صـــوِّر يــا زول …
بسم الله الرحمن الرحيم
صوِّر يا زول
ما اهمك زول
صوِّر احساس اللهفة الفيك ومعاي
والشوق السامق طُول
صوِّر أنغام جواي بتغني
أحلام الزمن الرَّوح فات
والشفق البصبَّح بيك يومات
صوِّر وأملاني حنين
من بينات البعد البوري الفي عينيك
ومن بينات رقراق القلب الخوفو عليك
ومن جوات ومضات النظر المنك وليك
مُزون الغيث الفيك حاحاها الضو الشبًّا
يا طلْع الغصن العبًّا
صوِّر يا زول وخلي الصورة تقدل جواك
صوِّر ما تخلي الحبة
الصورة محبة
عينيك فالدالية
عيني فالساقية
منك بتدور وتاني تجيك
نفًّاج الروح
والحس الدافي شايلاها قوافي
والنور الشع جواي يقين
بكتب أحلامك
وأنا مبهور .. مبهور بي الصورة
الواقفة شموخ
صوِّر يا زول اللحظة فريدة
ما اهمك زول
صوِّر تنهيدة
مسجونة قصيدة
والحس الخافي سايقاهو مرايا
جواك بتعاين
مسارات الضو المنك شعت
بتضوي مداين
وإحساس مزيون
مسكون بي الصورة
صوِّر يا زول
وخلي الذكرى أبعادها معاك
وسِّدها حنينك ..
وأدِّيها يقينك …
ممكن تشجيك !
عروة علي موسى ،،،
الي عروة
حمض يازول
حمض احساس الزمن المات
جواك جواي
ولي غصن الشدر الواقع مكسور الخاطر
وانغامو المات فيها النغم الهداي
حمض احلامنا التاهت
وانفاس الفجر الصبحت هبباي
حمض لي حنيني الكلو انين
وعينيك الميت فيها الشوق
اكلو التنين
والقلب المسكون بالاهة
والنظرة الساهمة وضالة
والمطر البفتح الف جرح
في البيت والروح
يا جالس تحت الغصن الميت
حمض
واطبع للصورة
قبال تتفجر تحرق للباقي الجواك
ماغير الهم مافي الصورة الحبة
ياحليل الزمن الكانت فيهو الصورة تشع
افراح ومحبة
حمض
حمض
واطبع
صورة هذا الزمن الحامض
الصورة الساكنه في جواك
صورة زولاً مغلوب الحال
وطن الناس الساكنه حداك
صورة سيل مُدافع جاري
شايل جواهُ…. هلاك
صورة ناس غرقانه…
في السيل العارم
صورة زول بيئن
وقلبو يئن
وحالو يئن وتبقى الذكرى
الباقية صورة جزينه..
ساكنه سنين بس جواك
الله عليك ياعروة علي موسى كلام موزون في الصميم .