اعتذار لامراتين
د الرازي الطيب ابوقنايه
مافي بلد في الدنيا اساء للاسلام زي السودان. انعدام للعدل, انتشار للفساد والقتل علي قفا من يشيل. بس الاساءه دي تمثلت اكتر في تحدينا لي كلام الله واستبدالو بي كلام متناقض معاهو تماما. تعليمات مكتوبه في شكل ايات قرانيه واضحه, شنو البخلي الحاكمين يفهموها غلط او يعملو عكسها. في امراتين ضحيه للفهم الغلط دا وواجب علينا نعتذر ليهم. الاولي الطبيبه الاتحاكمت الايام الفاتت بي تهمه الرده, والتانيه اسماء محمود محمد طه بي عدم تسجيل حزبها بواسطه مسجل الاحزاب ولاسباب واهيه اهمها انو الحزب بدعو للفتنه الدينيه. اتخيلو نحنا تحصل لينا فتنه دينيه. نحنا في السودان اصلا ماتاذينا من ناس ارتدو ولا تابعنا زول قبل كده كلامو بناقض الدين البنعرفو. بس ائمتنا عشان عندهم عداوه مع الجمهورين بالذات بستغلو الشعارات الدينيه دائما كسلاح للقضاء عليهم علي حساب الدين.
في ايات صريحه وكتيره بتتكلم عن حق الانسان في الايمان بالله او الكفر به. وربنا الوحيد العندو الحق في التعامل مع الحاله دي وطلب من البشر عدم التدخل فيها لانها مامن اختصاصاتم. هسع انا اومن ولا اكفر انته دخلك شنو؟ بتستفيد شنو من تدخلك دا؟ لو انته اصلا متدين وبتخاف الله طبق الدين علي نفسك عشان تزيد حسناتك وتقلل سيئاتك والبشريه تستفيد منك. لكن تجي تتدخل في فلان مسلم ولا كافر مرتد ولا يهودي فللاسف حسب فهمنا للدين بتكون الهته نفسك ساي. بعدين حتي لو اديت نفسك الحق في الحكم, كيف حتعاقبو وربنا في القران ماورانا كيفة العقاب دا. ياجماعه سيبو الخلق لي خالقها فيما يخص الدين واتفرغوا لي نفسكم.
عشان كده, الطبيبه الاتحاكمت بي تهمه الرده قطع شك طالبانا اعتذار للمحاكمه الاتعملت ليها. ياخ دي طبيبه يعني بتفهم خبابا ودهاليز الجسم البشري, ماتقدر تعرف انو قناعاتا الدينيه ممكن توصلا لي وين؟ معقول مره زي دي مابتكون عارفه الله في ولا مافي وانو قراراتا الدينيه محسوبه عليها وكونها تختار الاسلام او المسيحيه معناتو شنو؟ انا بفتكر مافي زول عندو الحق يتكلم معاها اطلاقا لانها مسئوله من تصرفاتا بنص القران والايات واضحه كالشمس. عشان كده بنعتذر ليها عن اي مشكله حصلت قبل واثناء وبعد محاكمتا وبنتمني لو كان عندنا القدره ندافع عن حقها في الاختيار وربنا بعد داك كفيل بيها.
المره التانيه الاستاذه الجليله ابنه الشيخ الجليل المسلم محمود محمد طه. من حقها تعمل حزب زيها وزي اي زول تاني لانو من حقها تتكلم وتورينا راسا دا فيو شنو. اذا هيئه علماء المسلمين بتفتكر انها ممكن تسمم افكارنا فهي غلطانه. نحن بنعرف نفرق كويس جدا بين الحق والباطل بس ادونا فرصه نسمعا عشان لو اصلا بقت علي باطل حاتتلاشي فكرتا وتموت دون الحجر عليها. اما اذا كانت علي حق ودي طبعا نحنا بنقررا بعد دراسه مرجعياتنا, فالحق احق بان يتبع بالحسني. ولذلك نحن نري ان مسجل الاحزاب اخطا خطا جسيم في عدم تسجيل حزبها وبالتالي السيده اسماء طالبانا اعتذار علي كده. متين ياجماعه الحاكمين علي امرنا يحكمو بالعدل ويتجردو من القناع السياسي اللابسنو دا ويبطلو حسم معاركهم مع خصومهم بسلاح الدين. لو ماعارفين دا فيو اساءه للدين.
