رائعة الاستاذة بت بلول…..قلنا أرحل
نحنا لمن قلنا أرحل ..
كان قصِدنا … انو ترحل ..
مش تبدل في الكراسي … والطرابيز الدواير ..
والترﻻت البتاكل … في ضهرنا وﻻ بتخجل ..
أرحل .. أرحل ..
يعني شتت ..
يعني فارق ..
غوور في ستين الف جردل ..
ما بيفرق لو تغيير انت نافع ..
او تخت في بدلو شافع ..
وﻻ مجنون ﻻفي حايم في الشوارع ..
او مُسطًل ..
نحنا دايرين ..
زول زراعة .. يعرف الواطة البتنتج ..
يعرف المحصول ونوعو ..
والبذور الما بتفشل ..
نحنا دايرين …
زول تمرجي ..
يعرف المرض المُوطًن ..
لينا يكشف كل علة ..
ماهو بس دكتور ويصهل ..
نحنا دايرين ..
زول مدرس ..
يمسك الطبشيرة يشرح ..
تمرق المعلومة منو …
لي اقاصي بﻼدنا توصل ..
نحنا دايرين …
زول مهندس …. يفهم المكن المعصلج ..
يركب الترحيل جماعي ..
يلبس اﻻبرول ويسهر …
يلحق الفي الريف مُعطًل ..
نحن دايرين ..
زول حقوقي … قاضي يحكم بالتساوي ..
يستمد منهج قضاهو … من شريعة رب أعدل
نحن ماااااا دايرين كراسي …
ﻻ ﻻ ما دايرين مناصب …
نحنا دايرين بس بلدنا …. تبقي لينا ..
ونبقي فيها … ونبقي ليها …
وهل تصدق .. شان دا يحصل ..
ﻻزم ابدا …. كلو كلو … انت ترحل ..
رائعة
افخر بالانتماء لوطن يضم مثل هذه الشاعره ابداع ما بعده ابداع والتحيه للمنبر
برضو ثاني شريعة والله اصبحت عندنا حساسية مصطلح ياخي