ما بنبقى سوريا ولا اليمن (قصيدة)
بسم الله الرحمن الرحيم
ما بنبقى سوريا ولا اليمن
(1)
لملم مثالك ..مافي زول بهتز ليك
وفر محاذيرك عليك
ورينا كان الخوف علينا ..أم عليك؟
أم خوف على العز ..الحتيسرب بعيداً من إيديك؟
أم من حساب قادم أكيد بيوافي ما اقترفت يديك؟
أم من رسوب الفكرة والحيرة العليك ؟
(2)
أما البلد..
لو قالوا للعدو خرِّبا..
ما كان قدر..يعمل كده
لو قالوا للطمعان يشيل ما يشتهي
ما كان بيطول ..قدر النظامك بددا
لو قالوا للحاسدين عليه اتلملموا
لتعوذوا مما بدا
لو قالوا للصُلاّح تهجدوا واسجدوا
داعوها وادعوا عليها..بالليل والنهار
لاستغفروا لذنوبهم ..
لو شافوا أيه عرفوا مين القايدا
أما إذا ما كنت من بره النظام..
ومشفق عليها ورايدا
فافتح عينيك .. ما تنخدع ..
واسأل كتير..العنف من وين ابتدا
يا ربي قبل العاجكو ..؟
أم كان مع التمكين بدا
كترة سلاح وجيوش جيوش
والفشقة وارقين.. ديك حلايب ..مبتدا
واسأل إذا شفت المكدس من سلاح
لي مين إذن ؟..وبلادنا .. نهباً للعدا؟
هذا السلاح ..عنوان لفكرة محددة
ما بترضى بالآخر مواطن ليه حق..
ذات اتجاه واحد أكيد.. كل فكرة غيرا بتوئدا
مبدية من الجاهلية..عمرو بن كلثوم سيدا
تشرب من الماء الزلال..وبقية للطين موردا
بعد الخلافة حكم عضوض
لبني أميةَ أو بني العباس ..تشوه للشريعة مقاصدا
تعرف تبرر للذي حكم البلد..
بفتاوي خايبة ..جميع فعايله تأيدا
وتقول حرام لو قلت يوماً ما بغم..
أويوم طلعت و قلت فكرة بتنقدا
ومن ديك وعيك
والحالة دايرة علينا من تلك القرون..
جارانا دايماً لي ورا..تمسك خطانا تقيدا
لو أمة حرة تعبدا
وعشان كده..
حتشيل سلاح..تخريب وتقتيل في الورى
لو شالوا عهداً كان علينا يسودا
(3)
هذا القفاز برميه في وجه الذي..
دايماً بجيب سيرة العراق أو سوريا أو ناس اليمن
واضحك إذا اتذكرت إنه ..جنانا موجود في اليمن
تقدر تقول أنك حمامات السلام..
أم من دماء جيشنا الهناك..جاك التمن؟
هذا التحدي على الذي..
يرعبنا بي دول الربيع كيفن بقن
تضمن جميع الراضعين..
ماسكين ضروع كل الوطن
لو مالك الملك انتزع..
للسلطة ببقوا مسالمين؟
لو كان بتقدروا للحساب..
والعدل والحرية عنوان للوطن
وافكار جديدة تزح ضلالات السنين
من غير تقولوا دعاته هم الكافرين..
والملحدين والمرجفين
ودعاة تفسخ حتى لو ..على صلاتم دائمين
وصائمين ..للصالحات هم عاملين
وتبادروا بالطلقة الأثيمة..
تقولوا حي على الجهاد
جوراً وبهتاناً تحاربوا مواطنين
لو انتو في يوماً حتضمنوا لينا دي
ما بنبقى يوم زي سوريا أو ناس اليمن
الفكركم كان الطرف..
في أنهم بقوا عن ديارم هائمين
معمر حسن محمد نور
27 نوفمبر 2016
[email][email protected][/email]
أخي معمر– التحية والتقدير– صح لسانك وسلم بدنك وفقك الله فانت فحل في الشعر ايضا كما في النثر
أخي معمر– التحية والتقدير– صح لسانك وسلم بدنك وفقك الله فانت فحل في الشعر ايضا كما في النثر
التماس .
أتمنى لو أن أصحاب القصائد ( العامية ) يسجلوها بالصوت ويرفعوها على المواقع حتى نستمتع بها ونتفاعل معها.
أنا شخصيا أجد صعوبة في قراءتها ويضيع منى إيقاعها . ولا أظنني الوحيد ولو كنت الوحيد فأرجو مشاركتي المتعة.
جاطت بلدك
غمدت لبدت
فرت طارت
حسكل صافي
تلحس تشبع
كل الشفع
تمرق تمرح
بعد الزنقة
نشم العافية
ونشبع نوم
مافيش تلب
التماس .
أتمنى لو أن أصحاب القصائد ( العامية ) يسجلوها بالصوت ويرفعوها على المواقع حتى نستمتع بها ونتفاعل معها.
أنا شخصيا أجد صعوبة في قراءتها ويضيع منى إيقاعها . ولا أظنني الوحيد ولو كنت الوحيد فأرجو مشاركتي المتعة.
جاطت بلدك
غمدت لبدت
فرت طارت
حسكل صافي
تلحس تشبع
كل الشفع
تمرق تمرح
بعد الزنقة
نشم العافية
ونشبع نوم
مافيش تلب