أكلو في خاطركم
عزيزي (المواطن) عزيزتي (المواطنة) لا عليك إن صارت أسعار مستلزمات (الأكل) في غير متناول ميزانيتك (لو في أساساً ميزانية) فهذا (اللحم) الذي فاق سعر كيلو الضان منه الستين ألف جنيه ثبت بأنه ضار بالجيب وبالصحة.. عشان كده لازم نخليهو (نعمل شنو) وهنالك العديد من الغذاءات الضاره (برضو لازم نخليها) وقد اجتهد (العبد لله) في حصر هذه الأغذية من أجل حث الشعب السوداني (الفضل) على مقاطعتها وتركها.. طبعاً (للذين يستطيعون إليها سبيلاً)!
? السكر الأبيض: سعرو كل يوم يزيد.. السكرماده قاتلة.. إذ أنه عند احتراقه داخل الجسم يقوم بتدمير كميات لا بأس بها من فيتامين «ب» هذه الفيتامينات التي تعمل على تحسين عمليات هضم وامتصاص الأغذية وبالتالي نقصها يؤدي إلى ضعف البنية والاضطرابات العصبية والعضلية والصداع والشعور بالأرق والقلق النفسي والكآبة والضجر.. (يلا خلونا نخلي السكر احتمال الكآبة والنفسيات دى تروح) !
? الرغيف: الرغيفة بقت (عاوزة ليها مايكروسكوب).. خمسين رغيفة ما تشبع ليها زول.. عشان كده حقو نضرب عن تناولو لأنو سبب أساسي لما يُعرف (بالكرش) وهو بيزيد من معدلات السمنة والعجب لو كان (بالبروميد) سرطان وأحمد شرفي على طول..
? الحليب: الرطل عمل كم ألف جنيه ? يلا نخليهو.. لأنو الدراسات أثبتت أن تناول الإنسان للحليب البقري باستمرار قد يكون له أثر سلبي تراكمي لأنه ملوث بالعديد من مسببات وناقلات الأمراض، وقد اثبتت التحليلات أن الحليب يحتوي على كميات ضارة من مبيدات الأعشاب، والمبيدات الحشرية والمواد السامة كما إن عدد البكتيريا يتضاعف في الحليب كل (20) دقيقة إذا تركته في درجة حرارة الغرفة! يلا بلا حليب بلا بطيخ..!
? الزيت: لا تحزن عزيزي المواطن لعدم مقدرتك على شراء الزيت الأصبح الرطل بتاعو بالشئ الفلان، فقد تأكد بأنه عند قلي الطعام بالزيوت تتولد مواد تسمى (الجذور الحرة) وهي كيميائيات شديدة التفاعل وتعمل على تدمير الدهون الأساسية المهمة في الغذاء، وهي تزيد من خطر الإصابة بالسرطان وأمراض القلب والشيخوخة المبكرة، ويمكن أن تدمر العناصر الغذائية مثل فيتامين (و).. (يلا فليذهب الزيت غير مأسوفٍ عليه)
? الشاي: كباية الشاي قَرّبت يقت بالشئ الفلاني .. نقاطعو طوااالي.. مُش الدراسات أكدت بأن الشاي يسبب فقدان الشهية وأن مادة الكافين الموجودة فيهو معاها مادة (الثانين) الحامضية القابضة بيزيدوا من حموضة المعدة، بجانب الأثر القابض على شرايين المعدة الذي يؤدي إلى المغص وكمان الدراسات أكدت بأن شرب الشاي الساخن جداً يؤدي إلى تخريب الغشاء المخاطي للبلعوم والمرئ مما يهيئ الخلايا السرطانية للنمو لدى بعض الأشخاص.. (أها نبقى لي جنس السرطانات دي)؟
? الموز: كيلو الموز عمل برضو خمسة ألف زمان كان فاكهة الفقراء.. هسه بقي مشكله ، الموز يا جماعة بيتسبّب في اضطرابات المعدة، لأن مادة النشاء الموجودة فيه تقاوم الهضم وتتسبب بعسر الهضم، كما يشجع وجوده في المعدة على تكاثر البكتيريا المؤدية للاسهال (اقتنعتوا؟؟)
? الطماطم: طارت في السماء.. سعر الكيلو حصل تلاتين ألف على الرغم من أنها تحتوي على مادة سامة هي النيكوتين (الواحد ده) ، وقد حذرت العديد من مراكز الأبحاث، إذ أنهم اكتشفوا أنها سبب من أسباب أمراض المفاصل. (وأنا أقول الكراسي داخل المساجد كترت كده ليه؟).. يلا خلو (الطماطم) عشان تصلوا واقفين ووجع الركب ده يروح!
