الراكوبة: عبدالوهاب همت
في الاحتفال الذي أقامته المنظمة السودانية للسلم والمصالحة ظهر اليوم الثلاثاء23 يوليو في حي البستان بأم درمان وذلك في مناسبة إطلاق سراح أعضاء حركتي جيش تحرير السودان بقيادة (مناوي) والمجلس الانتقالي بقيادة (نمر). حيث خاطب الاحتفال عدد من المتحدثين منهم السيد محمد عبدالرحمن نمر رئيس حركة جيش تحرير السودان المجلس الانتقالي وممثل عن المنظمة الراعية للاحتفال ومعتمد أمبدة اللواء فيصل ساتي. وقد شارك بالحضور محمد حمدان دقلو حميدتي نائب رئيس المجلس العسكري الانتقالي وعند إعتلائه للمنصة شرع الحضور بالهتاف المحبب مدنية مدنية مدنية وعندما أمسك حميدتي بالمايكرفون بدأ يردد الهتاف نفسه مدنية مدنية وقال: أنا ماعدوكم ونحن عايزين حكومة مدنية تستلم السلطة (هسي) ، وأنا عايزكم نعرفوا صليحكم من عدوكم وعدوكم هو نظام البشير القعد 30 سنه، عدونا وعدوكم القاعدين ومستفيدين من خلافاتنا 4 شهور ، ونحن حنضمن كل ملاحظات الجبهة الثورية في الاتفاق ، ونحن عايزين سلام حقيقي وماعايزين بندقيه وعدونا هو المؤتمر الوطني . وعند استمرار الهتاف المقاطع له مدنية مدنية قال : لو حتقاطعوني حأشي طوالي. نحن مفروض كان خلال الاربعة شهور الفاتت دي نرجع قروش السودان النهبوها ، ونحن نرحب بالاتفاق التام للجبهة الثورية، ونحن لقينا روحنا مخترقين وقبضنا الناس ديل وحتشوفوهم في الفيديو وهم قاعدين في السجون ونحن عايزين نلتفت لقضايا الوطن. وعند إستمرار مقاطعته بالهتاف من الحضور صمت لبعض الوقت قائلاً نحن ناسنا 7 شهور قاعدين حارسنكم وقاعدين في الشوارع لحمايتكم. وقبل أن يختم حديثه قال: نلغي مسيرة يوم الخميس والمفروض كان تطلع لدعم القوات المسلحة وعايزين نكون كلنا جسم واحد لانه نحن نعمل مسيرة يوم الخميس ناس الحرية والتغيير حيعملوا مسيرة تانية في محل تاني، عشان كدة نحن عايزين نكون حاجة واحدة عشان نبني بلدنا.
