الإستراتيجية كمان وكمان..!!

الاخ عبدالظافر أنا وأنت وغيرنا نعلم ان حياتنا عشوائية واذا اردت ان تنظمها صفعك المجتمع اليه بعشوائيته،، اذا لم نتعود على الفطور الساعة ستة ونص صباحاً وترك شاي الصباح لما بعد الفطور ،، واصبح كل زول مننا عارف برنامجو الانتاجي شنو البلد ما بتصلح،،، واذا لم نحدد موعد لزيارة المرضى وتقليل الجلوس في بيوت العزاء وزيادة التكلفة على اهل الميت علي العليهم من ميتة وخراب ديار ،، واذا لم تترك المرأة السودانية الفشخرة واعادة جدولة الزي الذي ترتديه والذي يمثل شماعة قائمة بذاتها اضافة الى المصوغات وامور الزينة التي عفا عليها الزمن عملا بنصيحة خليل فرح ( البنات فاتوك) فاننا سنظل شعب بطيء في عالم متسارع،،، واذا لم نترك اللوم الكثير في اتفه الاشياء الاجتماعية والمجاملة على حساب الزمن وحتى على حساب الصحة فاننا سنظل مجتمع منافق وعلينا تحمل تبعات ذلك من ضنك،، الله يقدرك يجيك زول في مواعيد مزعجة وقت راحتك وتقابلوا وانت نعسان بعتبروا تجاهل وتكبر عليهو مع انو القرآن العاملين نحن اهل السودان منقطنوا اكثر من ناس مكة النزل فيها بقول ولو قيل لكم ارجعوا فارجعوا ،،، لو الله قدرك يجيك زول وانت في الدوام وتقول ليهو انا مشغول او عندي اجتماع يا دوب انت بقيت زول كعب ومتكبر وستقتل شخصيتك في بيوت العزاء والافراح بلا سبب من الزول الما استقبلتو لأنك مشغول،،،

أما ناس الحكومة واتباعهم من احزاب فكة واحزاب زينة فامرهم عجب فقد حولوا ممارسة العمل الحكومي الى ظواهر اجتماعية غريبة ومجاملات اجتماعية يوم في عرس فلان ويوم في سماية فلان ويوم في عزاء فلان اثناء ساعات الدوام والسفر الى الاقاليم والفشخرة على أساس (( اظهار المنصب في هذه الحالات الاجتماعية))،،، أنا اجزم هؤلاء النواب وكثير من الحكوميين الواحد ما عندو زمن يقرأ ليه كتاب يملا مخو بشوية حقائق فهم في تجارتهم مشغولون أما العمل الحكومي والنيابي فدة زيادة جرتق للدعم التجاري ،،،، والحكومة ما يهمها يضيع زمن الناس ولا ما يضيع المهم خليهو يضيع طالما ضائع في امور فارغة لا تمس وجودها كالحفلات والخلافات الرياضية وغيرها من توافه الامور،،،،

نحن شعب ينقصنا تنظيم انفسنا صحيح بنضف بيوتنا كويس لكن اول ما نفتح باب الشارع لا يلفت نظرنا الوسخ والحجارة المتراكمة قداموا بمتر وده حتى في ارقى الاحياء كالرياض والطائف والمنشية عليك الله شوف ملاحظتي دي سليمة ولا ما سليمة،،، نحن شعب ذاتي وفردي والجماعية عندنا في امور انصرافية صحيح نجامل بعضنا اجتماعياً ولكن لا نجامل الوطن ولا نهتم ونكبره نجاح بعضنا ونسفهم منجزاتهم ،،،

انا وانت وغيرنا نحتاج الى محاسبة انفسنا والاجابة على السؤال السوداني الازلي (( لماذا نحن نتقهقر الى الوراء )) لماذا لا نغير مفاهيمنا الاجتماعية والاقتصادية والسياسية لماذا لا نفهم ان هذا العصر عصر ادارة الوقت ،،، لماذا نغني كثيرا وعدد الفنانين كاد يفوق كثير من التخصصات المهمة،،،، لماذا غضبت علينا السماء وحبست المطر في عهد الشريعة بينما في العهد الذي كان الحكم مدني والبارات فاتحة السودان نظيف والجو ظريف والاجابة ما دايرا زول حريف،،،،