حقارتكم في اللمبي..!!!

حقارتكم في اللمبي !!!

أسماء الجنيد
[email][email protected][/email]

خربانة من كبارها ومن يوم جونا وإتحكروا زي الهم في قلب الوطن، و الحكاية بايظة وكل يوم ماشة للاسوأ.
إدارة فاشلة وإسلوب عاجز وساقط حد القاع!! صدق من قال ( الملافظ سعد)
كبير قومهم البشير من بدري إنكشفت لغته العاجزة ومن اشهر عباراته المتدوالة إعلاميا.
(بعفصها تحت مركوبي و وكامبو يبلها ويقرطعها ! ووصف الحركة الشعبية بالحشرة الشعبية !!!)
ووصف المتظاهرين من أجل حقوقهم المشروعة، وصفهم بشذاذ آفاق !!
مع إنى اجزم إنه عارفها شتيمة لكن يجهل تماما معناها الحقيقي لأنه فهمو قدر لحافو يحمد سيدو .
نافع قال الحسو كوعكم،والزارعنا غير الله يجي يقلعنا!! ولقط ليه شوية هكر و وفر ليهم من قوت الغلابة أجهزة تجسس وكمبيوترات وسماها كتيبة الجهاد الإلكتروني وقال داير يصلي بيهم العصر في بني قريظة !! فجعتن كده داير يبقى نبي !!!
الطفل المعجزة مصطفى إسماعيل قال الشعب شحات !!
ربيع عبد العاطي يحمد سيدو اليومين ديل لقى ليه مسمى جديد( خبير وطني)قال مافي مظاهرات والشعب مبسوط ومتوسط دخله 1800 دولار
( دي زاتها شتيمة للشعب وحقارة عينك يا تاجر, تجوعوا الشعب وتقولوا مبسوط ومرطب كمان !!
النائب على عثمان ( علي سواطير) وده مسمى جديد ليه إن شاء الله يبراه إلى ما شاء الله.
اها ده قال داير إسرائيل تنزل ليه تحت ويحاربها( ساطوريا) ويقطع لحمها ويجدعوا للكلاب!!! أنعم وأكرم !
وزير صحتهم حميدة يتهم شركات التبغ ويصفها( بالمتوحشة ) في جمع المال ويطالب بفرض ضرائب عليها !!
هسه ده يقولوا عليه شنو عليكم الله؟ في زول جشع أكتر منو ؟مقرطها على الغلابة ومضيق عليهم فرص العلاج بعدما إشترى كل المستشفيات الحيوية في البلد وحولها لمصلحته الخاصة.
وضيق الخناق على الدكاترة ،هجوا وخلوا ليه البلد!ومرضى الكلى مجدعين امام المستشفيات يفترشون الأرض ويلتحفون السماء.
مغلوبين على امرهم ،وهو يفتح مستشفى الزيتونة ويعاين ليهم بي طرف عينه !!!حسبي الله ونعم الوكيل على البجاحة وقوة العين!!
ودكتور العملة قطبي الجاك بتاع الفكة أشكال والوان زي ما تدور.
أول زول فك الشمار و صرح بإعتقال كمال عبدالمعروف, بلع كلامة بعد سويعات بس!
أظن هرشوه ولا لقى ليه خمشة عملة جديدة فجعتن غير اقواله وقال قوش لا علاقة له بالحزب!
وإنه دي محاولة لا تؤدي لأي إنشقاق فيما بينهم !عجبي !!
والله الناس ديل مبدعين إبداع في النفاق والزوغان ما سبقهم عليه شيطان!
اما كبير شياطينهم العلمهم السحر?(الترابي ) سبب البلاوي والفتنة, والوهط لينا الكيزان في البلد.
شجع الشباب على محاربة و قتل ابناء الوطن الواحد واقنعهم إنه ده جهاد في سبيل الوطن! والماتوا كلهم شهداء عند ربهم يرزقون.
فجعتن قال الشباب الماتوا ديل كلهم فطائس!!!
وطلب من تلميذه البشير الإستغفار والهروب لأي بلد تاني!! ( يعني فكاهو عكس الهواء بمزاج)
يا شيخ الترابي يا صاحب الصينية المدنكلة ،بعدما ورطت الناس بي ناسك الكنت السبب في إستلامهم للحكم ظهرت بي مكرك وخبثك في ثياب الواعظين!!! وبعد العمر ده كلو الخوف من الله مافي حساباتك؟؟
اخيرا وليس أخير جاء ختمها ليكم أحد شيوخ الإنقاذ (الكاروري) وفي خطبةالجمعة وفي بيت من بيوت الله وبكل بساطة سمح لنفسة ان يصف الناس بالكفر واليهودية والجحود بكتاب الله!!!
فقط لأنهم إحتجوا على من سرقوا قوت الشعب ودمروا البلد وعاثوا في الأرض فسادا لمدة 23 سنة !!
يعني الناس تموت كمد عشان شيخ الكاروري يبسط رئيسه وجماعته حتى ولو بالزور والبهتان!! سبحان الله!
كيف بالله عليك يا شيخنا المبجل تصف من قتل وسحل وكذب ونافق وتاجر بإسم الدين؟؟
كيف تصف من إنتهك حرمات البيوت وعذب النساء وإغتصب وسرق أموال لا تحصى ولا تعد ونهب المال العام؟
كيف تصف من إستغل قلة حيلة حجاج بيوت الله من عجزة ونساء ونهب حقهم وعذبهم ومرمطهم وبهدلهم على رؤوس الأشهاد؟
كيف تصف من بنى كعبة في ساحة مفتوحة وربما كانت مراحيض لكل المارة وللبهائم ( الله يكرمكم)
بنى كعبة في العراء وأمر الناس بالطواف حولها والتدريب على مناسك الحج !!
كيف تصف من إستغل مستشفيات المواطنين والفقراء لصالحه ، وأصبح يتاجر فيها وبأرواح الغلابة!!
هؤلاء كلهم مؤمنين مسلمين ومجاهدين في سبيل الله ويجب علينا أن نطيعهم غصبا عننا ؟
وإن خالفناهم و لم نطعهم نصبح يهود وكفر وجاحدين ؟؟؟
ليه ؟ هم اولياء الله الصالحين ؟ ناس كتيبة الجهاد الإلكتروني و بني قريظة؟
والله يا جماعة صحي الإختشوا ماتوا ؟ كيف يسمح شيخ لنفسه وفي خطبة جمعة وهو عارف مصائب بنو جكة !
كيف يسمح لنفسه بوصف الناس بالعبارات المجحفة في حق اي مواطن!! وبي إسم الدين ؟؟
يا جماعة الخوف من الله ده مافي نهائي؟ الناس ديل ما طاريين الموت والحساب؟؟ حسبي الله ونعم الوكيل!

