البرلمان : يمكن تجاوز الفاقد من بترول الجنوب ..ويمكن تجاوزه بالكامل دون إحداث أي خلل في الموازنة.
كتب مركز حزب البشير الصحفي
(smc)
شرعت وزارة المالية في إعداد موازنة اسثتنائية خاصة بالفترة من يوليو إلى ديسمبر كبرنامج محدد ومتوسط المدى ترتكز على الترشيد الكامل في الصرف والزيادة في الإيرادات وتوجيه الموارد نحو البنيات الأساسية والنهضة الزراعية والاحتياجات الخدمية.
وقال د. بابكر محمد توم رئيس اللجنة المالية والاقتصادية بالمجلس في تصريح لـ(smc) إن الفاقد يمكن أن يحدث بذهاب بترول الجنوب ويمكن تجاوزه بالكامل دون إحداث أي خلل في الموازنة، مشيراً إلى سعي الدولة لإنفاذ برنامج محدد لترشيد الاستيراد وتقليل الطلب الكلي على الموارد والعملة الحرة مؤكداً أن دخول الذهب في الصادرات حقق إيرادات مقدرة وتوقع أن تصل صادراته بنهاية العام الجاري إلى (2) مليار بجانب زيادة حصيلة الصادرات الزراعية والحيوانية.
وأشار د. بابكر إلى التوقعات بإزالة الحصار الاقتصادي وإقبال الكثير من الدول الأجنبية منفردة للتعاون مع السودان مبيناً أن الإجراءات التي تمت من خفض للإنفاق والإصلاح الضريبي وتشجيع الاستثمار أسهمت في حل مشاكل الإيرادات كاشفاً عن اجتماع وزير المالية الأسبوع الماضي بالصناديق العربية وتأكيدهم بأن السودان قادراً على الوفاء بالتزاماته وذلك من خلال التجارب التي تمت في هذا الصدد.
بما ان الكيزان تكلموا عن الميزانية لتطمين الناس بانه يمكن تجاوز الفاقد من بترول الجنوب اعلموا ايها الشعب السوداني الفضل ان هناك ميزانية كارثية في القريب العاجل واول ضحاياها طبعا الشعب الفضل
أقترح على حكومتنا الرشيدة بعد أن تركو موضوع الكسرة و العواسة بعيد ، أن يقومو بزيادة البنزين والسكر والزيت ،لكن بشرط اطبقو الزيادات دى من أسع عشان ما تحصل اختناقات بعدين فى يوليو…أسمع كلام البضحكك يا الجاز….الله اطير فلتكم قولو آمين
بذمتكم دي البشارة المبشرننا ليها؟
ميزانية استثنائية قائمة على ترشيد الاستهلاك وزيادة الايرادات من غير ما يحددوا في الجزئية الاولى دي ماهي الفئات المستهدفة بالترشيد؟
طبعا من جيبي وجيبك وجيب اهلي واهلك؟ جيوبهم دي ما بهبشوها تقول فوقها دم بت الرسول.
احترت اضحك ام ابكي.. ميزانية قائمة على زيادة الإيرادات.. لا يفوت على احد ما المقصود بالايرادات والاوضاع الكارثية المترتبة عليها. يعني بالمختصر الميزانية ستكون قائمة على زيادة الجبايات والضرائب والزكاة والمساهمة الوطنية والقناة السودانية، وحق الملاريا وحق الله وحق العوض وحق البعوض وحق النِمِتي وحق الضبان وحق الموازين وحق المكاييل وحق العتب وحق الموية وحق النور وحق الحق وحق الما عندو حق لما الشعب الفضل يقول طق..
هوي يا انتو القاعدين في البرلمان مرطبين وساكنين ملح وراكبين عربات ملح وبنزينها ملح ودعايتها ملح وصيانتها ملح وأبهتها تمتد من المجلس الوطني لغاية قرية كل زول..ملح!!
ولتوضيح ذلك أطالب أولا انا القدامكم سايبريا دي، بقلع كل العربات البكاسي موديل 2010 والتي احضرها نافع على نافع للاعضاء وكتب على كل واحدة منها اسمه ومنطقته التي اتى منها باعتبار ان ذلك يصب في اطار الدعاية المجانية للمؤتمر الوطني .. في الحلال والقرى التي تصيح كلها كل مرة تشوف عجاج العربية على بعد 30 كيلو : ود فلان جا.. زول الحكومة جا..
