الداخلية تكشف عن اتجاه لتطبيق حد السرقة بقطع اليد
البرلمان: سارة تاج السر
كشف وزير الداخلية الفريق أول ركن عصمت عبد الرحمن، عن اتجاه لتطبيق حد السرقة وقطع يد كل متورط في سرقة السيارات وتهريبها بدرافور، واعلن عن ترتيبات تجريها الداخلية بصدد جمع الاسلحة الثقيلة والعربات ذات الدفع الرباعي من المواطنين، ولفت الى ان القرار سينفذ في القريب العاجل.
واعلن الوزير عن تفلتات امنية بولايات دارفور، من عناصر وصفها “بغير المنضبطة” تستحوذ على كميات من السلاح، في وقت استبعد عبد الرحمن، نشوب حرب اهلية في دارفور بسبب الصراعات القبلية.
واشار الوزير في تصريحات صحفية عقب اجتماع مع لجنة الامن والدفاع بالبرلمان امس، بشأن بيان الوزارة الذي قدمه امام البرلمان في وقت سابق، الى ترتيبات واجراءات تجريها وزارة الداخلية لجمع الاسلحة الثقيلة والعربات ذات الدفع الرباعي من المواطنين انفاذاً لقرار رئيس الجمهورية المشير عمر البشير بأن يكون السلاح الثقيل في يد القوات المسلحة والقوات النظامية الاخرى.
ولفت الوزير الى سعي الوزارة لايجاد معالجات للاسلحة الصغيرة التي يحملها الرحل، الذين يحتاجون الى السلاح خلال مساراتهم الطويلة، إما بتعيين قوة لتأمينهم اثناء حلهم وترحالهم، أو بتصديق بنادق لهم او منحهم صفة رسمية لحمل السلاح.
وكشف وزير الداخلية عن آلاف السيارات المهربة الى دارفور، واشار الى تنامي اعدادها بشكل كبيراً جداً، ورفض الافصاح عن حجمها بحجة ازدياد اعدادها بين الحين والآخر، ونبه الى محاولات تجريها وزارة الداخلية لاغلاق الباب امام تدفقات السيارات المسروقة والمهربة حسب قرار الرئيس البشير، وايجاد معالجات على ان يتم بعدها “تطبيق حد السرقة على كل متورط باعتباره (زول سارق عديل) (طبقاً لتعبيره).
الجريدة
اولا هل تعطيل وتطبيق الحدود من مسؤولية وزارة الداخلية ؟ ثانيا هل هناك حد اسمه حد تهريب السيارات لدارفور ؟والله من اسوا مافعلته الانقاذ هو محاولة خلط اهواءها بالدين الحنيف.ان الدين برىء مما تفعلون فلا تشوهوه بالاعيب السياسة.
أها يا التركى, القطيع حيكون محصور فقط في دارفور مش كده!! وباقى ناسكم الحرامية مستثنين !! طيب ما دى الشريعة المجغمسة ذاته.
لا بأس إذا كانت أولية التطبيق على سارقي المال العام.لأن من يسرق من المال العام غالبا ما يكون موظفاً أو محاسباُ أو وزيراً أو سكرتيراً لمسئول بمصلحة الأراضي فلا يكتفي براتبه الشهري فتمتد يده طمعاً في المال العام من أجل الثراء من مال كل الشعب السوداني.
مافي طريقة تحلل للجماعة ديل و لا قطع بس
اها….و الجماعة الفي الصورة دي بتقطعوا اضنيهم؟
لو صحيح الكيـــزان وتوابعهم من المنفجية لا أيد ولا رجل
ولا صفقة ولا رقيص عشان في المثل قالوا اليد الواحدة ما بتصفق
“تطبيق حد السرقة على كل متورط باعتباره (زول سارق عديل) (طبقاً لتعبيره). و السارق ماعديييييل بنسوى ليه شنووووووووو ؟؟
ما فهمنا المغذى من الصورة هل ديل الحرامية المفروض يطبق عليهم قطع اليد وطبعا ده اقرب للواقع
ام انهم الداعمون لتهريب السيارات ولا القصة شنو
انت ماشي بعيد مالك .. لو طبقت هذا القانون الاسلامي في حد السرقة معظم كوادركم سيصبحون من ذوي الاحتياجات الخاصة ..تطبقوا القانون على الضعيف .اما اذا سرق الشريق فيكم حللتموه ..والله ظلمكم باين ما بابدورلو شهود..
