حرامي للمحكمة : تسلقت حائط الشاكية ليلاً عشان (أتونس) مع بنتها
امدرمان
أقر لص امام المحكمة الجنائية بدار السلام بأنه تسلق حائط منزل الشاكية ليس بغرض السرقة ? كما قال ? بل لأنه تربطه علاقة عاطفية مع إبنتها ، التي طلبت منه الحضور ليلاً إلى داخل منزلها ، لكي يقابلها ويتجاذب معها اطراف الحديث .
فيما اكدت الشاكية وشاهدتها ان المتهم قد تسور منزلهم بغرض السرقة وأنهم قد تعرفوا عليه عند رؤيتهم له ، فهو يقطن في منزل مجاور .
وبناءً على اقوال الشاكية وشاهدة الاتهام قضت المحكمة على المدان بالسجن سته أشهر لشروعة في السرقة والجلد 25 جلدة .
المجهر السياسي
هههههههههههههههههههه والله قصة طيب ما خلاص هو جارهم معناها جاي يتونس صدقوا خلاص هو كمان بالغ كان يجى يتونس بالنهار طيروا لي الونسة من راسه ههههههههههههه
حرامي القلوب (( تلب )) …..يا جماعة الزول دا ممكن بحب بتكم !
انا ما سرقت انا جيت اعااااااااين !
ده حرامى القلوب والا شنو !!!!!!!!
**** تلاحظ تنفيذ عملية الجلد في كل شئ من الجرائم افتونا يا ناس مفهوم ان الجلد عقوبته حدية اذا بلغ النصاب والتسلق لم يبلغ النصاب ولماذا لا ياخذون بروايته ومعاقبة البنت *****
حرامي القلوب تلب ! زز المفروض يحاكمو طه سليمان الدخًل ليو الفكرة دي في راسو ! و لاً إيه ؟!!
مانى سيد بيت بفتح كرب ………….داير انط الحوش …دردرب داير اشوف اللابسة الدهب…………….والعكاكيز فوقى ربرب اريتو سيفا يقطعنى تب ……………انا داير اشوف سجنك يا صنب
هاهاهاهاهاهاهاهاها والله قصة عجيييييييية لكن. ممكن كمان ياجماعة يكون عمل حكاية الونسة دى شماعة ساكت. لكن كان برضو يتحققو من الموضوع دا ويسالو البنت وكان البنت ضميرها انبها واعترفت لازم تتعاقب عشان تتادب. ولا رايكم شنو؟
يا اخوانا ما المشكلة فى انه تلب المشكلة فى القاضى الحكم عليهو يظهر هو ناسى انو ود الجيران وبنتها محترفة بى ذلك عشان كدة كان يحكموا عليه بحكم اقل والتعهد بعدم تكرار ذلك
شنو يعنى المهنة لص و عاوز يتزوج البلد ما كلها حرامية بقت عليهو يشتغل ليكم وين المسكين ده فى البترول ولا سكر النيل الابيض؟؟ و ما اكيد عاطل حتى لو سرق مسكين ذنبو شنو و ياهو عمر البشير نهب و اتزوج تلاتة خلوهو يسرق و يتزوج واحدة بس
ياخ انا !!!!!
اتونس قال
الزول دا قاصد خير………مادام هو ود الجيران؟
دحين آ جماعة أدوني معاكم كلمة ، الزول ده ود الجيران وقصدو شريف ورومانسي كمان ولسان حالو بقول ( السمحة يا نوارة فريقنا يالعسل النشفتة ريقنا …. أتهموني بيك وأنا قالوا خاين ، أنا ما سرقت بس جيت أعاين يعني أتونس وكدا … ياخ بالغته عديييل كدا !!!!!
ليه الونسه بالنهار كملت هههههههههههههههههه دي قويه لكن يمكن ماسرقو هدفو يسرق القطه
حليلك بتسرق مخدة و ملاية……….وغيرك بيسرق خروف السماية ………………….تصدق فى واحد بيسرق ولاية ؟؟؟؟؟؟؟؟؟
الحصل دا تعريف لمسطلح..(حرامى القلوب..) الذى يتغنى بة القونات و كلبين…
هذا ما يعرف بحرامى القلوب…وهو الشخص الذى يتلب فى انصاص الليالى ليس لغرض سرقة نقود او ما خف وزنة وغلا ثمنة…وانما لسرقة قلوب بعض الفتيات الهايفات اللائى يسمحن لشخص غريب عن المنزل يتلب عليها وش الصبح…مصيبة…
الحل…ليس بقطع يد او رجل او جلد او تغريم..حرامى القلوب..وانما الحل يكون بتزويج حرامى القلوب من الفتاة التى من اجلها تلب…وبذلك نحفظ الاموال و الاعراض…
السؤال ….ايهما تفضل…الحرامى البسرق الاموال ولا الاعراض..؟؟..؟؟
ودمتم..
باااالغت .. تتونس وبس !!!
وبالليل كمان ؟؟
طيب ماتتصل وتتونس بالموبايل
لزومو شنو تليب الحيط؟؟
و بعدين يا اخوانا الراجل جاكم بالحيطة عديييل كدة يعنى ما نطة من الشباك, ما تخلوهو يتونس ونستو و يمشى, يمكن بكرة يجيكم من الباب و يخطبها منكم, كدة خربتو على البت ساااى
حسغ بالله فى داعى للفضيحة دى؟؟ وكنت تقول جاى اسرق طالما البنية عارفة وانت كنت تطلع ولد ضكران وتسترها
دا بكون ابو ريالة جاي يشغل الرادارات .
الله يرحم ورده بتونس بيك وانت معاى
جاري وانا جارو +++ بتسلق اسوارو
دي وحده من الاغاني الهابطه والشي العجيب وغريب الشباب المضروب في هيئته الفكريه هو ملزم بي حفظ الغنيه والتاسير به ومن الكرف الاخر يوجد من يتلقا ذالك
ربنا يسهل وتتمهل علينا شوي غلاة الاسعار دي عشان الواحد يقدر يعرس ويتحاشي نطيط الحيط