على صفحتها بفيسبوك كتبت الأستاذة “رزار عمر”:
تحت هشتاق
#وزارة_الداخلية تتحول في دولة القانون الي
#وزارة_البلطجية
للأسف 😥
شاهدة عيان تروي تفاصيل الاعتداء على الفنانة مروة الدولية
طيب ي شباب الحصل كالاتي بالنسبة لي ضرب الفنانه مروة الدولية وللان ماف زول عايز يوضح الحصل شنو بقت قضية رأي عام .. تابعو البوست للنهاية
لبسنا وزبطنا وطلعنا معزومين حنة عريس لاحظو حنه عريس الناس كلها أصحاب واخوان وناس بسيطة وجميلة الطباخ شغال ف العشا وعدة القهوة شغالة المزرعة برا فيها بابين واحد كبيييير للعربات وف شرطة عسكرية واقفة ف الباب بدخل المعزومين فقط بضربو تلفون للزول بكلم الشرطة بتفتح الباب للناس المعزومه فقط .. الباب الورا مقفول اصلا بطبلة م فتحو ركزو كويس
ف جزو من أهل العروسين ف الحفلة برضو لأنها حنة عريس
.. بدت الحفلة الفنانه هبة جبرة بعديها الفنانه نازك سنار ومروة الدولية م غنت قاعدة ورا الفنانه نازك سنار وانا لاني كنت قاعدة ورااااا بعيد من محل الفنانه شفت الحاصل ده بعيوني الشرطة تلبت بالباب الورا المقفول كمية وكسرو الباب ودخلو ف ناس انتبهت ليهم وناس م انتبهت لانو المزرعة كانت كبيرة شديييد والناس اغلبيتها مع الفنانه البتغني اللي هى نازك سنار فجاءة جرو عساكر خلو الفنانه الشغالة والناس كلها واحد مسك مروة وعايز يضربها واحد من الأولاد مسكو م تضربها الحاصل شنو طوالي قال ليه اسكت ي شاب وقفو الحفلة وضرب مروة وبجر فيها الاولاد ادخلو واشتبكو مع العسكري كيف تضربها العساكر التانين لم الجوطة حصلت بقوا بضربوا ف الاولاد والبنات من طرف الوقت داك انا قبيييل دخلت العربية وبعاين بعيوني الشرطة العسكرية الحارسة المزرعة جات والضباط والملازمين وكل زول ف الحكومة من أصحاب العريس الكانو ف الحنه م قدرو يوقفو الضباط قالو ليهم معليش ده شغلنا واشتبكو اولا كانو بضربو ف رصاص حي بكمية كبيرة جدا ف الهوا بخوفو ف الناس اي ولد يمشي يحاول يمسك البنات ومروة بوجهو فيه السلاح الوقت ده ف جزو من الشرطة العسكرية فتحت الأبواب وبقت تطلع العربات والناس بدت تطلع شوية شوية ف بنات جوة لسى الشرطة بتضرب فيهم مسكو كم ولد من الكانو بحاجزو والدقو جرس معاهم رفعوهم ف دفار، ومسكو ٩ بنات من المعزومين ومعاهم مروة الدولية
جوة ف المزرعة رقدوهم على بطنهم وبقوا بضربو فيهم بالعكاكيس وضهر السلاح ف ضهرهم واردافهم (ركزوا ف تفاهتم) وبضحكو فيهم بعدين قامو طلعوا البنات ف دفار براهم شالو منهم تلفوناتهم وأثناء م ماشين ع القسم بتحرشو بالبنات وبهبشوهم واحده من البنات ضربت العسكري ف العضو الذكري لم هبشبها العسكري البوراها ضربها بالعكاس ف رأسها البت غمرت ف الدفار
حتقولو كيف عرفت الكلام ده وانا طلعت ؟ اقول ليك صحباتي اتنين من البنات الانضربو والتحرشو بيهم
الناس وصلت القسم البنات بدمهم وضريبهم القاضي ليبيه عمملو شنو عشان ينضربوا كده العساكر حلفو قسم ف المصحف انو البنات نبزوهم وسبوهم .. انتوا متخيلين الغزارة؟؟؟ حلفوا كذب واتفتحت ف البنات والاولاد بلاغات سب ونبز للعساكر يعني لا بلاغ لبس فاضح ولا دعارة ولا لا لانو اصلا م كان في الكلام ده ودفعوهم غرامة مالية بعد ده كلووو
العساكر حلفوا كذب ودقو الناس وعاقبوهم واتحرشو بيهم وده كلوووو عشان ف ناس قاصدة مروة الدولية اي زول بقى عندو ضهر ف البلد دي بقى بقتل وبنهب ويسرق ويتعدا ع الناس بعين مليانه حكومة تافه وحتفضل تافه ده القانون بعمل كده البحمينا منو؟؟؟ نقول ي منو؟؟؟
شوهو البنات ومروة ضربوا الاولاد ضرب كعب وخربوا للعريس حنتو والحمدلله ماف زول مات
حسبي الله ونعم الوكيل فيهم حمد لله على سلامتنا وسلامة الناس القدرت تمرق والله عبارة عن حرب كانت
انفلات امنى من افراد الشرطة نفسها
الأخ النور وفيت وكفيت ….علي الطلاق مانزيد علي كلامك ولا كلمه …. وللفنانه مروه والله بجد كفاره وربنا في
الزولة دي كضابة شاهد ما شافش حاجة. كلنا شفنا الفيديو وفيه مروة بتغني عندما هاجمها البلطجي بزي الشرطة وهو يريد ضربها بعصا فتلقت الضربة بيدها وامسكت العصا وفي شاب خلف البلطجي حاول يمسك العصا ويبدو أن باقي الضرب الظاهرة آثاره في وجه مروة ويديها تم لاحقا أو في قسم الشرطة