حـــوار وثبـــاني

الوثبان الأول قال للوثبان التاني : – وثبتي اعلي من وثبتك
التاني قال ليهو : منو القاليك .. نعمل لجنة تحكيم من الوثابين القاعدين كوووولهم يوم الوثبةز ديك
الأول رد عليه : كل القاعدين ديل وثباتهم قصيرة وبالتالي ما بينفعوا كمحكمين
التاني : طيب نرجع لي منو
الأول : طالما البلد كلها متوثبة حقو نشوف ناس الصياغة اصحاب فكرة النفرة الكبري – لا لا لا – آسف انا اقصد الوثبة الكبري
الثاني : ياخي ديل وثابين ساكت .. حقو نشوف المستمعين لأنهم عايزين يتوثبوا الي اعلي من المنصة ذاااااتا
الأول : يا خي ديل كان ممكن يثبوا حتي سقف القاعة لكن ؟؟؟؟
التاني : لكن شنو يا متوثب
الاول : لكن ناموا ثم صحو – ثم نامو ثم صحو تاني … لقوا الوثبة في نهايتها
التاني : طيب يعني موضوعنا فشل ؟؟
الاول : موضوع شنو ؟؟
التاني : موضوع التحكيم … منو الوثب اعلي من الآخر
الاول : الله – كتر خيرك ، ذكرتني قصة الوثبة
التاني : معقول نسيت التحدي بيننا بالسرعة دي ؟
الاول : والله ما نسيتو لكن قالوا في وثبة تانية وانا نفسي إنقطع من الوثبة الاولي وشايل هم التانية
التاني : حليلك ، انت ما متابع ، المتوثب الأعظم الظاهر الأيام دي ، نفي الموضوع
الاول : منو النفاهو – ما معقول ياخ ؟؟
التاني : انت متوثب نايم
الأول : المهم هل حيدعوا الناس كووولها تجي تاني للوثبة الأعظم المعادة ؟؟؟
التاني : ياخي انت ما بتفهم ؟ ما قلنا ليك لغووووووها
الاول : خالص خالص ؟؟
التاني : يعني مش خاااالص خاااالص – خالص حبة بس
الاول : يعني ممكن نقول وثباية صغمبوتية ؟؟
التاني : ايوااااااا – بالضبط كده ، لشرح الوثبة الغلبت الناس بي عجائزهم اللي حضروها
الأول : الحمد لله … نفسنا كان قايم لي حسه من يومداك –
التاني : خلاص – بس المرة دي ما حتحتاج لي لبس ترينق واديداس ، يكفي بالعراقي البلدي والسفنجة بس
الأول : ياما إنت كريم يارب

[email][email protected][/email]