انقذت قوات الدفاع المدني ولاية الخرطوم وعبر وحدة الإنقاذ البري محلية أم درمان شاب ثلاثيني حاول الانتحار.
وذكر المكتب الصحفي للشرطة أن الشاب حاول الانتحار مستخدماً أسلاك الكهرباء في أعلى عمود كهربائي جوار مستشفى أم درمان.
وفور ورود البلاغ إلى غرفة الطوارئ بالمحلية تحركت قوات الدفاع المدني وعبر وحدة الإنقاذ البري، وتمكنت من التعامل بكل مهنية واحترافية واستخدمت القوة خبراتها التراكمية في مثل هذا الحادث، واستطاعت بعد جهود مقدرة السيطرة عليه في عملية استغرقت ثلاث ساعات، حيث تم تسليم الشاب لقسم شرطة الأوسط أم درمان لتكملة الإجراءات القانونية اللازمة. تمت العملية بسلام بقيادة ميدانية من الملازم أول شرطة نجيب صلاح، وإشراف مدير قوات الدفاع المدني محلية أم درمان.
واستخدمت القوة خبراتها التراكمية
يا ربي الخبرات التراكمية دي قاصدين بيها شنو !! من كترة الشباب البتشعلقوا في الاسلاك ولا للقافية وكده
كسرة : ما قلتوا لينا كان في كهربة في السلك ولا كانت قاطعة ! أصلاً ناس الكهربة قالوا بدأو القطوعات
كسرة تانية : مافي ود حلال يقول للزول المتشعلق ( يا زول انزل ساي مافي كهربة في السلك )
والمصيبة إنه الزول المقدم على الانتحار عادة بكون بعاني من مشاكل نفسية تستدعي العلاج النفسي بواسطة طبيب نفسي متخصص لكن للاسف نحن في السودان في الحالات دي بدل ما نقدم العلاج النفسي لمثل هذا الانسان بنقوم بفتح بلاغ جنائي ضده ومحاكمته وسجنه بدل علاجه .. يعني بنذيد الطين بلة ونساهم في أنه الشخص تزداد حالته سوءا وقد يلجأ لقتل نفسه داخل السجن!!!