شيخ طنون .. (ياخ رجع العربية )..!!
إليكم ……..
شيخ طنون .. (ياخ رجع العربية )..!!
الطاهر ساتي
[email][email protected][/email]
**الأسبوع الفائت، كتبت فيما كتبت، بأن إتحاد عمال السودان – وبتوجيه من وكيل وزارة الصحة المركزية – سحب عربة إسعاف مستشفى الصداقة بأمدرمان، لصالح ما أسموه ب (دعم قطاع غزة)، وكان ذلك في العام (2009)..وأن مستشفى الصداقة، منذ ذاك العام والى يومنا هذا بلا عربة إسعاف، بحيث يتم نقل المرضى والموتى بالبكاسي وغيرها من المركبات.. وبعد ثلاث سنوات من سحب عربة الإسعاف، إكتشفت إدارة مستشفى الصداقة بأن تلك العربة لم تذهب الى قطاع غزة، بل تقبع في فناء مؤسسة تسمى بالمؤسسة الطبية الوطنية، فطالبت إدارة المستشفى القائمين بأمر تلك المؤسسة باسترجاع العربة، وخاصة أن المستشفى بحاجة إليها، بل أكثر حاجة من قطاع غزة..ولكن ردت تلك المؤسسة على إدارة المستشفى برد فحواه : (صاح نحن ما قدرنا نوديها غزة، لكن عندنا النية نوديها الصومال)..وبهذا الرد، رفضت إرجاع العربة الى المستشفى..فناشدت وزارة الصحة وإتحاد العمال وتلك المؤسسة بارجاع العربة الى مستشفى الصداقة، إذ أهل السودان بحاجة الى خدماتها أكثر من أهل فلسطين والصومال وكل المنكوبين في أرجاء الكون..!!
**هكذا ملخص تلك الزاوية التي أزعجت جهات كثيرة، ومنها اتحاد عمال السودان..لقد عقب رئيسه، البروف إبراهيم غندور، قائلا بالنص : ( نعم كنت مع الذين تم تكليفهم لمناصرة أهل غزة في محنتهم الأخيرة، ورأينا دعمهم بما نستطيع، ومنها عربة أو عربات اسعاف، وإتصلت بوكيل وزارة الصحة – الدكتور كمال عبد القادر- طالباً منه مساعدتنا في شراء عربة اسعاف من السوق، ولكنه نصحنا بعدم الشراء قائلاً بالنص : ( مافي داعي تشتروها، نحن عندنا عربية واقفة ساكت في مستشفى الصداقة، امشوا شيلوها)، ثم وجه إدارة المستشفى بتسليمنا للعربة..وبناء على هذا التوجيه، استلمنا العربة وسلمناها لجمعية أنصار الخيرية، باعتبارها الجهة المناط بها جمع التبرعات، وأخلينا مسؤوليتنا كاتحاد عمال عن العربة ولا علم لها بما حدث بعد ذلك، ولدينا من المستندات والوثائق ما تؤكد استلام العربة بتوجيه وكيل وزارة الصحة ثم تسليمها لجمعية أنصار الخيرية .. والعربية المفروض تكون مشت غزة، وصومال دي شنو كمان؟)، أو هكذا كان تعقيب رئيس اتحاد عمال السودان..وللأمانة، جاء التعقيب – ومستنداته ووثائقه – مساء يوم نشر الزاوية، وكان يجب نشر هذا التعقيب في اليوم التالي مباشرة، وإني إعتذر عن هذا التأخير، ولكن ..!!
