قصيدة …المشروع الحضاري (4) مأساة الضّو ود جبر الدّار وأخرين

قصيدة حوارية( أم زين .. كلام في الزّمة علي لسان السّرّة بت محمود وحامد ود الطّفّح)
تنويه :-
نشرنا في المرات الماضيّة :-
(1) حكاية العرب العرّابة والزّنج الفي الغابة
(2) فساد الممسوخ شيخ الخلوة
(3) موت حامد ود الطّفح بعربة الجاغوار بأمريكا
وسوف نواصل نشر بقيّة الأجزاء.
قصّة :-
( الواقفون علي صفوف الحلم
تنتظر ارتدادات النّداء ………
إرتداد الصّوت من قاع الخطايا
من قشور الحسّ من خلو الخراب
حين يسافر الصّوت المعذّب في الضّباب
فينثني صخراَ وملحاَ في اللّهاة
قصص بين الضّحايا والجناة )
………………
النّص :-
حكاية أم زين …..
مأساة اجيال
كبار وصغار ،،
الضّو… ود جبر الدّار
عندو التومين
لسّع رضّع
منذر ونذّار ،،،
الله يعينو
حكم الظّالمين
حكموا عليهو
وقطعوا يمينو ،،
المسكين حالو اترمّد
قالوا سرقلو تلات كيلات
من التاجر شيخ أُمحمّد
البلد إتملت أحقاد وحساد ،،
شهدوا عليهو تلاته جماعه
منهم احمد اب دُلّاعه
ود العجمي وخالو وداعه
شقيقو التّاي
تاجر الشّنطه
الكان بناي ،
عِدم الفّلّه
ساب الحِلّه
عشان بت بَلّه
نقضت عهدو
خطبت واحد
من المِلّه ،،،
أولاد الزّين
نسيب التوم ود حاج عبد الله
من الذّلّه
الحلق إنسلّ
شهرين جُلّ
قتاتم شيط
وبليلة حَلًه ،،،
من الشّينه
بت محمود باعت البقرات
سدّت دينا ،،
بت بتّها تُوقل وتقدِل
باريا العربات تطلع وتنزل
خساره الزّول وكتين يرزِل
خساره الزّول وكتين يرزِل

يتبع ..
عوض شيخ إدريس حسن
ولاية أريزونا ..أمريكا

[email][email protected][/email]