حكايه دا مرتد ودا كافر ودا مخالف راي المجموعه انسوها لينا. لو اصلا في حاجات ربنا ذكرها في القران بطريقه واضحهورونا ليها عشان نتنور. ولو في زول عندو شرح لدين غير العارفنو يقولو لينا عشان نفهم. والكلام لازم في الهواء الطلق حتي لو كان من كوز ولا انصار سنه ولا سلفي او جمهوري اوغيرم وخلونا نحكم ونتابع لانو اصلا في النهايه يوم القيامه ربنا بحاكمنا علي قناعاتنا الاتبعناها ومهما كان تسلط الناس علينا في اجبارنا بالقوه برضو القناعه النهائيه لينا نحنا.
ادونا حريتنا نختار (وقل الحق من ربكم فمن شاء فليؤمن ومن شاء فليكفر)1. وبعد داك (انا اعتدنا للظالمين نار احاط بهم سراديقها وان يستغيثو يغاثو بماء كالمهل يشوي الوجوه)2 ودا عقاب الزول البكفر للتذكير يعني.
كنت بتمني في النهايه اجيب زياده ايات قرانيه ادعم بيها كلامي, بس زي ماقلته في الاول انو نحنا في السودان اكتر ناس اساءو للاسلام ونسو كلام الله, ولو جبنا القران كلو برضو في ناس ماحاتقتنع لانه سبحانه وتعالي جعل علي (قلوبهم اكنه ان يفقهوه)3 كما (ختم الله علي قلوبهم وعلي سمعهم وعلي ابصارهم غشاوه)4 وبقو مابفرقو بين الحق والباطل. يارب نجنا من القوم الظالمين.
You can follow me in twitter@elrazi_elrazi
1 الكهف الايه 29,
2 الكهف الايه 29
3 الاسراء الايه 46
4 البقره الايه 7
ما فاضين بعد تنتهي مسالة التحلل
هنالك مقولتان للاستاذ محمود هما السبب فى رفض الاخوان المسلمين تسجيل الحزب الجمهورى الاولى قيلت عام 77 وهى :-
لاشك أنه من المفيد جدا للشعب السودانى أن يمر بتجربة حكم جماعة الهوس الدينى لانها ستكشف له زيف شعارات هذه الجماعة وهذه الجماعة سوف تسيطر على السودان سياسيا وأقتصاديا ولو بالوسائل العسكرية وسوف يزيغون الشعب الامرين وسوف يحيلون نهار هذه البلاد الى ليل – وهنا شعر الاخوان المسلمين أن هذا الرجل هو الذى كشف للشعب السودانى فى وقت مبكرااستغلالهم للدين والمتاجرة به وأن فكرهم المنحرف سيكون وبالا على الاسلام والمسلمين وصدقت نبوءته عندما استدرجوا أبو جهل النميرى لتطبيق ما اسموه بالشريعة الاسلامية وأخرجوا له المسيرات المليونية لتأييده ووصف كبيرهم الترابى نميرى بأنه مجدد القرن وبايعوه على السمع والطاعة وعدلوا له الدستور ليصبح خليفة المسلمين ويختار خليفته من بعده وتولوا محاكم الطوارى والعدالة الناجزة ولم يجد منهم الشعب السودانى المسلم سوى السيف والسوط والمقولة الثانية التى أقضت مضجعهم ورلزلت دولة الشريعة المزيفة هى مقولنه فى المحكمة التى عقدوها له عقابا على قولته لكلمة الحق التىقال فيها:-
أنا اعلنت رأى مرارا فى قوانين سبتمبر 83 من انها شوهت الشريعة وشوهت الاسلام ونفرت عنه يضاف الى ذلك أنها وضعت وأستغلت لارهاب الشعب وسوقه الى الاستكانة عن طريق اذلاله كما انها هددت وحدة البلاد هذا من ناحية التنظير واما من حيث التطبيق فأن القضاة الذين يتولون المحاكمة تحتها غير مؤهلين فنيا وضعفوا اخلاقيا عن أن يمتنعوا من أن يضعوا انفسهم تحت سيطرة السلطة التنفيذية تستعملهم لاضاعة الحقوق والتنكيل بالمعارضين السيايين ومن أجل ذلك فأننى غير مستعد للتعاون مع أى محكمة تنكرت لحرمة القضاء المستغل ورضيت أن تكون أداة من أدوات اذلال الشعب
