وأنا صبي صغير كدا ، ساقتني واحدة قريبتي معاها عشان عندها مشوار ل فَكِي .. الفكي ده اسمو صالح ، ساكن في تقاطع شارع النص مع الشارع الكبير الجاي من المحطة ، وبودِّيك لبيوت ناس كمُّون وأستاذ محمد خير ..في محطة 15 المايقوما حلة المحس ..وبعدين صالح ده أساساً كان قاطع طريق ، ثم عتالي ، ثُم بوليس ، ثم سواق بتاع قندرانات في نيجيريا والكامرون ..وفي النهاية اتَّكل على الله واشتغل فكي .. قريبتي كان عندها موضوع واحد بتحبه ودايراهُ يعرسها ، وواحدة عارض هُوَ بحبها دايرة تطفِّشها منو بعيد . المهم , أنا عرفْتَ البيت والحاصل شنو، وبقيت بمشي ليهو .. والغرض إنو عندو كتب مثيرة داير أقراها.. أبو معشر الفلكي الكبير ، السحر الأسود ، منبع أصول الحكمة ، الكبريت الأحمر ، شمس المعارف الكُبْرى.. إلخ .. في منبع أصول الحكمة شرح وتوضيح لخطوات تنزيل الجان ..كيفية دخول الخلوة ، الأبخرة ، الصيام ، الأذكار والأدعية .. إلخ.. لكن بورِّيك أولاً وقبل كل شئ وبتشديد وصرامة إنَّك لازم تعرف وتتعلم كيفية صرف الجان ..بعد حضوره ..وإلا هلكْتَ ..صرف الجان بيتم بتغيير البخور وقراءة سورة الزلزلة بطريقة معينة .. ولما تصل أشتاتاً تقول أشتاتاً أشتاتاً بعزائم اللهِ القوية ..انصرف .. باركَ اللهُ فيك ..
المركز بدأ بتجنيد العرب المراحيل بواسطة الصادق المهدي في الديمقراطية الأخيرة لغرض دحر التمردات .. وده لأنو الجيش في تركيبته على مستوى الجنود وضباط الصف ، هم من ذوي المتمردين ..وديل هم البحاربوا أساساً في الميدان .. ف الوضع بقى إنك بتطلب من جنود قتل ذويهم وأهلهم .. جو الكيزان واصلوا لغاية ما استقروا على موسى هلال ليحارب بالوكالة.. موسى رفع قرن ، كسَّروه ليهو بحميدتي .. طيب.
البرهان تحديداً- ونيابةً عن المركز- هو ال لقط حميدتي .. وجابوا وعجنوا وخبزوا بيده.. وعملوا جيش ضباطه كلهم من المركز.. وأدوهو مساحة يلقط ليهو صبية كجنود ومرتزقة من أهلو ومن شرق تشاد والنيجر ومالي ومن هنا وهناك .. جاب شفعو..قاموا زادوا عليهم من أهل موسى هلال بحيث يكونوا هم الأكثرية .. أهل موسى المفروض على الأقل ، ح ينحازوا لزولهم في اللفة الأخيرة..
تمساح الأراضي.. أول حاجة بيعرف رقم القطعة، وصاحبها المسجلة باسمو .. وبعداك بفتش ليهو ل جوكي ، ويتفق معاهو .. ويعمل مبايعة من صاحب القطعة للجوكي.. ويروح عارض القطعة.. يجي الزبون ..بعمل ليهو مبايعة من الجوكي للمشتري.. ويدي الجوكي حقو المتفق عليهو .. ولو حصل اللغم قام لا شفتك يا جوكي ولا دريتك ..
ف باختصار ، وفي كلمات قليلة ، ده الوضع حق حميدتي .ويا ريت يكون وضح إنو عبارة عن جوكي ،وبمجرد ما تمَّ دوره ح يتم رميه في أقرب زبالة ،وإنو ال قام بتحضير الجان لا بُدَّ واتعلَّم قبل تحضيره كيفية صرفه ..والسلام ..
“شُكْرِي”
شكري عبدالقيوم
[email protected]
حميدتي الرئيس الحقيقي للسودان اصح يا بريش