? الملح: الملح ذاتو عمل ليهو عظمة وبقى الكيس أبو ألف جنيه (ما يملح ليهو يومين) يلا نضرب عن شراء الملح لأنو ذاااتو بيسبب ارهاق وتعب الكُلى مما يؤدي إلى ضعف كفاءتها وزياده تناوله تؤدي إلى توترات عصبية وعضلية ونفسية وصداع مستمر وشعور بالقلق والكآبة والضيق والضجر (وأنحنا ما ناقصين ضجر وكده) .
? الفول: فقد ثبت علمياً أن تناول طبق كامل من الفول قد يصيب الشخص بحالة عدم وضوح الفكر؟ (يعني البلاهة) والسبب هو البروتين الموجود فيه وإذا زادت نسبته يؤدي إلى ارتفاع نسبة اليوريا، وهي مادة سامة إن لم يتخلص منها جسم الإنسان فإنّها قد تؤدي في أوقات مُعيّنة إلى لوفاة، يلا بلا فول بلا عدس هو أنحنا ناقصين تبلد؟ (كفاية التبلد الأنحنا فيهو ده) .
كسرة:
أيها الشعب السوداني الفضل .. الماكلين ليها شنو ? أكلو بس في خاطركم !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(و+و+و+و)؟
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(و+و+و+و)؟
ليه ناكل في خاطرنا؟؟
اخبار توجيهات السيد الرئيس بأكل الهوت دوق شنو(وووو وووو وووو)+(و+و+و+و)؟
#( شرب الشاي الساخن جداً يؤدي إلى تخريب الغشاء المخاطي للبلعوم والمرئ مما يهيئ الخلايا السرطانية للنمو لدى بعض الأشخاص)، * كما حدث للمشير الراقص.
#(وقد حذرت العديد من مراكز الأبحاث، إذ أنهم اكتشفوا أنها سبب {الطماطم} من أسباب أمراض المفاصل)، * و المثل الحي هو حالة المشير أبو ركب.
انت قايل خاطرنا رخيص؟ما غلا زماااااان
يعنى ما فضل الا ناكل فى بعضنا!!!!
