رساله إلى نافع و زمرته
بيناتنا مافي علاقه
لا نظرة حب لا صداقة
نحنا البلد عشاقه
و انت البلد سراقه
نحنا بنحب سكانه
بمختلف أعراقه
و انت اناني ظلامي
ضد الشمش و اشراقه
نتوحد ما بنتفرق
عبدالله تيه و أساقه
عايزين عداله تساوي
بين الوزير و غفيرو
و السايق الدرداقه
و البمشي خمسه دقايق
و البمشي سوق الناقة
و البشكي من التخمه
و البشكي من الفاقه
نبدأ التعايش و نفتح
مليون و مليون طاقه
و تقوم بلدنا تخدر
و تنتعش أسواقه
و نقلع جذور الفتنه
بي طيبه و إسحاقه
ان شاء الله تقدر تثبت
يوم في الظلط نتلاقى
* خمسه دقايق : سوق يرتاده الفقراء في أطراف أم درمان و هو غير صحي
[email][email protected][/email]
كم انت رائع يا زاهر وويل ثم ويل لنافع وزمرته اذا خرج المارد من القمقم وقريبا سيستجيب القدر ومهما طال ليل الظلم فلا بد من انقشاع الظلام وحينها سيكون تعليق الناس ان القذافى كان محظوظا بتلك النهاية الماساوية .
خمسة دقايق دا إياهو سوق أمدفسو البيعنو ولا واحدا تاني ؟؟؟؟؟؟؟؟؟؟
كلامك ..روعة والله … جميل المبني والمعني … مصادم ولخص حالنا ب (اعجاز)
كلامك (زي الدّهب)
وخمسة دقايق إسم حي عندنا نحن هنا في زالنجي برضو