قصيدة: بلدنا المابتعرفوها .. رد على أمين حسن عمر
الذين كانوا يقفون فى تلك “الصفوف،أكرم منكم وأكثر شرفا، لأنهم لم يتاجروا بالإسلام ولم يسئيوا اليه ولم يكن لديهم لسان (زفر) مثل لسانكم”!
“بلدنا الما بتعرفوها”
……………………..
بى غبارها وبى عجاجها
مافى أبرك من أرضنا
وما فى أطهر من ترابها
فى الحقيقة ..
إنتو سبب خرابها
والوطن الكان مسالم
فى زمنكم اضحى غابه
مافى اطعم من خضارنا
وما فى الطف من هوانا
ومافى اعذب من مياهنا
ومن غنانا
“واذكرى ايام صفانا”
مافى أجمل من حياتنا
ومن حيانا
ومن بناتنا ومن ولادنا
ومن نسانا
والرجالة الفايتة حدها
برضو كانت حاجه تانية
الكرم
أعظم صفاتنا
وكنا عنوان للنزاهة
وللأمانة
مافى زول بقبل بى ذلة
وبالحقارة وبالإهانة
لو تخلى الدنيا بى جنبو
وتسافر
دون ما تلفتو أو تقولو
لما ترجع
تلقى حاجتك فى مكانها
كنا لما نقوم
تقوم الناس ورانا
ولما نقعد
مافى كلمة بعد كلامنا
وما فى اصدق من لسانا
ده كلو عد وفات رورح
وكت بلدنا الجاها جاها
ضلمت فى كل حتة
لما ليل طول غشاها
الكلاب
نبحوا فى غزالها
و(الكدايس)
شردوا الطير من سماها
لى بلادهم خانوا غدروا
وفسدوا هبروا
وعدوا روحهم من جناها
وأتقياها
يا حليل زمن المحنة
لا عداوة ولا مظنه
كان وطن نتباهى بيهو
وما بندور
من غيرو جنه
مهما سافرنا وبعدنا
تانى يوم نرجع نجيهو
زى جنانا نخاف عليهو
ونحنا فيهو
نريدو أكتر ونشتهيهو
ده كان وطنا
الزيك إنت محال
إعرفو
والكلام القلت فيهو
فيك إنت
أصلو أبدا ماهو فيهو
………….
تاج السر حسين
12/ يونيو/2016
كلام عظيم يا تاج السر
كلام في الصميم ،،،
بس عايز البفهموهو
يا حليلهم الطفش طفش والقرف والتزم الصمت،،،،
ما سمعت بي جدادة الخلاء الطردت جدادة البيت ؟؟؟
يا هو. دة الحاصل في بلدنا،،،،
امدرمان وين ناسها؟؟
حتي البيوت والشوارع اتغيرت ملامحها
وتمشي في شوارع العاصمة المثلثة وأحيائها كل الذين يمشون علي ارضها اغراب لا ملامح لهم
والبلد أصبحت لا لون ولا طعم ولا رائحة لها
غيروا ملامحها وبدلو ناسها بي ناس تانييين
حسن مكي قال عندهم انفصام شخصية
المشروع الحضاري دجل ودجالين
امين حسن عمر قال شنو بالضبط
يا أستاذ تاج السر بذمتك لاقاك وش يقطع الخميرة من البيت ذي وش أمين حسن عمر؟ ياخ دا تقول بالع ليهو كلوركوين.. استغفر الله الله العظيم جرحوا صيامنا..
قصيدتك دى يا تاج السر أخير منها شعيرات امين حسن عمر .. يا أخى ما تشوف ليك حاجة غير الكتابة !!!
صراحة: ،،،،، نحن (أقل مما ذكرت) ،، و(افضل مما قاله امين)
التاج اريت عافية , اعجبتني القصيدة . احسست بارتياح بعد القراءة ….. شكرا .57