وما تنسى العربات الصالون لرؤساء اللجان.. والسكن المزيون (الزين).
وطبعا لا يخفي على احد الدفعة الكبيرة المقصودة وراء الفكرة الترويجية هذه و ستأتي اكلها ولو بعد حين من (مؤتمرنة ) المواطنين (بجلبهم الى حظيرة المؤتمر الوطني المحظورة على الاخرين)..بحلول الانتخابات الجاية.. وناسنا يفاوضوا في الكلب الشال عضم السلطة عشان يتقاسموه معه او يعطيهم فيه عضة صغيرة، علما بان دواء الكلب معروف للسودانيين قاطبة.. اما ان تنهره ان : جَرْ، او مَشْلَعَبة حقك (من مشلعيب) وحراسته حتى لا يغدر بك الكلب.. وكل ذلك قبل ان يقع الفاس في الراس.. وحينما يقع، فإن لذلك شأن اخر وحديث اخر..
فالكلب لا يغير طبائعه لسبب واحد واضح..
انه كلب!!
للامانة فإن البكاسي والعربات الصالون شفتها بعيوني ديل العام الماضي في حوش المجلس الوطني بيضاء من غير سوء، تسر راكبيها، وتشعل النار كما في القش الجاف، في بطن دافعيها..
احسبوا عدد الأعضاء كم؟ وثمن العربات كم؟ وشوفوها بتدينا دفرة اقتصادية كم من الزمن؟ ولا تنسوا ان تعرجوا على باقي الجبانة الهايصة ديك .. عربات الناس التانيين.. مدير مكتب الوزير ومدير مدير مكتب الوزير .. والسكرتير ومدير مكتب السكرتير او السكرتيرة و مساعديها.. وعييييييييك. الشغلانية جارية.. تصل لغاية هواتف السرية والمكالمات المجانية للعيال وأصحاب العيال واقارب العيال..
واحييييي انا..
اقلعوا العربات دي أول شئ و دخلوها في ميزانيتكم الاستثنائية ذات الجلسة الاستثنائية دي.. واستثنونا بالله من التخدير الما بيودي ولا بيجيب.. الناس دي بعد ده ما بتتخدر ليكم كان صرفتوا ليها بنقو، بدلا عن الكلمات التي لا تسند الجوف..
يا اهل الخير..الجايي اسوأ من الحالي .. ما محتاجين تبشرونا بجنس البشارة دي..
خلي الوزير بتاع الفتريتة ده (فقه الكسرة) وجماعته يقعدوا في واطة الرحمن
ويبطلوا حكاية نزرع ونعمل ونعمل.. وينها الارض البتزرعوها.. وينها ترعها التي اعددتموها (باعتبار الفضل من مشروع الجزيرة- ده كان ما اتهمبت كلو)، وينها تقاويكم الجيدة؟
بعدين تقوم متين الزراعة دي ؟ اي زول عارف ان ابسط انواع الزراعة تحتاج لتلاثة شهور على الاقل لتثمر؟ تلاتة شهور يا عالم ياهوه، موش تلاتة يوم.. ثم منو البقدر يصبر تلاته يوم على الجوع؟ ولا ناوين تخلونا صايمين الدهر؟
ح تزرعوا شنو ذرة وقمح ولا فَنْقَسْ؟
ولا انتو شغالين بفقه ود الحرام زرعوه الليلة وباكر قدام..
بيعوا لقمة خدرة تسند الجوف بدل الكلام البنقو ده..!
قال انقاذ قال.. ياخي دي انقاذها لحسة كوع
ومن النوم الواحد يقوم تقول ملسوع
كفاية علينا نأكل مما نزرع ونلبس مما نصنع..
لتصبح نأكل مما نقلع ونلبس مما نرقع (الاخيرة دي مقصودين بيها نحن اصحاب الوجعة الحقيقيين).
قرف يقرفكم..!!
لست باقتصادي ولكن زي ما بقول المثل اسأل مجرب وما تسأل طبيب :
اولا هذا النظام الدكتاتوري ليهو اكثر من عشرين سنة ونفس الكلام والنفاق يتكرر من مسعوليه الفاسدين المفسدين .