** قد يسأل اتحاد العمال، وأنت أيضاً أيها القارئ، عن أسباب هذا التأخير..له ولك حق السؤال، والسبب – للأسف – هو رد فعل وزارة الصحة بولاية الخرطوم.. إذ إتصل الناطق الرسمي باسم الوزارة – الدكتور معز حسن بخيت – شاكراً ثم ملتزماً بإرجاع العربة الى مستشفى الصداقة خلال أسبوع، فشكرته وانتظرت الموعد بلسان حال قائل: ( المهم العربية ترجع المستشفى، وبعد ترجع نشكر وزارة الصحة وننشر توضيح اتحاد العمال، ونقفل الملف ده)، وهذا خير من اللت والعجن في دولة اللامحاسبة واللامسؤولية.. ولكن – للأسف أيضاً- مضى الأسبوع، ثم أياماً من الأسبوع الثاني، ولم تلتزم وزارة الصحة بوعدها، فالعربة لاتزال بطرف جمعية أنصار الخيرية، حسب الوثائق والمستندات التي تحمل توقيع (محمد حسن طنون/ الأمين العام لجمعية أنصار الخيرية ..أي لم يستفد منها أهل غزة ولا أهل الصومال ولا أهل السودان الذين يحملون مرضاهم وموتاهم بالبكاسي والكارو والركشات..ولا ادري لماذا؟، والى متى؟، ولمصلحة من؟، تخزنها جمعية طنون الخيرية ؟..تلك عربة اسعاف عامة، وتم سحبها من مرفق صحي عام، رغم أنف حاجة عامة الناس الى خدماتها، ولم تذهب الى غزة ولا الى الصومال، فلماذا تحرم تلك العامة من حق عام يا شيخ طنون؟..على كل حال، لم يعد اتحاد العمال مسؤولا عن تلك العربة حسب تعقيبه، ولم يعد المتحدث باسم وزارة الصحة ملتزماً بوعده، وعليه نناشد الشيخ محمد حسن طنون / الأمين العام لجمعية أنصار الخيرية، بخطاب فحواه : ( الله يرضى عليك، رجع الإسعاف دي للمستشفى)..رجعها ياخ، ثم ارشدنا – هداك الله وإيانا – الى أمكنة تبيع قلوب الذئاب لنستبدلها بقلوبنا، بحيث لا نحس بأوجاع الناس و أزمات البلد..!!
شيخ دا إسمو و الا لقب …؟
هذه ارض تصدع وجهها من وطئة اقدام المجرمين عليها
عييييييك يا طاهر
إنتا لسع مصدق الإسعاف ده موجود..هههه..تلاقى الإسعاف ده يكون ماشى فى خط مواصلات حارة من حارات أم درمان بعد ما إتركبت ليهو مقاعد وإترخص كمان..
زمن الجاهلية بتاعتنا كنا بنردد أغنية (يالفنظاز طاظ طراظ قدوا البرميل عملوهوا باص) ويمكن بدل البرميل تخت إسعاف
وطاااال إنتظارك…يازوووول..ديل ناس ختررررييين على رأى ساخر سبيل
والله الواحد يستغرب لمن يسمع سوداني يقول دعم غزة او فلسطين واولو القربى اولى بالمعروف
ان الرفاهية التي يعيشها الفلسطيني يضاهي افضل المستوبات المعيشية الفلسطينيون يبحثون عن الرفاهية ونحن نبحث عن الماء .
هي لله … كل شيئ لله يا….. أهل اللاه
ما دا الشيخ ” طنون ” واللا ” طرور ” مش عارف.
الله يجيب لينا ماركسي عادل يزين لينا راس طنون والأخطبوطيين المعاهو .
ما ياهم الفقرا العاملين فيها أهل اللاهي ولقوا الميري .
الدكتور كمال عبد القادر الواحد دا صاحب الكلمات امانة ما كنا مغشوشين فيك وكت بتعرف تتفاصح بالله وضح لينا عملت كدا ليه اكيد بتمر علي الراكوبة محنتونا عديييييل كدا
اولا ول معلوماتكم يأهلني السودانيين، المستشفيات ألفي غزة مجهزة بأفضل ما يكون من المعتقدات والأجهزة الطبية مئة مره من المستشفيات ألفي الخرطوم. وو ثانيا نرجو التوضيح من د كنور كمال عيد القادر علي اي اساس امر بإعطاء عربة الإسعاف بدون التحقق من حاجة المستشفي لها ؟
اخوي الطاهر ما هذا الهذيان ،العربية وطحنون ،اصح يا الطاهر الطاهر
وكما قال الفيلسوف كارل ماركن .. اذا اردت ان تكون تافها فما عليك الا ان تدير ضهرك
لهموم الآخرين .. وما اكثر تفاهات الانقاذيين امثال طنون . تطن فيك بعوضة تدخل عن طريق اضانك
تستقر فى نافوخك تمرق بواسطة عمليه .. صنف غريب من البشر
ماذا نقول بعد قولك اخي الطاهر رجعوا العربيه وخليكم من عزه وحتي انت ياشيخ طنون معقول بس ياجماعه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
طنون دا ياهو إمام الجامع والا طنوناً تاني؟
ويحدثونك عن الاوبة والتوبة الي الله ؟؟؟ وعجبي
طنين طنون…….طنيييييييييييييين طنوووووووووووون ……..