الله ينور عليك- قمة الفهم- ايضاح جميل ومبسط ومقنع- حفظك الله
ضحل
تصحيح سورة الكهف
(( وَقُلِ الْحَقُّ مِنْ رَبِّكُمْ ۖ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ ۚ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِنْ يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا)) ﴿29﴾
تصحيح سورة الاسراء
((وَجَعَلْنَا عَلَىٰ قُلُوبِهِمْ أَكِنَّةً أَن يَفْقَهُوهُ وَفِي آذَانِهِمْ وَقْرًا ۚ وَإِذَا ذَكَرْتَ رَبَّكَ فِي الْقُرْآنِ وَحْدَهُ وَلَّوْا عَلَىٰ أَدْبَارِهِمْ نُفُورًا)) (46)
يا (دكتور) ابو قناية (الواحد بقى يشكك فى الألقاب العلمية فى زمن الانقاذ)
راجع المصحف رجاءا وتحرى الدقة قبل الكتابة (أنسخ+أطبع) تفاديا للغلطات خاااااصة فى القرآن الكريم
جزاك الله خير ، لكن من الاولي مراجعة الايات قبل النشر ، ثانياً قرأت كثيرا من مقالاتك وبالذات التي تتحدث عن الفساد في شركة سودانير ولكني لم اقرأ او ربما لم يصادفني اي مقال عن فساد د. مصطفي الطيب ابوقنايه الوكيل الاسبق لوزارة الماليه ومدير الشئون الماليه بالقصر الجمهوري ومدير مطابع السودان للعمله . او لم تعرف عن فساده اسال عنه الذين عملوا معه كيف انه كان يخم خم خم عديل ، هذا غير تعاطفه مع اولي نعمته في كثير من العطاءات والاستثناءات.
د. الرازي تحية واحتراماً وبعد
لا أعتقد أن فرداً من الشعب السوداني تعلّم كيف يكتب ويقرأ تصعب عليه القراءة والفهم لأي خبر أو مقال مكتوب باللغةالعربية الفصحى ببساطة المعنى المفهوم للعامة. إن ماتكتبه بصيغة الونسة الدارجية يُفقد ماتكتبه المعنى الذي يرتجيه القارئ لسبب بسيط هو أن القارئ تعود أن يقرأ بالطريقة التي تعلم بها. إن الطريقة التي تكتب بها (بالونسة الدارجية كما ذكرت) تسبب للقارئ الإرباك بل في بعض الأحيان يقرأ القارئ الكلمات وربما تتشابه مع كلمات أخرى لها معنى مختلف علماً بأن ماتكتبه ثر للغاية للشخص الذي يفك طلاسمه فيادكتور لا تسلب جمال مقالاتك بهذه الطريقة في الكتابة وهذه وجهة نظر فقط من شخص يريد أن يقرأ مقالاتك ولكنه يصطدم في كل مرة بهذه المعضلة.
اولا كما ذكر الاخ ابو الكجص أسلوب الكتابة صعّب من قراءته ولكن الاهم هو المحتوى وما أراد الكاتب قوله هو الأهم وهو موضوع يفتقد للتركيز تماما حتى عندما أشار له بعض الأخوة لبعض أخطائة في الآيات القرانية علّق بأنه لايستطيع أن يرى تلك الأخطاء, عجبي! ذكر الكاتب أنه لايجوز أن تحاكم الطبيبة المرتدة بدليل عدم وجود نص قرآني! تُرى هل يُصلي كاتب المقال واذا كان يفعل فأي آية قرآنية فصّلت عدد ركعات كل صلاة. وهذا ينطبق على عبادات وأحكام أخرى فصّلها وفسرها من لاينطق عن الهوى رسول الله محمد بن عبدالله عليه أفضل الصلاة والسلام وهو نفسه القائل صلوات الله وسلامه عليه : (من بدل دينه فاقتلوه) [رواه الإمام البخاري في ”صحيحه” من حديث ابن عباس رضي الله عنهما].
أبو قناية شيل قنايتك دى وأمشى أنصح أخوك الطيب أبقناية الحرامى بتاع وزارة المالية ماعليك مننا نحنا
أبو قناية شيل قنايتك دى وأمشى أنصح أخوك الطيب أبقناية الحرامى بتاع وزارة المالية ماعليك مننا نحنا