الهادي ودالبورت
شكله وقع الفاس في الرأس .. معظم الناس حاليا البعرفهم في سوق الشحن طالبين أسعار على ميناء السخنة.. والبجرب السخنة استحالة يرجع لينا.
– دي خسارة عوائد ميناء شهرية 40 ألف حاوية في 500 يورو تقريبا يعني 20 مليون يورو لهيئة المواني البتشتري لينا فيرنس وحق الكهرباء ومقدر أنها ترتفع مع تحسن الأقتصاد.
– خسارة اصحاب الناقلات لأنه الشاحنات عندنا ما بدخلوها المصرين بنشحن عبر شاحنات مصرية ودي خسارة مجمعة ما اقل من من 50 مليون دولار شهريا كانت بتمشي لقطاع الشاحنات البدفعوا ضرائب ومصاريف، واسبيرات وبخلقوا آلاف الوظائف غير المباشرة.
– خساراة آلاف الوظائف المباشرة مخلصين و كشافين وعدادين وعمال يومية وكمسنجنية ومرحلين ورشوشات وبتاعين نقل محلي شفت داما داما … الخ
– خسارة عشرات الآلاف من الوظائف غير المباشرة من ست الشاي والأكل في بوابة الجنوبية لحدي بتاع الليمون في الملجة وبتاعين السلات في ديم عرب والعندو مطعم أو عارض بطيخ في كلانييب
– يلا الفوق ده كلو تضربو في 2 لأنو بورتسودان حا تخسر الباك لود (backload) الحاويات الراجعة بالصادر وده كلات ومرحلين نقل محلي و عمال و ولواري جمعية وعمال مخازن .. الخ
– لا عسكر لا سيد أبو آمنة ولا اوبشار ولا أي زول داعمهم من مجلس البجا ما فارقة معاهم لو الناس في بورتسودان أكلت حصحاص، نحن الحا نشيل الشيلة ربحتوا وللا خسرتوا في معركتكم مع الحكومة ..يا ريت الناس تسمع الاصوات العاقلة.
تطورات قضية الشرق بعد دخلنا الأسبوع الرابع
– في تهديد من غرفة النقل (الشاحنات ) ببتريس الشوارع الداخلية في بوتسودان لحدي كلانييب بأعتبارهم الأكثر تضرراً مما حصل
– بناء على أتصالات مع بعض الوكلاء .. الخطوط الوقفت من شحن الحاويات لبورتسودان حتى الآن ، هبق لويد ، باسيفك ، ميرسك ، MSC بكرة نعرف البقية .
– بعض البواخر غادرت الغاطس لأنو مصاريف الانتظار (الدمرج) عالية
– في وكلاء اتصرفوا حولوا البواخر وفرغوها في الميناء الشمالي بالذات البواخر الصغيرة البتجي من جدة، طبعا ما قفلوا الميناء الشمالي ميناء السائب حتى لا تتضرر عمال الكلات
– في تكدس شديد في جدة وما في باحرة بتجازف تشحن
الناظر ترك اليوم قال ” قي حالة اتصل عليه البرهان سيفتح لأنو واثق من حل البرهان” واضح القضية بلفها عند البرهان.. ده مالم يعدلو كلامو سيد أبو آمنة أو عبد الله أوبشار خلال الساعات الجاية
…
تقديراتي الناظر ترك مضغوط من العناصر المتشددة الماشة في أتجاه التصعيد ، لأنهم بشوفو العودة من منتصف الطريق صعبة ، بالمناسبة ده كان ألتزامو معاهم في الأول نقفل لحدي ما يحلوها
تحديدا كان في لقاءه بالشباب في حي الوحدة ، لانو في مرات سابقة قفلوا وفتحو بلا حل
…
القضية سياسية أتسببو فيها في المقام الأول مجلس السيادة مدنيين على عسكرين ثم الحركات المسلحة و هم الفتحو مسارات جوبا دي وهسه عاملين رايحين طالما تجويع الناس بيضغط الحكومة ، مسؤولية الحكومة بدرجة أقل منهم الأتنين
…
الحل ينبغي أن يكون لا غالب ولا مغلوب ، الحكومة تتقدم خطوة وتبطل النظرة من أعلى أو حكاية تتفضلوا عليهم لأنكم عارفين قصيتهم ، ومجلس البجا ينحي جانباً العنصريين والمتطرفيين ، في المجلس والمهتمين بالقضية ما هم افضل من البولعوا النار في الأعلام ديل
…
الأسواء من الأغلاق ، هو الفتح تقديراً لوساطة فلان أو عشان خاطر عيون فلان ، لأنو كده بيظل التهديد قائم بيأثر على الميناء والتجارة ، تتقفل كده لحدي ما يجيء حل نهائي أيا كان الحل بحيث بعده تاني ما يفكر في الاغلاق
..
الناس تساعد في بوستاتها وتعليقاتها تبعد عن التنمر و العنصرية والتنميط المخل بالجهل والغباء والفقر ، العناصر الفي مجلس البجا دي حساسة جداً وما سياسيين زاتو بتاثرو بالإعلام ، حا يركبو رأس كده لحدي ما تحصل مع المواجهة وأغلب الظن المواجهة حا تكون بين مواطنين في ظل قوة أمنية عاملة رايحة
بعد شوية عمال المينا من أهل الشرق هم اللي حيفتحو الطريق بالقوة
ربنا يهون الأمور ، والنفوس تبقى طيبة ..
الحل بسيط وهو الغاء ما يسمى اتفاقية جوبا واعادة أوضاع السودان لعام ١٩١٦ ويعني فصل اقليم دارفور عن السودان واعادته لسلطنة دارفور وبهذا نرتاح من ككوكي مناوي وجبريل مين ومعاهم حميدتي ولن نخسر أي ش
شيء. لا مانع من من فصل جبال النوبة اذا اراد اهله الانفصال. قرار عايز شجاعة من ناس شمال السودان (الجلابة)
لا أعتقد بأن تحل قضية الشرق بهذا الأسلوب تجويع الكل مقابل رضوخ المكون المدني لتمرير أجندة خارجية ليس لها علاقة باي حال من الأحوال لتنمية وتطور انسان الشرق لابد من وضوح الرؤية من الجميع وان نضع مصلحة انسان السودان في اي بقعة من ارضنا المعطا لطعم السلام والامن والرخاء ونبز الهوية والعنصرية الهدامة فهل منكم رجل رشيد
اذا كنت من الشرق اكيد مابتهدد البجا لعلمك مافي زول بجي بفتح الترس ده
ده سنن كونية الكل محتاج لبعضه ترك مفتكر انو ما بحتاج ومافارقه معه بالمناسبه هو متضرر انا من راي يخلوهو كده عشان اهل الشرق يعرفو انو الوحدة مطلوبه لانو السودانيين بالذات ما بتعلمو الا بالتجربة زي انفصال الجنوب اي طرف قال هو المستفيد لكن الاثنين ضقنا الحنظل
والحكومه بشقيها عاملين نايمين.. دعوات الحياري ستصيبهم في مقتل.
المكون العسكري عامل نايم..وهو السبب في الخرمجة والجوطة…حميدتي وكباشي اخترعوا المسارات شغالين تجميع للنظار والعمد..الحكومي مين فوضو.. هجو مين فوضو.. وكيف يقبل العسكر لأنفسهم حصار الشعب..والجنود البسطاء ..لأنهم عايشين مع الشعب ويتضررون معه..عشان الجنرالات دايرين الحكم….والشعب اقوى ..والله غالب .
كاتب المقال عميل مصري
ترك مرق
بجا حديد