اكيد من عام 2009م تكون العربية بقت هيكل ساكت من غير مكنة ومن غير لساتك يمكن شيخ طنون في زول واعدو يجيب ليهو مكنة بدل الانشالت عشان يرجعها بي رجليها للمستشفى وماممكن اسعاف يجيبوا ليهو اسعاف عشان يوديهو
شيخ طنون .. (ياخ رجع العربية )..!!
فلس طين اولها فلس واخرها طين
طنون وما أدراك ما طنون هذا إحدى قلاع التخلف في السودان . لا يستطيع حتى عبد الحي و عبد الكريم ومستشار التأصيل مجتمعين منافسته ده طنون و الأجر على الله
الجماعة ديل دى طبيعتم ينصحوك بالدين بيجاى و يسرقو منك (برضو بالدين) بيجاى و الغيبة انهم ما بخجلو كلو كلو و صحى الاختشو ماتو ..
طنون وسخون اتفه العلماء في زمن الارتزاق
ياهو طنون ذاتو البكى مفاوضهم بتاع نيفاشا اعمل حسابك بكرة بجرسك ونقعد نقشقش ليك دميعاتك. الغريبة الراجل المتشدد ده درس في الاتحاد السوفيتي كيف ماعارف. على فكرة انا حضرت ليه قبل كده جمعة في عز الوحدة بعد نيفاشا.. خطبته ماخلى فيها أي فرصة لسبل التعايش السلمي بين المسلم وغير المسلم ثم ماعرج على “دول الاستكبار” (طبعا ماعدا الصين!)..عموما الهبناقات ديل زي متفقين تماما انو نحن لازم في الظاهر نكون ألف حمرة لدول الاستكبار عشان هي تذلنا بين دول العالم وفي الخفاء يبوسوا الايدي عشان يفضلوا يحكمونا.
كوووووووووووووز
و طنون زاتو كوووووووووووووووووووز
…اعمل ليك كسرة ثابتة للعربية زى حقت صاحبك جبرا , لانو انا شايف وحاسى إنو الحكاية حا تجر وكدة..!!
خلاس بقت علي ارجاع عربة الاسعاف…..
تعرفون جيدا كيف تلهون الشعب الفضل…وتقبضون الثمن..تبا لكم جميعا..
انعي لكم الصحافة والوطن..يلا قوموا……
هسع عليكم النبي ده مش كلام يخجل فواسفي كيف خيم فوقها البؤس رحم الله السودان ورحم الله رجال نقاباته الذين كانوا لايخشون في قولت الحق لومة لائم ويدافعوا عن حقوق الجوعه والفقراء ورحم الله شاعر الوطن والسلام والضعفاء الشاعر الفذ محمد الحسن سلام حميد
طنون الأبن وارث كرسي عالم السلطان من والده (عليه الرحمة حي أوميت ) فلقد كان أول عالم سلطان عرفه السلطان في فترة حكم الفريق عبود !!!!! القصة في الجينات لذا ف ناس طلع جديد أمثال عبد الحي وسمصنق مش ح يقدرو يحنكو معاهو!!!!! رجع الإسعــــــــاف …..يرجع فيك قندران فاكي باكم ……!!!!!!
