قصيدة “مونولوج “

مونولوج

…….

منعول أبو القرش التدفق شانو موية عزتك
تنذل
إنت العشت طول عمرك نخيل
منعول أبو القرش البعفر جبهتك
إلتف حول الجيد حبل
قاسى و طويل
منعول ابو الرملة السكون
ما عانقت حباتا ..خيل !!!
……..
ستف حقايبك
يا خلى الجيب
فارق و ارتحل
ستف حقايبك ما خلاص
حزنك تعب
من التسكع في متاهات الرحيل
يا من رضعت من الجبال
من الشمش
قوماك امش
أرجع ديارك يا مرصع بى المواويل القبيل
و اغسل همومك
فى بلد شقاها نيل
” توتى” التلالى كما الدهب
و الهمبريب ” صايغ” هناك ساعة الأصيل
و المح مراكب زى مواكب
خاطة فى الموج الجميل
إنو العمر
ومضة و ضلام
وقعة و قيام
ونهار و ليل
سافر إلى حيث الذين تحبهم
سافر
شنو الجابرك على المدن العويل ؟
و افتل حبال صبرك خيام
بيتا بدفيك فى بلد
تعرف تمام معنى الصباح
يا أيها المسكون جراح
يا حاملا بين الضلوع طعم البشاير و الصباح
صليلك ? اسرع – ركعتين
تبروقتك الدمعة النزيف
و كما عواميد الكهارب فى ضلام ليلا تقيف
خليك واقف
لا حقايب فى الرصيف
لكن نخيل امتد فى وش السما
شامخ ..عفيف
…..

مهدى يوسف
[email][email protected][/email]