والأهم من ده كلو مقطوع الطاريء قوش, إتحنفش وإتحمش ونفش ريشو ،ماعارفين الغشاهو منو ؟
ومرة واحدة قرر ينط الحوش ويبرطع مع الجماعة في الزريبة الهاملة دي ويبقى رئيس الشعب المطحون وساكت !
رئيس مرة واحدة آآ قوش المغشوش؟ هملتك يا السودان وسط البلدان !!!
شفتوا عليكم الله الهملة البقت على السودان وشعبه ؟ لكن نستاهل بي سكاتنا وهوانا على نفسنا.
نستاهل الزي قوش يفكر بي عين قوية يقود الفضل من باقي الشعب المستكين.
ويحصل نصيبو من فتات الكرتة ، ما اصلها عاااايرة وادوها صوت !!
بعد ده كلو كيف نلوم اللمبي لما يقول نور الطيارة مطفي! و الدفاع بالنظر ؟؟
إشمعنى يعني هو براهو المسلطين عليه الضوء ومبلعنو لغاليغو؟
خلوا يا جماعة معذور اللمبي، خلوا يتمتع بي مواهبه فينا و يتمدد بالطول والعرض،يقول و يلغلغ ،و يهبب ويلبلب كما يحلو له.
يعني شنو لو إنفقع الطوحال؟ ما زماان المرارة إنفقعت ! الحصل شنو ؟؟
غايتو لو الإنقلاب ده صدق وقوش دخل الحوش مع الرعاع الجوة، قطع شك اللمبي كان رشح روحو نائب الرئيس, مفيش حد أحسن من حد !

متاوقة
من الليلة زول يلوم اللمبي مافي على إبداعاته وتجلياته، مدام شيخ الكاروري بكفر الشعب والناس قاااعدة وتسمع في خطبهم !!!
يمهل ولا يهمل