ضو البيت حمد دمبلاوي

ألكع جاي..
يا جنيات الحلة أسمعو جاي..
يا بنيَّات الحلة تعالن جاي..
خلُّو العطله وبقبيق الشاي..
خلُّو الفارغه وتعالو معاي..
*************************
ما شايفين الحال يا جنيات..
ما شايفات الحال يا بنيَّات..
الأخلاق فاتتْ راحت مع الرايحات..
والضمير خلاس اتكعكع ومات..
*************************
يا جنيات الحله خلوها صراحه..
يا بنيَّات الحله خلوها صراحه..
كل حياتنا مليانه سفاهه..
خلونا النتكلم بصراحه..
************************
العندو قروش يساوي قروش..
والماعندو قروش تعبان مدروش..
تلقاهو العندو قروش ماشي ومنفوش..
مع إنو القروش معيار مغشوش..
*************************
وبقينا نجقلب في المظاهر..
ونسيناها نضافة المخابر..
ونسينا معاها يوم المقابر..
يوم تبقي هناك براك مسافر..
**************************
وجاتنا بلاوي النت من أوسع الأبواب ..
التويتر والفيسبوك الجاب الخراب..
البنيه معرسه وحابه واحد تاني بالواتساب..
والجنا مع مرتو وخالط واحده في الإغتراب..
**************************
حاجات لا هولتنا لا الليلتنا..
إلا فتنة الأيام بالحيل هجمتنا..
غير أخلاقنا مافي علاج لمشكلتنا..
كان سبناها نلقي رياح وسموم لفحتنا.

[email][email protected][/email]