زوج يسكب (شوربة دجاج ساخنة) على زوجته .. بسبب (الحوامة)!!
دار السلام ? منى ميرغني
قام زوج بسكب شوربة دجاج ساخنة على جسد زوجته، مسبباً لها الأذى الجسيم، وذلك بضاحية (جبرونا) بدار السلام.
وأبلغت مصادر أن الزوج كان قد حذر زوجته مراراً من (الحوامة).. في يوم الحادثة نشب شجار بين الاثنين، فتناول الزوج (الحلة الدجاج) وسكبها بـ (شوربتها) على جسد زوجته، وبعد إسعافها للمستشفى صنفت الحروق بأنها من الدرجة الثانية، وبعد تماثلها للشفاء قدم الزوج للمحاكمة أمام مولانا “سليمان خالد موسى” قاضي المحكمة الجنائية بدار السلام، الذي أمر بحبس الزوج (6) أشهر وأن يدفع تعويضاً للشاكية قدره ألف جنيه.
المجهر
طبعا الناس المتزوجين يمكن يتفهمو غضب الزوج. بعد مرات الزوجة تخلي الراجل يطلع من جﻻبيتو خصوصا في رمضان ..انا حليت المشكلة دي بتكل في الشغل بعد الدوام حتي موعد الافطار عشان ما اكب لي شوربة سخنة في راس المرة
الظروف الصعبة دي والناس روحها مكركرة احسن حاجة في الفطور اعملوا فول او عصيدة وابعدوا من الشوربة دي و رمضان كريم
المرا أبت تخلي الحوامه والراجل حذرها أكثر من مره
مامكن بيتا وسخان وعيالا حايمين وسخانين زيها في السخانه دى والدنيا رمضان
آها يعمل شنو يعني؟
انا شخصيا ماعارف دار السلام دى فى الخرطوم فى مدنى عطبرة وماشاء اللة بعض من الصحفيين وبالذات الجنس الناعم بكتبوا الخبر حتة واحدة من غير تفاصيل 0 انا بقترح دار السلام دى اسمها اتغير لدار مشاكل كل يوم طعنو سرقو لفخو سان باولو مابالصورة دى
ياجماعة الحوامة الكثيرة في رأي تعتبر أذي جسيم للزوج المسكين. ولا مو كدي؟!!
المعلقين ادوني انطباع انو الراجل السوداني بيقيف ضد المرأة حتى لو كانت مظلومة !!!
ده راجل وسبب حروق لمرته يعني سبب ليها اذي جسيم وممكن مكان الحروق مايبرأ زي ماكان في الاول وانتوا بتحاولوا تشوفوا ليه العذر ؟
يعني شنو مرقت ولا حامت , الناس كلها بتحتاج لمتنفس وحتى الإسلام مابيلزم المرأة بخدمه الزوج المنزليه وانما الزواج لأشياء محدده وفي حديث صريح بالخصوص ده
يا جماعة إنتو متأكدين أنو دي (دار السلام) !!!!
80 % أو أزيد من قضايا العنف الجسدي ضد المرأة و الطفل التي تنشر في الصحف منسوبة لـ(دار السلام)!!!
بديت أشك و الله في نوعية البشر ديل لكن خلونا نتفائل شوية و نطلب من القسم (الإجتماعي و النفسي) بوزارة الداخليه (ما عارف إذا كان موجود والا لأ) !!! نطلب منهم يعملوا لينا دراسة تساعد في خفض كمية العنف البادية من سكان هذه المنطقة عشان على الأقل نقدر نعرف الأسباب الحقيقية الكامنه وراء (أغرب) أنواع القضايا..
هل السبب هو الثقافة أم الدين أم الفقر أم الجهل أم كل هذه العوامل مجتمعة علها تكون هاديا في معالجة الجريمة في السودان كافة …و الا الداخلية ما عايزة توقف سيل الشكاوى و إمتلاء الزنازين بالمعتقلين ؟؟!!
قانون و بلاغات و محاكمات ما بتوقف العنف (لأنها تعالج النواتج فقط دون المسببات)، العنف له مسبباته و معالجتها تقود لمجتمع آمن متسامح و متعايش مع بعضه البعض ..