تنقفل صفحات..
نفرة وحيدة ما بتكفى..
تحقق بيها انجازات..
قول نفرات..
عشان تكفينا فى حاضرنا..
يا هارون..
تَجُب الفات..
بلا أقنعة..
صحيفة الجريدة السودانية
[email][email protected][/email]
لاشئ سوى العدالة والقصاص يجب الفات ياهارون..
ومابتحلك النفرات ..
وعرق ستات الشاى..
أركز ساى..
وأرجى البجيك قريب..
وكترت البتابت عيب..
وما نسيناها..أكسح ..قشو..
ماتجيبو حى..
وخوفنا إنك تقول أحيّ..
ومابنفع .. الوحَحىّ..
معقول زاهر نبني بلدنا بالنفرات..
وشوبش طهور زمن الجدود وحبوبات..
البلد منهوبة في ماليزيا بنو بيها بنيانات..
في دبي الجاز واحد والجاز تاني وكم جازات..
وحات الله شوبشكم دي ما تفوت بلعة او بلعات..
بلد عدمت التمساح..آها قدلو فيها كم ورلات..
قصيدة غير موفّقة في رجل يحرّض على المسح والكسح والسحل والقتل وقديماً قال الشاعر:
آليت أمدح مقرفاً أبداً يبقى المديح وينفد الرفد.