يا على محمود البشير فى التشكيل الجديد حيوديك وين
لمان تزيد الجمارك الشعب لا يخرج فى مظاهرات فى الشارع زى زيادة سعر الخبز والبنزين لكن أسعار السلع المستوردة بيزيد ودا بيكون فى مصلحة المنتج الوطنى لو فضل لينا منتج وطنى
لكن الجمارك قد تهبش اشياء تمس الإقتصاد وتشرد المستثمرين زى زيادة سعر قطع الغيار والأسمدة الزراعية والمبيدات الحشرية
على محمود دا كنت بسمع انه كان والى فى دارفور ودخل بجيشه معسكر واباد ناسه ويقال هو من بين المطلوبين فى الجنائية
البشير جابه المالية عشان يلمعه وينظفه فى أعماله الشينة لكن الراجل دمر السودان
قال لينا لو ما ارفع الدعم عن البنزين والجازولين البلد ستنهار – البشير كعادته صدقه ودعمه ولمان الشباب خرجوا فى مظاهرات ابادوهم والحال فى حاله
يا البشير على محمود دا مانافع كل مره يجبك برأى
رفع الدعم عن البنزين وجاء على محمود ليقول ( لا مخرج من أزمة الاقتصاد إلا بزيادة الضرائب والجمارك . واعترف بأن الأوضاع الاقتصادية التي تعاني منها البلاد لا مخرج منها بعد توقف القروض الأجنبية )
علق البعض قائلا ( هذا التصريح كأنه يردد العبارة المأثورة للسيدين رئيس المؤتمر الوطني ونائبه نافع علي نافع :
( موصوا توصيات الملتقى الاقتصادي وأشربوا مويتها)
عاوزين على محمود عبد رب الرسول دا يبين لنا سلبيات زيادة الجمارك
أما الضرائب لو زيدت أكثر من كده بكره عدد المستهدفين سيكون بعدد اصابع اليدين والرجلين وغالبية من يعمل فى تجارة أو صناعة حيقفل ويتحول لمايعرف بالتاجر الشبح – والتاجر الشبح دا موجود فى السودان – بضاعته تدخل مهربه – اللورى كامل ببضاعته يدخل فى خندق ويدفن – تسرب البضاعة منه شوية شويه على جمال أو سيارة هايلكس بكب – وتدخل بمنافذ معينة وبترتيبات خاصة
التاجر فى سيارته وبجواله يتصل بالزبون يسلم ويستلم ولا جمارك ولا ضرائب ودا الدمر البلد
زيادة سعر البنزين وزيادة الضرائب وزيادة الجمارك خليت شنو ياعلى محمود ماتجى تمسك الشعب دا واحد واحد وتخنقه لحد مايموت زى ماعملت فى معسكر النازحين بدارفور
اول مره اشوف بلد فيها إقتصاد حر وإقتصاد مش حر
وياعم عبد الرحيم ياحر ماك حر
يحكمك العسكرى كسار الجبور
طيب مادام حل المشكلة فى زيادة الضرائب والجمارك ليه ما عملت الخطوة دى بالأول وأنت عارف الشعب لا يخرج فى مظاهرات بسبب زيادة الضرائب والجمارك ونحن عارفين الحكومة بتزيدها كلما تصحى من النوم
وعشان كده المغتربين مابيحولوا مدخراتهم عبر قنوات البنوك السودانية لأن الفرق بين سعر البنك والسوق الأسود 700 جنيه لكل ريال سعودى ( 2100 جنيه سعر الريال بالسوق الأسود و 1400 جنيه بالبنوك السودانية )
ماذا ينتظر الشعب من حكومة وزير ماليتها زاد البنزين ولمان الشعب خرج أمن حكومته قتل عشرات الشباب وجاء اليوم يقول المشكلة مازالت تراوح مكانها وحنجرى عملية تانية وتالته – زيادة الضرائب والجمارك – وكمان عاوزين مستثمر أجنبى يجيكم والله إلا يكون زول عنده أموال تحتاج للغسيل – أموال مخدرات أو تجارة سلاح – لكن زول عنده مال نظيف مابيغلط ويجى لى بلد وزير ماليتها على محمود – آل بتزا آل وآل هوت دوق وكلبا حار ووزير إستثماراته الناجح جدا قال نحن شحاتين – وبوكو حرام قال متعناكم – غايتو هريتونا نضمى ومحقه فى شغلك
لا خيرا فيكم لا كفاية شركم
اقتباس :قال لينا لو ما ارفع الدعم عن البنزين والجازولين البلد ستنهار – البشير كعادته صدقه ودعمه
تعليق :اختشي يا رجل و تذكر انه خال البشير و الذي من لحمه و دمه قال ان الذين مع البشير قطيع من البهائم , يعني بالعربي كده علي محمود هذا مجرد خروف و الراعي هو البشير الذي يوجه القطيع كما يشاء و كل هذه القرارات المسؤول الاول عنها و الموجه هو البشير و لو كان علي محمود عنده طايوق كان استقال و هرب من الورطة ده
الله يكضب الشينة
سمعنا طراطيش كلام بتقول البشير حيجيب أمناء أمانات المؤتمر الوطنى وزراء
يعنى أمين أمانة المؤتمر الوطنى للشئون الخارجية وزير للخارجية
أمين أمانة المؤتمر الوطنى للشئون المالية وزير للمالية
وياجماعة على محمود كان بينفذ كلام حسن احمد طه امين امانة المؤتمر الوطنى وكل اللى حيعمله البشير حيجيب المخطط لسياسة على محمود الفاشلة ليتولى مسك الدفة
البشير حيعوس ويجوط السودان بجماعة المؤتمر الوطنى
ونحن نقول له يا اليشير جماعتك ديل قلبتهم يمين وشمال ماقادرين يوصلوك للدكان : غيرهم
البشير : سأسقيهم زيت ناشونال عشان يشتغلوا كويس او يموتوا
المهم يا بشير تشكيلتك الجديدة تحب تعطيها فترة عشان تصلح جميع الخلل كم شهر وبعدها لو فشلوا وزادوا الطين بله حتعمل معاهم شنو – حتجرى تجربة اخرى – اقول لك خلاص وصلت الحلقوم – سلمها باخوى وأخوك وأتخارج شوف لك اى بلد أمان ماتصلك فيها الجنائية