الخرطوم:الراكوبة
كتب الموسيقار المعروف الشافعي شيخ ادريس علي صفحته بالفيس بوك عن المذيعة الراحلة رتاج الاغا :(اوجعني رحيلها فهي انسانة لم اري صمودا وصبرا في حياتي مثلما رايته في رتاج لابد ان احكيه بعد رحيلها..
اتصل بي من فرنسا الاخ الصديق ايمن سرجلي انو رتاج في القاهرة في رحلة علاج اداني التلفون وانا اعرفها من قبل ماتبقي مذيعة كانت ناشطة في العمل الانساني وبتحب الخير للناس والتقيت بيها كتير في دار العجزة وايام مرض الراحل محمود عبدالعزيز الكانت بتعشقو جدا وحزينة علي مرضو.. اتصلت بيها..مالك يارتاج الف سلامه وحكت لي قصتها وان الفحوصات اظهرت اصابتها بمشاكل في الغدد اللمفاوية وانو حتخضع لعلاج تالمت جدا ولم يقويني الا انو هي بتتكلم بي صبر وقوة وتماسك عجيب ماتحس انو منهارة او خايفة ..اتصلت بالاخت المذيعة لمياء متوكل وهي برضو كان بتتعالج في مصر وتم شفاها وجاءت لمعاودة الطبيب قلت ليها يالمياء رتاج الاغا هنا واظهرت الفحوصات انو في مشاكل في الغدد فااول كلمة قالتها لي لمياء خليها تجي تقعد معانا في البيت وتكون قريبة مني.. وكان القصد انو رتاج تستفيد من تجربة لمياء بالشفاء وتدعمها معنوياً.. لكن رتاج كانت اكبر من خوفنا عليها زولة صامدة وربما الكتير من الناس ماعرفو بقصة المرض الكانت بتعاني منو لانو املها في الحياة كبير ومادايرة الناس تنظر ليها بعين الشفقة.. فظلت متوهجة صاحبة ابتسامة دائمة وامل وقوة ومحبة للناس.. انتصرت علي المرض بفضل الله ثم قوتها وعزيمتها وايمانها بالله وعادت اكثر توهجاً وتمنينا ان تقدم الكثير ولكن ارادة الله تبقي ولا راد لقدره..
اسال الله ان يتغمدها بواسع رحمته وغفرانه واسكنها فسيح جناته يارب وعوض شبابها الجنة.)
