غنا العاصين( قصيدة)

بسم الله الرحمن الرحيم

خايل الغضب فيك يا ولد
والثورة شبهك يا البنية
هيلكم تقودوا الشعب بالثورة الفتية
******
حسيتوا بي ألم الغلابة
وبقيتوا عنوان الصلابة
نعم الشباب الهب في وجه العصابة
حيي الشباب الدق للحرية بابه
الفج للفجر الدروب ذكرنا معنى الانكرابة
أُسْد العرين الشبو بشويش في مهابة
جاهلينهم سووا البدع في العصبجية
خايل الغضب فيك يا ولد
والثورة شبهك يا البنية
هيلكم تقودوا الشعب بالثورة الفتية
***********
المبدعين شكل النضال ..
عارفين تضاريس القضية
لا أمة نامت بالجراح
طول السنين تحت الأسية
بسراع بتنهض من سبات
لو ما ركل خوف المعايش والدنية
لا روس ولا عربان ولا حتى امريكان
باكين علينا ونحن تسفحنا الأذية
لا جيرة لا ناساً بعاد
لا صيني يوم بتهمه دمعاتنا السخية
أعرف ضراعك يا ولد
واقبض على جمر القضية
أنفكي من كل القيود
واتقدمي الصف يا البنية
خايل الغضب فيك يا ولد
والثورة شبهك يا البنية
هيلكم تقودوا الشعب بالثورة الفتية
*************
لموا الصفوف.. (وابقوا الصمود)
واعرف منو الما اتغش ضُمّه
فتش دفاتر المحنة شوف
مين الصدَق ساعة الليالي المدلهمة
ومنو القبل ياكل الفتات
ومنو البعاف الفضلة والذل والمذمة
ومنو البيرجف بالنسيم
ومنو البسافر بالعصار شايلاه همة
سيب المخذل والمكتف بالقيود
واصدح نشيدك يا الكنار صحيها أمة
أعياها جبار المعايش والنكد
اتهد حيلا من التآمر والهموم
مقسومة للجهة والقبيلة
خايل الغضب فيك يا ولد
الثورة شبهك يا البنية
هيلكم تقودوا الشعب بالثورة الفتية

معمر حسن محمد نور
20/يناير 2017

[email][email protected][/email]