انا ماكله فى خاطري ربع قرن
كل سنة وانت طيب وعيدك مبارك
انشاء الله شيالة خبيزكم عمرانة
احنا غايتو شيالتنا عمرانة بالنبق وفول الحاجات
نفسى ذول يدينى عيدية الله يرحمك يابوى
هؤلاء الجبارون في الارض الحاكمون بالتمكين والفساد يعيشون في بحبوحة ورفاهية وترف اعتمادا على الرهق الذي يمعنون فيه تاديبا للشعب السوداني الذي يتوجسون منه ويعلمون بانه يرفضهم ويرفض حكمهم وفسادهم .. اكثر من 60 وزير تنقصهم الخبرة والدراية ولمؤهلات مع ان حاجة السودان لاقل من 15 وزير فقط …اكثر من 18 والي بحكومته ووزارئها ومجالسها التشريعية ومايحوم حولهم من رعاع الانتهازيين حتى اصبحت كنتونات قبلية تدير الصراع بين القبائل وتنقص الكثير منهم ابسط ابجديات الحكم والمعرفة مع ان الحاجة الفعلية فقط 6 اقاليم للحكم … اكثر من 450 عضو برلمان هم الغالبية العظمى من المؤتمر الوطني لا يجيدون غير كلمة نعم للجهاز التنفيذي ولا علاقة لهم بالشعب من قريب ولا بعيد انهم يجيزون كل شئ واي شئ حتى القروض الربوية والقوانين المريبة لتحصين الفساد ولا يختلفون ابدا انهم يعملون تحت قلب وارادة الرجل الواحد ولا حاجة للسودان بكل هؤلاء فط يحتاج السودان لبرلمان من 150 عضو برلمان حقيقيون من الشعب والى الشعب .. بقي ان نشير ان كل هؤلاء يتقاضون رواتب ومخصصات وحوافز لا ينالها اقرانهم في امريكا او اي بلد ثري اخر في العالم قاطبة بجانب ان كل منهم تخدمه ارتال من السيارات الفاخرة بمحروقاتها وتتمتع اسرهم بالتعليم والسفر للخارج على نفقة الدولة علاوة على العمرة والحج على نفقة الدولة كذلك وماخفي من ملفات فسادهم اعظم .. اضاعوا البترول بعد ان ابتلعوا عائداته لاكثر من عقد من الزمان واتجهوا للذهب واخيرا للماشية بتصدير حتى الاناث منها ودمروا كل شئ مثل مشروع الجزيرة وسودانير وسودان لاين والسكة حديد والخدمة المدنية بفعل سياسة التمكين البغيضة ودمروا العملة السودانية حيث سلبوا الحكم وكان سعر صرف الدولار 12 جنيها واصبح الان ما يفوق 9500جنيه ومازالوا سادرين في غيهم .. المسالة ليست اكل خاطر فقط يااستاذ جبرة فقد اكل السودانيين اكباد بعضهم وهم احياء بلا حياء
بروتين الفول غني بحامض أميني هو التربتوفان و الايض الغذائي لهذا الحامض تتنج عنه الدوباو هي مادة منومة عشان كدا الواحد لما يملا من االفول بعد نصف ساعة الى الساعة يبدأ في الترخيم و شراب الشاي و العيون ماشا قافلة و الفك السفلي ماشي واقع الكلمة تمرق بيا الطيف و الاضنين يتقلن يعني حالة من عدم المبالاة بالزمن و المسئولية و لا يمكن التخلص من هذه الحالة إلا بنومة تقيلة من الشخرة فيها عدة تونات
و الله عمك جبره طلع قديم خلاص , قال شنو ? أكلو بس في خاطركم !
أصح يا عمك الناس أكلوهم المراتب تقول ليناأكلو في خاطركم !
(خالتى قالت ليكم: حليل أيام الصادق المهدى على الأقل كان مأكلنا نيم).
انا خالد محمود انضم الى حركة حمد بقيادة الزعيمة احلام حسب الرسول واطالب المجتمع الدولى لإطلاق سراحها من معتقلها فى مستشفى للتجانى الماحى
ويجب على كل المثقفين النظر الى ما تطالب به هذه البروفسر بعين فاحصه وهنا عانى المثقفين الوطنين وليس المثقفين من الطوائف وليس المثقفين على السرقة من المال العام ليس المثقفين على تخدير الناس بالدين
مش أحسن لو الواحد إيدو أكلتو وإرتاح مرة واحدة من الأكل
السلام عليكم ..
تحيه طيبه الأستاذ الفاتح جبرا..
لك أن تكتب وتتناول قضايا الناس والحياة بأسلوبك الخاص وتضعها في قالب ساخر إلي ماتشاء هذا من حقك بالطبع ولكن بما لايخدش كبرياء الناس وعزتهم ، جيد جدا ان تطرح بعض المواضيع بحيث تتم إثارتها ومعالجتها بهكذا طريقه لكن دون المساس والازدراء بالألم العام الذي يتجسد في بؤس حال الغالبية الساحقة من أبناء الشعب السوداني الكريم ففي تقديري لم تكن موفقا في دعوتك الساخرة هذه بمقاطعة معظم الأغذية بدعوي تسبيب الضرر في جيوب الناس وصحتهم فحديثك فطير ولا يخلو من تهكم واستخفاف بمرارات الناس وعقولهم كذلك ، فيا عزيزي الفاضل الرجاء تقدير الشعور العام في طرحك للقضايا فنحن الذين ضربنا في المنافي وأصقاع الأرض المختلفة لتأمين لقمه العيش لأسرنا المسجونة والمنكوبة بفعل فاعل في أوطانها نتواصل فقط عبر هذا الفضاء فلا تفسده أنت أيضا بمثل هذا الهراء..
