نسأل منو تانى؟ا
ساخر سبيل
نسأل منو تانى؟
الفاتح يوسف جبرا
بتاريخ 24 يناير الماضى أى قبل «138» يوماً من الآن قمت بكتابة هذا المقال على هذه الزاوية وقد كان بعنوان (بدون أورنيك ذاااتو) وقد جاء فيه:
إن هذا المقال هو (شكل تانى) من أشكال التجاوزات والخروقات فهو يتحدث عن (خرق جماعى للقانون) تمارسه الشرطة حارسة القانون (عينى عينك) الشئ الذى سوف يجعل مهمة (المكتب الصحفى) لقوات الشرطة مهمة عسيرة فى الرد عليه أو إيجاد (مخرج) لتبريره وإليكم القصة :
توجه ولدنا (عبدو) إلى أحد مراكز السجل المدنى لإستخراج شهادة (بدل قيد) إذ يعتزم إستخراج شهادة تسنين للتقديم بها إلى وظيفة بعد أن جلس على (دكة العطالة) لسنوات طوال منذ تخرجه ، لاحظ (عبدو) وهو لا يزال فى الصف ينتظر دفع الرسوم (المكتوبة على الإيصال) والبالغ قدرها (عشرون جنيهاً) أن (الناس بتدفع) ثلاثين جنيهاً ، عند وصوله إلى مكان الدفع (يقول ابننا عبدو) لم يكن معه غير (خمسة وعشرين جنيهاً) آثر أن يعطيها (لجنابو) حتى لا (يتجرجر) و(يدخل فى كلام) هو فى غنى عنه وهو يعلم أن الرسوم هى عشرون فقط- لكن (جنابو) أمسك بالخمسة وعشرين جنيها ووجه حديثه إليه قائلاً :
الإيصال بى تلاتين!
لكن أنا ما عندى غير الخمسة وعشرين دى..
(فى إزدراء) : إنتا قايلنا دكان وإلا بقالة؟
خلاس أكتب ليا فى الإيصال ده (تلاتين) عشان أديك التلاتين..
عندما أحس (جنابو) بأن (عبدو زول حقانى) طلب منه الدخول (لى جوة) حيث أفهموه بأن (العشرة جنيهات الزيادة) دى تعتبر (دعم) ولابد من دفعها كما درج بقية المواطنين على دفعها (بالتى هى أحسن) وأحسن ليهو يدفعا (وما يعمل فيها تفتيحة) عشان أمورو تمشى وكده!!
يقول لى ابننا (عبدو) بأنه قد عاد إلى منزله دون أن يقوم (بإستخراج الشهادة) وقام فور وصوله بالإتصال بأحد أقربائه الذين يعملون (بديوان المراجع العام) ليسأله حول (قانونية) هذا الأمر إلا أن قريبه قد أصابه بنوبة من الإحباط إذ أخبره بأن (الموضوع عااادى) وإنو معروف لديهم باسم (الدعومات) ويتم (تعاطيه) فى معظم (إن لم يكن كل) مراكز (السجل المدنى)!!
عزيزى القارئ:
أذا كنا نعلم بأن أى رسوم تدفع بدون أورنيك (أو أيصال) غير أورنيك (15) الذى هو ايصال مالي لتحصيل واردات الدولة تعتبر رسوماً غير قانونية وتندرج في قائمة المخالفات المالية فماذا نسمى هذه (القروش) التى يقوم بدفعها المواطن (دون أى أيصال) أو مستند؟؟ وإن كنا نعول على (الشرطة) أن تحمى المواطن من أى (جبايات) غير قانونية (معقول) تقوم (الشرطة ذااااتا) بهذا التحصيل غير القانونى لهذه الأموال التى من الواضح أنها لا تورد في خزينة الدولة (ح تورد كيف و إزاى يعنى؟ وبواسطة ياتو مستندات؟)..
بالطبع ننتظر رد الإخوة فى (المكتبي الصحفى) لقوات الشرطة الذى نأمل أن يحمل إجابة لإستفسارات (ولدنا عبدو) حول قانونية (هذا المبلغ خارج الإيصال) والإستفسار الأهم وهو كيف وإلى أين تذهب الحصيلة؟ كما ننتظر رداً من مكتب الأخ السيد (د. عوض الجاز) وزير المالية الذى ما فتئ يكرر عن ولاية وزارته على (المال العام) وأن تحصيل أى مبالغ خارج (أورنيك 15) هو تحصيل غير قانونى يجب أن تبلغ عنه الشرطة … أهو ده تحصيل بدون (أورنيك ذاااتو) ومن (الشرطة ذااااتا) !
كسرة:
أنا قلتا لى ولدنا (عبدو) إنتا لمن أديت جنابو (الخمسة وعشرين) وقال ليكا (إنتا قايلا دكان وإلا بقالة ) كان تقول ليهو والله أحسن (البقالة) لأنو على الأقل الزول بيعرف قروشو (بتمشى وين) !!
