(كدارة) جديدة

زوجتى تشتكى من (صداع نصفى) أو ما يعرف (بالشقيقة) كانت نوبات هذا الصداع تنتابها فيما مضى بين الحين والآخر إلا أنها أخيراً قد زادت شوية مما إضطرنى لسؤال عدد من أصدقائى (الأطباء) الذين أجمع عدد كبير منهم على ضرورة عرضها على الأخصائى (س) الذى برع فى معالجة مثل هذه الحالات.
بصعوبة بالغة إستطعت أن أوقف عربتى أمام (المجمع) الذى به عيادة الدكتور(س) وبصعوبة بالغة أيضاً إستطعت أن أوصل إلى (التربيزة الحديدية البالية) التى يجلس عليها (شاب) يقوم بتسجيل أسماء المرضى والذى نظر إليّ قائلاً بعد أن قام بأخذ البيانات :
– خمسين يا استاذ
فأدخلت يدي في جيبي وقمت بتسليمه الخمسين ألف كما طلب إلا أنه فاجأني قائلاً :
– ده شنو يا أستاذ؟
– دي ما الستين بتاعت الكشف القلتا عليها
– يا استاذ إنتا الظاهر خلطتا الأمور .. ده الرقم بتاعكم يعني دوركم رقم خمسين لكن الكشف بى ميه !
بالطبع كان سؤالى التالى هو عن رقم المريض الموجود داخل غرفة الكشف حيث أخبرنى الشاب بأنه رقم (10) أى أن علينا الإنتظار ريثما يفرغ الدكتور (س) من معاينة ( مريضاً! فكان لابد من الإنتظار ولكن أين ننتظر و(المسرح) مكتمل العدد! مما إضطر بعض المرضى والمرافقين للوقوف!
عدت لسؤال ذلك (الشاب) من جديد :
– هسه يا إبنى التسعة وتلاتين مريض القدامنا ديل ح ينتهوا متين؟
ما بياخدوا كتير يا أستاذ عشان فيهم ناس (مراجعة) ساكت!-
– يعنى ممكن ياخدو زي كم كده؟
– قول زى ساعتين كده
عدت إلى مكانى الذى كنت أقف فيه برفقة زوجتى (المريضة) وأنا أقوم بمحاولة (قسمة) الساعتين (120 دقيقة) على عدد المرضى المتبقين لأجدها (بعد الإستعانة بحاسبة الموبايل) ثلاث دقائق وكم جزء من الثانية! وما أن أخبرت زوجتى بالنتيجة حتى خاطبتنى قائلة :
– والله قالوا ليك الدكتور ده شاطر جنس شطارة الزول قبل ما يفتح خشمو يكون شخّص ليهو حالتو وكتب ليهو الروشتة
هنا فقط عرفت اننى أتمتع بدرجة لا بأس بها من الغباء حيث كنت أعتقد جازماً بأن (الكلفتة) شئ و(الشطارة) شئ تانى إلا أن زوجتنا المصون (شفاها الله) قد أقنعتنى بمقولتها تلك.. فقلت لنفسى والله كلام منطقى يعنى إذا كان (الطبيب) بما أوتى من ذكاء وخبرة يستطيع أن يشخص حالة المريض فى (تلاتة دقائق) ليه (يحتفظ بيهو) عشر دقائق؟
بعد ساعتين تقريباً وبعد أن تجاوزت الساعة (الحادية عشرة ليلاً) جاء دورنا لمقابلة دكتور(س) والذى لدهشتى قد أعطانا من الوقت الكثير الشئ الذى سمح لزوجتى أن تسرد له (تاريخها المرضي) فى إسهاب وبعد أن قام بالكشف عليها قام بكتابة بعض الأدوية والعقاقير لها وخرجنا من (غرفة الكشف) لتزول دهشتى بعد أن وجدت صالة الإنتظار خالية وتأكدت أن زوجتى كانت (آخر المرضى) !
قلت لزوجتى وأنا أجلس على مقود العربة عائدين :
– والله الدكاترة ديل بختهم.. شفتى (النقاطة) دى؟ الولد (ناجى) ده لازم يطلع دكتور!
– دكتور شنو كمان؟انتا ما شفت أنديتنا بقت تسجل اللاعبين بي ملايين الدولارات؟ كدى أغشى السوق قال عاوز ليهو (كدارة) جديدة
كسرة :
والله ما ثورة التأليم دي أحسن ليهو يتمرن إحتمال تظبط معاهو وكده

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