تاني طلة على المناصير (قصيدة)

بسم الله الرحمن الرحيم
تاني طلة على المناصير (قصيدة)

يوم السفر..كان السفر
كان القدر
ماعدت أهلك يا الحبيب ود بابكر*
لا الحصة كانت ..لا الدرس
لا الزوجة لا الأم لا الوليد..
لا الخلة في اليوم داك صبر
وجرت دموع دار ود قمر
حارات علي الكتب الشكر
نضم الديار أشعار درر
حمل تباريحو القمر
وسلامو للناس والنخل..
شوق للقماري وللشدر
ما شفت بعدك يا الحبيب
الليلة شن سوى البحر
ما عرفت بس كيفن غدر
سود صباح دار ود قمر
اتنين وعشرين يا بحر؟
يا حليلن امات الصغار..
من وين يجيبنو الصبر
وا حرقة الحشا في الجنا ..
الولدنو وادنو البحر
وا حرقة الجوف في البنيات
القميرات ..تاني لا حس خبر
وا نار حشانا على الشقيقات..التميرات..
المشن ..على أمهن وأبوهن القلبو انفطر
الليلة وا عار البلد ..وا هواننا..وا رخسة..
رويحات الصغيرين ..العزاز
الصبحوا في القنوات خبر
قنواتنا شغالات غتا..
حكام يعزو وزولنا يا داب افتكر
باكر حيمشي يذكر الناس بالقدر
كمين وعود ..وكلامو بندق في بحر
وياما في يوم الحساب..
في رقبتو أرواح ضيعا..
تخليهو من سكان سقر
ويا الله يا خالق اليشر
تلهمنا من عندك صبر

معمر حسن محمد نور
[email][email protected][/email] ? الراحل الحبيب بابكر شاعر اغنية طلة طلة على المناصير