إنتهى المقال (بى كسرتو) وسرعان بعد نشر المقال أن إتصل بى الأخ المقدم (محمد زين) من قوات الشرطة طالباً (الدليل) فبعثت له ببطل القصة والشاهد العيان (ولدنا عبدو) الذى تم التحرى معه وذكرلهم كل صغيرة وكبيرة تتعلق بصحة الأمر فعاد الأخ المقدم للإتصال بى موضحاً بأن هنالك تحقيقاً سوف يجرى فى المسألة وسوف يتم إخطارى بما يسفر عنه.. وظللت أنتظر مدنا بنتيجة التحقيق .. ومضى حتى الآن «138» يوماً منذ إثارتنا للموضوع ولم يقم الإخوة فى (المكتب الصحفى) لقوات الشرطة بالرد أوالإجابة على إستفسارات (ولدنا عبدو) حول قانونية (هذا المبلغ خارج الإيصال) وكيف وإلى أين يذهب؟ .. والأدهى والأمر والعجيب والغريب فى الموضوع عزيزى القارئ (وهذا هو سبب إعادة المقال) أن ولدنا عبدو ذهب (أول أمبارح) لإجراء نفس المعاملة ووجد الحال ياهو نفس الحال (تديهم تلاتين ويسلموك إيصال بى عشرين)!!
كسرة:
أها يا جماعة الخير باقى ليكم نسأل منو بعد ده تانى … عندكم أى إقتراحات؟
الرأي العام
انت مالك مستعجل كدا (ومنتظر 138 يوم بس) ياخى الرد بجيك (بعد 138سنه) ومافى داعى للشفقه(الصبر طيب) وكان تخلى عبدو (ولدكم) ينتظر الرد بدل مايخسر قروشوو ساااااى
امشي اشتكي للحكومه الثانيه الامم المتحده
البلد فيها عدد من الحكومات يمكن تعرف العشره الثانيه مشت وين؟
احب اشيد بالمقال وبي همة الكاتب في طرح مشاكل الوطن العظيم وإن كترت مشاكلو يظل وطنا حبيبنا رغم البين ورغم البيه
لكن انا من الناس اللو مشيت الشهاده دي حأدفع وانا ساكت لانو في النهايه مافي حل زي ماحصل لي اخونا
لانو المشاكل الزي دي من شدة ما كترت بقت حاجه طبيعيه وأصبحت مواجهنه عوامه ضد التيار نتمنى ان يوجد حل للمشاكل دي ولو على المدى البعيد
نحن من يوم 30يونيو والله منتظرين نعرف الحقيقة اسع لينا كده حوالى 21سنة وقول الى عبدو ده بقى ليك حوالى عشرين سنىة ونصف وماتستعجل انت لاحق شنو ماتصبر وادفع ساكت والزيكم ده ياعبدو هو المبوظ لينا مشروعنا الحضارى وال40مليون ديل كلهم بدفعو ساكتين بس انت عشان قريب جبرة يخلوك اسع لوكنت قريب كوز سمين وشبعان ودقنه ضلالية والله كان ورقك جاءك فى بيتك لو جئت سنة الفين واربعين برضو بتدفع والسبب كلام رئيسنا كلام ذى ونسة السكران زول بشتغل به مافى وياخليل زمن الرئيس صورته تخوف قبل قرارته ومافى اسواء من الراجل المابهش وينش وقاعد صورة
الاخ الفاتح جبرا
بارك الله فيك على هذا الموضوع الجميل … ولكن كل الجهات النظامية التى تتعامل مع الجمهور درجت على هذا التعامل .. عند الجوزات تجد الاورنيك شئ والذى تقوم بدفعه شئ اخر … والخدمة الوطنية فحدث ولا حرج .. ولا اجد فى هؤلاء الذين ياكلون اموال الناس بالباطل الا حد الحرابة لانهم مسلحون اذا لم تدفع لهم لا يعطوك اوراقك والمساعدهم ان الشعب السودانى شعب سازج لا يعرف حقوقه وانا متاكد لو فى زول مشى فى الموضوع للنهاية تانى الهمبتة دى ما حاتتكرر..
والله اشهد ان كل قروش دفعتها فى هذه البلد بدون وجه حق اننى لا اعفو عنها ومسؤل منها رئيس الجمهورية ووزير المالية ..
اللهم انى لا اعفو عن كل مبلغ اخذ منى بدون وجه حق .. اللهم خذه لى من حسنات رئيس الجمهورية ووزير المالية وان لم تكن لهم حسنات فخذ من سياتى وضعها لهم.