خلاص الشريعة المدغمسة إنتهت .. وعدتم لشريعة نميري المجغمسة
حد السرقة عند اللزوم !
لو التطبيق على طريقة سرق الضعيف اقاموا عليه الحد (و دة المتوقع) و لكن لو على طريقة سرق الشريف أقاموا عليه الحد
(أمانة الجماعة ما وقعو)
وماذا عن سارقى المال العام والمتحللين من السرقة ومستقلى النفوذ ؟؟
لا اعتقد ان وزير الداخليه يعنى مايقوله ، لو كان حقيقة ماقاله 80% من المسئولين سيفقدون اياديهم وارجلهم وربما روؤسهم – يازول ده كلام ساكت الحاتقطعوا ايده واحد سرق لياكل او ليطم اولاده – كما قال احد الاخوه المعلقين اعلاه ناس الصور دى المفروض تبدوا بيهم – اسالهم قبل كم سنه ماذا كانوا يملكون ؟ الا يستحقوا قطع الروئس وليس الايادى فقط – يا زول ارعى بى قيدك
بالله لو وزير الداخليه دا قال نكافئهم احسن
عشان لو داير يطبق القطع ح اقطع كل ايادي الشعب الكيزاني ونحن م ناقصين معوقين كفايه علينا الفقر والدمار
الحقيقه ما قريت المقال كله واكتفيت بى قطع يد البسرق عربيه فى دار فور طيب يا عصمت عبدالرحمن ناس الخرطوم حتعملوا ليهم شنو القطع يكون رقبه ولا كيف ،،،،،،،،،،،،،،،،،،،،،،،،،،،،،،،،سجمى اللمبه ولعت
انا بعرف جريمة السرق بكون في سارق وشاكي سمه المسروق وينه حقو ما يتلاعبو ويدخلوتطبيق الحدود بدون درايه وسيؤدي ذلك تعقيد سيتراجعو لاقل من حد التدين العادي
الحرامية العاديين ممكن تقطعوا ايديهم.. لكن حرامية الكيزان الا تفرموهم فرم!
اولا اقطعوا رؤس هؤلاء المجرمين الموجودين في الصوره اعلاة يعني الكلام ديه لو صح لاقي يد كل مؤتمر وطني مقطوع بل اقطعوا رؤسهم وايديهم من خلاف
معلوم (القطع) في السرقة و شروطه؛ أما السارق الذي لم يسبق لسرقته مثيل في التاريخ كالبشير و أعوانه و أقاربه، فهل يستنبط لهم حكم (الفرم)!
يعنى معناها الشريعه دى حتطبق فى دارفور بس وعلى ناس العربات فقط يعنى الحراميه الهناك من ناس المؤتمر الوثنى ينومو قفا بس مش والله كلام ياوزير الداخليه بقيت مفتى ديار
جرامية الغرب خلوهمةانتو جراميتكم بتعملو فيهم شنو بقي ياهو المثل ذاااااااتو( الغلبتو مرتو مشي يأدب حماتو )
طبعا وزير الداخلية زعلان من ناس الغرب طبعا ساعة كان في هيئة القيادة ووقع في كمين معه ام الحسن وقامو جارين ام الحسن سروالو وقع وقال ليك الحلبي دا جاري ومشغل البوري بتاعه هههههههههههههههههههههههههههههه
وما علاقة الداخلية بالتشريع ؟
دا وزير ( سكروتة ) ما ناقش حاجة .
نعم وسيطبق على سارق رغيفة ليسد به جوعه اما انتم سارقى المليارات من لبن حليب الاطفال فيطبق التحلل هذا اذا طبق فيهم .
الأيادي التي تسرق تقطع الأيادي التي تسرق عجائب يا،،،زمن.
الأيادي التي تسرق تقطع الأيادي التي تسرق عجائب يا،،،زمن.
انتوا يا كيزان افصلوا دارفور زي الجنوب اسلاميين اشقياء يحبوا الشقاوه