كل واحد يشوف ليه وزير يأكل من سنامه
لا لن احيد – لمحى الدين فارس
السلام عليكم ورحمة الله تعالى وبركاته
لن أحيد
أنا لست رعديدا ًيُكبل خطوه ثِقل الحديد
وهناك أسراب الضحايا الكادحون
العائدون مع الظلام من المصانع والحقول
ملؤوا الطريق
وعيونهم مجروحة الأغوار ذابلة البريق
يتهامسون
وسياط جلاد تسوق خطاهمو
ما تصنعون؟
يجلجل الصوت الرهيب
كأنه القدر اللعين
وتظل تفغر في الدجى المشؤوم أفواه السجون
ويغمغمون
نحن الشعوب الكادحون
وهناك قافلة تولول في متاهات الزمان
عمياء فاقدة المصير و بلا دليل
تمشى الملايين الحفاة العراة الجائعون مشردون
في السفح في دنيا المزابل والخرائب ينبشون
والمترفون الهانئون يقهقهون ويضحكون
يمزقون الليل في الحانات في دنيا الفتون
والجاز ملتهب يؤج حياله نهد وجيد
وموائد خضراء تطفح بالنبيذ و بالورود
لهب من الشهوات يجتاز المعالم و السدود
هل يسمعون ؟ صخب الرعود ؟
صخب الملايين الجياع يشق أسماع الوجود ؟
لا يسمعون !!!
في اللاشعور حياتهم فكأنهم صم الصخور
وغدا ًنعود
حتماً نعود
للقرية الغناء للكوخ الموشح بالورود
ونسير فوق جماجم الأسياد مرفوعي البنود
تزغرد الجارات
والأطفال ترقص و الصغار
والنخل و الصفصاف
والسيال زاهية الثمار
وسنابل القمح المنور في الحقول و في الديار
لا لن نحيد عن الكفاح
ستعود أفريقيا لنا
وتعود أنغام الصباح
الحل الوحيد كل واحد يسويلو مطبعة قروش بس تكون قدر الحاجة يعني الزول يطبع يوم بي يوم وما يطمع والله يكفينا شر الزيادات.
ما لينا زمن بناكل في خاطرنا
سلام للأستاذ جبرا ولجميع الأخوة والأخوات وناسف لهذه الإنقطاعة الطويلة من الراكوبة .. جينا لقينا الجداد الأليكتروني بيكاكي في مقالات الأستاذ جبرا … قال ايه .. الأستاذ أرزقي .. يا رااااجل قول كلام تاني .. أرزقيه إنتو يا ماكلين قوت هذه الشعب الصابر المسكين .. نصيحتي ليك أمشي شوف ليك شغلانية رجال من البتسوي فيه ده … كرهتونا الراكوبه
ما لينا زمن بناكل في خاطرنا
سلام للأستاذ جبرا ولجميع الأخوة والأخوات وناسف لهذه الإنقطاعة الطويلة من الراكوبة .. جينا لقينا الجداد الأليكتروني بيكاكي في مقالات الأستاذ جبرا … قال ايه .. الأستاذ أرزقي .. يا رااااجل قول كلام تاني .. أرزقيه إنتو يا ماكلين قوت هذه الشعب الصابر المسكين .. نصيحتي ليك أمشي شوف ليك شغلانية رجال من البتسوي فيه ده … كرهتونا الراكوبه
الماكلين ليها شنو