اصلا غندور طلب اسعاف من وزارة الصحه لي شنو ما يمشي يشتري هي وزارة الصحه ماقادره تشتري شاش للناس
بالتاكيد السيارة تم تاجيرها مئات المرات بالكيلو متر لحمل الجثامين والحالات الحرجة من الولايات والدخل لصالح مين ماتدرى الله المستعان من ناس طنون وجنون
هاهاهاااهههااااااااااااهههههههه ولله الحمدلله خارجنا من ناس ظنون
الأخ الطاهر أصحاب قلوب الذئاب نسوا اليوم الآخر والعذاب والجزاء والجنة والنار دع أخي قلبك في مكانه تعاطف مع المساكين دافع عنهم فعملك هذا أمضى من الحسام المهند عسى الله أن يحشرك في زمرة المساكين يوم القيامة فدعاء الصالحين أن يحشروا يوم القيامة مع زمرة المساكين ولك الله ياوطني
شيخ طنون انت رجعا ليهم وهم ح يقولوا جمعية انصار اهدتنا عربية !! سمح ؟
طنون دا شنو كمان يا ساتى نحن والله غلبنا عدييييل كدة ياربى نسوى شنو غرق نحن نجن نمشى وين ونطير وين يا استاذ طنون عليك النبى اكان ما رجعتا لينا الاسعاف وحات الله محتاجين ليه والله القروش العند ناس غزة انتو ما عندكم دحين يا اخوى رجع العربية للناس المسكينة دى نحن نلقاه من ناس الانقاذ ولا ناس غزة لا غزة فيكم بركة
وغندور ده على كده نضيف ؟
ضميره مرتاح بعد ما عقب ؟
سمعت يابروف- من الله خلقك- إنه في عربات إسعاف فائضة في مستشفى في السودان ؟؟؟؟؟
على الأقل تسأل السوأل البديهي ..
هي أصلا فيها كم إسعاف مستشفى (أم بده) دي لمن يكون فيها واحدة قاعدة ساكت؟؟؟
والله كان دي رعايتك لحقوق العمل ..فارعى بقيدك
..فللعمال رب يرعاهم
ألم ترى كيف فعل ربك باصحاب الفيل
مرة ايام ازمةالفلسطينين العلقو فى سوريا كانت جريدة سودانية تعلن على اول صفحاتها باستعداد السودان باستضافة هؤلا الفلسطينين وكنت اقراء فى هذه الجريدة وكان معى احد اعمامنا بتاعين
(شاطى البحر)فسالنى عن الجريدة قالت شنو فقلت له(السوان يعلن استعداده لاستقبال الفلسطينين العالقين بسوريا)فقال لى والعالقين عندو سو ليهم شنو؟؟؟؟؟
0
ياغندور ياحيوان :
بدل ما تتبرع لقطاع غزة ياحرامي ماكان تتبرع لعمال السودان
أنت كما تقول عن نفسك دكتور أو بروف مادخلك بعمال السودان
أنت صاحب أكبر جريمة في تاريخ السودان منذ حضور الإنقاذ لقد دمرت العمل النقابي
أنظر دائما في التلفزيون كلما ظهر جنابك فيه أنت كأمثالك الجبهجية تلميع وكريمان وشعر
مصبوغ حتى العمة نازلة زي عرف الديك أنتم لستم رجال ولكنكم كما قال الإمام علي بن أبي
طالب عندما وصف من تخلوا عنه من الخارج أنتم أشباه رجال
احيك والله ياساتى,البروف المعز هو ماكوز لكن دخل الوزارة وبقى بيضبح فى القلابة.يااهلنا ناس غزة والله عايشين احسن منناعندهمصرف صحى مستشفيات ومراكزطبية متخصصة باجهزة حديثة,انحناالباعوض مطلع عيناوحزب الزبالة الماوطنى عدمنا من الحياة
يا استاذ الطاهر يا راجل ياطيب ، قبل ما دكتور معز حسن بخيت شقيق صاحبك كمال ..يرجع الاسعاف ..أسأله عن المليون دولار التي قبضها كعمولة نظير بيعه الفلل الرئاسية / وبتكليف من أمير المؤمنين عنر البشير شخصيا..
وبرضو أنت يا الطاهر بتسأل عن سيارة اسعاف؟
بالله ياطنون رجع العربية
هو انت شحد وبتشحد
ياجماعة البترول طار خلاصبلاش
افيقوا نحن ارهقنا المجتمع الدولي واشقائنا العرب بالاغاثات والاعانات
ياطنون بالله رجع العربية بسرعه وبلاش حركات
سيبك من غزة ديل والله وضعهم احسن منك
طالع صورة للشارع الفلسطيني وقارنها بصورة للشارع السوداني
بالله مين فينا يستحق الاعانة
اتقي الله ياطنون ورجع العربية
حسبي الله و نعم الوكيل
والله السودان انتهى !!!!!
دكتور كمال عبد القادر اكبر حرامى مر على وزارة الصحه لعنة الله عليه