ثانيا يا جماعة بدون اي فلسفة وبدون تفكير عميق تفتكروا المفسدين ديل حيعملوا حاجة عشان المواطن والله ديل كل شغلهم لمصالحهم الشخصية وبس ومستحيل يعملوا حاجة عشان المواطن الغلبان ده والبصدق الكذب والنفاق المكرر يكون انسان من العصر الحجري القديم .
ثالثا ايام عائدات البترول في الدولة الموحدة لم تفيد الوطن ومواطنه من كل النواحي والحال اسوأ من السيئ هل يعقل بعد ذهاب معظم البتيرو للدولة الوليدة ممكن الميزانية والاوضاع تمشي للاحسن ؟؟؟؟ يا ناس المؤتمر الوطني الشعب السوداني شبع من نفاقكم ودجلكم وتخديركم ليهو اكثر من عشرين سنه ..
رابعا كل المؤشرات و توقعات الخبراء الاقتصاديون انهيار الاقتصاد السوداني وذلك لسبب بسيط عدم التحوطات اللازمه لفرق البترول وجماعة البشكير كانوا فاكرين الجنوبيين ما حينفصلوا وحسابات كتيرة ما ضربت معاهم .
خامسا نبشر الشعب بزيادة جهنمية في الاسعار والجبايات الضريبية والزكوية ورفع الضرائب على المغتربين وزيادة السلع التموينية والمحروقات التي ستؤدي زيادتها الى زيادة حتمية في اسعار كل السلع .
سادسا نصيحتي لي شعب السودان الذي سكت عشرات السنين عن قول الحق والخروج للشارع للمطالبة برحيل النظام اي تستر على المجرم واقول تأخركم عن الخروج لن يؤدي الا لمزيد من الضغوط عليكم في معيشتكم وحياتكم ومماتكم وصحتكم وتعليم اولادكم فمن اراد ان ينصلح الحال لابد صحيان ضميره وقول الحق في وجه الظلمة المفسدين … ثورة ثورة حتى النصر .
اكيد الميزانية موش ح تتاثر لان الفاقد الايرادي ح يعوض بالمزيد من الرسوم والضرائب والجمارك يعني المزيد من الضغط على المواطن لرفاهية فاسدي المؤتمر اللاوطني وعلى المواطن ان يتحمل فشل الدولة الرسالية امس الخبير الاقتصادي كبر وبقية الضيوف بما فيهم بنك السودان تحدثوا عن مليار متوقع من الذهب فمن اين جاء المليار الثاني ؟!! مثل هذا الجهل النشط للحفاظ علي المناصب والمواقع يدفع ثمنه المواطن ولنرى الى متى سيصبر المواطن السوداني علي فساد وفشل نظام الجنرال البشير
وأشار د. بابكر إلى التوقعات بإزالة الحصار الاقتصادي وإقبال الكثير من الدول الأجنبية منفردة للتعاون مع السودان مبيناً أن الإجراءات التي تمت من خفض للإنفاق والإصلاح الضريبي وتشجيع الاستثمار – انا لست اقتصادي ولكن اعلم تمام العلم ان دولة احتلت المركذ الخامس في قائمة الدول الاكثر فسادا في العالم لن يجازف مستثمر في ادخال اموالة لها خوفا من ان يتم نهبها تفكير منطقي وطبيعي اذا حد قال ليك ان مدينة مدني تكثر فيها السرقات (الفساد) هل يعقل انك تذهب لهذة المدينة لتدير فيها عملا تجاريا او استثماريا بالقطع لا ثم لا علاوة علي تكلفة الطاقة سواء الكهربائية او المحروقات من ديزل وبنزين وفيرنس وازوت معروف ان السودان هو الدولة الاعلي سعرا في الطاقة عالميا وليس فقط افريقيا كلها عوامل طاردة للمستثمرين الاجانب وجازبة فقط لناس غسيل الاموال
مؤسف جداً أن تكون ميزانية الدولة مبنية على الآحلام والتمنيات وليس البيانات والتخطيط الاستراتيجي، إلى متى ستسوق لنا وزارة المالية هذا الفلم الهندي.
واووووووووووو يا فطومة ،،،اذهلتينا ،،،ايه الغضب ده كله ؟؟ الله يكون في عونك وعونا معاك ما كلنا في الهواء سواء ، ;)