بارك الله فيك وفى شجاعتك هذه ياجبرا ونتمنى المواصلة حتى النهاية …
البلد فى مصيبة كبيرة واسوأ مافيها هو حاميها والبشير راجل دلوكة ماناقش الحبة
وقال بصوم الخميس والاتنين .. اها ياجماعة الخير نسال الله فى كل سجود وفى
الشارع وفى المسجد وفى البيت ان يشتت هؤلاء اللصوص الفاسدين المفسدين
ولو لاحظت ياجبرا هؤلاء الاقزام فى ربكة وعدم توازن … اما عبدو لو قال للضابط احسن البقالة .. لخرج ولم يعد حتى كتابة هذا المقال
:D دي رسوم العلاقات البينية
ولله اي مكان فيه حوجة لاوراق من الشرطة بالتحديد لازم تدفع وبدون ايصال, مثلا تصريح الحفلة ما هو المبرر او الخدمة التي تقدمها لك الشرطة حتي تاخذ هذه المبالغ الضخمة. عند الترخيص, شهادة الفقدان, ختم اورنيك النيابة يعني ما بدوهم مرتبات وبياخذها قلع. هو نوع من اخطر انواع الارهاب هو ارهاب الدولة ودول العالم المتقدمة كله بيعرفو لانهم مرو به وجربوه ودرسوه وعرفوا اثاره الضارة اقلهاعدم الثقة في النظام واخرها فقد الحس الوطني. و ما يفتكروا انه غير مرصود عالمياً وهو انتو مصدقين انو تصنيفنا ثالث افسد دولة في العالم هو استهداف من القوي الشيطانية و الماعارفو شنو داك
يا شيخ جبرا انت ما سممعت بى اورنيك تاشيرة الخروج فى ما يسمى بمكتب العاملين بالخارج تدفع 19 جنيها ده غير رسوم التاشيره يعنى قيمة المكسب بس من ورقة الارنيك ده مش اكمل المدينه الرياضيه الواقفه ليها سنين دى بس ابنى 3 مدن زيها يلا اهتف معاى ؟؟؟؟؟؟ الجاز جاب الجاز ؟ الجاز جاب الجاز
الاخ اسامة خليك زول محترم وتكلم عن رئيسك باحترام, ومهما كان الرئيس فهو راس الدولة. انت بهذا الاسلوب لا تسب الرئيس بل بتسب في نفسك .
.. ارجو ان يكون النقد بناء وهادف وننتقد المماراسات الخاطئة مهما كان مصدرها دون المساس بالاشخاص…لان كل البيوت من زجاج…( فقط انظر حولك)…..
دى واحدة من وحدات انت عارف دور الشرطة حماية الجريمة وهناك جرائم عقوبتها الاعدام كالاختطاف مثلا او القتل او الاغتصاب هل تعلم اذا كنت لاقدر الله لك ان تكون ضحية لهذه الجرائم ان تاتى انت بالمتهم من حسابك الخاص العربية حق الفطور واذا تمكنت فى ذلك اليوم من القبض على متهمك تدفع حق الحلاوة وبعدين حق تسريع البلاغ عشان يمشى لوكيل النيابة وبعدين تدفع عشان يمشى للقاضى ده لوماكان المجرم التفتيحة سبقك ودفع ليهم اكثر ووين المتهم افراج مافى ادلة طيب وين يومية التحرى والادلة اللى بتودى فى…اختفت لانو اتعرضت يومية تحرى غير التى تعرفها ولو مامصدق كلامى على كيفك لانى ماممكن اروى ليك حوادث حقيقية حتى لاتعرض اصحابها المجنى عليهم لذل اكثر تقولى شرطة دى شرطة بتعرف تقبض ستات العرقى عشان يصادروه ويبيعوه هم ذاتهم لوعاوز دليل برسلوا ليك
الى المدعو hano
الراعى هو رئيس الجمهورية وهو يعلم بكل شئ ولكن لا نراه الا لما تدق الدلوكة والرقيص يبدأ للاسف الشديد
والله اشهد ان كل قروش دفعتها فى هذه البلد بدون وجه حق اننى لا اعفو عنها ومسؤل منها رئيس الجمهورية ووزير المالية ..
اللهم انى لا اعفو عن كل مبلغ اخذ منى بدون وجه حق .. اللهم خذه لى من حسنات رئيس الجمهورية ووزير المالية وان لم تكن لهم حسنات فخذ من سياتى وضعها لهم
الى المدعو Hano بالله اسال رئيسك المحترم عن عشرة الاف ( عبدو) وين مشت ؟؟!!
والله بعد دا نسأل الله بس يزيل البلاء
انا المحيرني ياجبره البطاقه الاسمها اذن سفر تقريبا رسومها حس بقت كم وتمنين د لمن الواحد كون مسافر يكون طالع من البلد وماانتهى من الخدمه ومكتوب عليا سفره واحده وبشيلوها وانت خاشي المطار كلام عجيب مش