من اجلك يا دارفور

من اجلك يا دارفور

الفين مرحب و تحية
يا سلمي يا ارض الخير.
يا الشعبك صافي النية
مضياف و بيقري الغير.
امناًً و سلام يغشاكي
زرعك و الناس و الطير.
تتعافي جروح جواكي
و يرجعلك كل أسير.

دارفور الخير يا واعدة
ناسك صِبحت مُتباعدة.
الظلم سكن في دارك
و شبت نيران متصاعدة.
قتلوا الآلاف من ناسك
و آلامك يوت متزايدة .
زُرقة و عربان قسموكي
خلوكي كُتَل متكايدة.

شَبّت نيران في ديارك
واتحرق الزرع الناضِر.
و اتشتت شعبك عنوة
ما بين نازِح و مُهاجِر.
نساءك صِبحَن ارامِل
و ثكالي تقول يا جابِر.
طُلابِك موت و مهازل
في ظل الحكم الجاير.

اصابوا كرامتك عمداً
في شعبك يا دارفور.
اغتصب الخوّنة نساءك
إمعان في الذُل و الجُور.
و اصابوا كرامتك قصداً
خلوكي خراب و قُبور.
و الموت يوماتي بدارك
و ولدك اصبح مغدور.

دارفور يا عز و تاريخ
هل من عودة و تعمير
و امان و سلام و محبة
و بين اهلك يحصل خير ؟
لو نحنا جميع نتكاتف
و نتكافي شرور الغير.
نهزم تُجار الحرب
و نبنيها برانا نفير.

دينار و ممالك العزة
ما بفتر عزمها يوم
و تاريخها محال ينهزَّ.
نُقَارة كَسُوك و كشوك
مرودوم و زحيح و أبقَزّة.
في الموت والحرب تنادي
و طبولا نحاس تِترَزّة .

ماها الدار المجهولة
تاريخها اساسه متين.
و ممالك ليها رجالها
جميزة و تاج الدين.
مادبو وفرتي و نيرو
كسفورو خليل و سنين.
طرّادة قريب إستشهد
مهراً للثورة و دين .
و النصر حليفِك و فالِك.
نصراً مشهود و مُبين.
و نساءك تحرث و تزرع
و رجالِك تحصد و تقلع
و يرجع تاريخك انصع
و اولادك يملوا العين .

سنوات الحرب لعينة
و سامتنا دمار و نزوح
عِشناها ظُلُم و غبينة
وجروح ساكنات الروح
و رغم الحاصِل و البينا
حالفين نبنيكي صُروح
زرقة و عربان نتكاتف
من اجلك يا يا دارفور
وًنقسم نبنيكي صروح .