بشارة شيخ علي للسودانيين

وصف النائب الأول للرئيس السوداني علي عثمان طه، الاحتجاجات التي شهدتها بعض المدن، بأنها محاولة للرجوع بالسودان للخلف عبر التخريب والنهب
ياشيخ على كلامك دا صحيح معقول لو تواصلت الإحتجاجات السودان حيرجع للخلف ونعود للزمن الجميل
على الطلاق تضمن لى الرجوع للخلف أنا زاتى فى العمر المتأخر دا أجى وأظاهر معاهم
ياشيخ على عليكم الله بس ختو الخلف reward ورجعونا للخلف رجعونا لزمان
ياشيخ على
أنت بتاع قانون ما بتفهم فى أى شىء غير القانون ودا واضح من قيادتك لوطن كامل وطن كان عزيز وكريم ولم يبق منه أى شىء
عندنا فى علم المساحة حاجة إسمها PROPAGATION OF ERRORS حتسألنى يعنى شنو ؟ لأنك لا تعرفها – لو كان من المفترض أن أنفذ خط مستقيم يصل مابين قبة المسجد الكبير فى الخرطوم وقبة المسجد الكبير فى بورتسودان ومن نقطة البداية حدث عندى خطأ فى التوجيه الصحيح ORIENTATION لجزء عشرى من الثانية مش من الدرجة ولا الدقيقة – من الثانية – فواصلت المسح – لمان أصل نقطة النهاية سأجد نفسى لم امر بمدينة بورتسودان لأن هذا الخطأ فى نقطة البداية والبالغ جزء عشرى من الثانية بتحدث ليها زيادة تراكمية تسمى الأخطاء التراكمية ACCUMULATION OF ERRORS
ياشيخ على فى منتصف التسعينيات رئيس بلدية الخرطوم وعلى ما أذكر اسمه البرير عمل لك دعوة فطور أنا كان مكتبى فى برج البركة وبينى وبين المحلية 12 متر ، فى ذلك اليوم حكمت عليكم وقلت الناس دى تسير فى طريق خاطىء ولن تصل – أظنك تذكر تلك الدعوة والأكل الفاخر من المال العام وأنت كمسئول مسلم لم تسأل من أين أتيتم بالمال الذى أنفق على الدعوة
بدأتم حكمكم بأكل وجبة الإفطار الفاخرة
ثم تحولتم للعشاء الفاخر
ثم لهفت المليارات التى جاءت من عائدات البترول والمليارات المجنبة
فى واحد قال لى الحكام ديل أولاد فقراء حيحسوا بوجعنا وألمنا ويرأفوا بينا اللى أبوهو خفير واللى ابوهو عامل بسيط واللى أبو راعى بقر وحلاب واللى أبوه طباخ – يادوب لقينا الحكام المننا وفينا
قلت له ود الجعان أكان ملك فجر – قال لى لا
مرت السنوات ولهطوا كل شىء
تقول ليهم قروش البترول والمنتجات الزراعية والحيوانية والمعادن وين ؟
يقولوا لك مشت فى مشاريع التنمية
إنتو أستدنتم دين خارجى بـ 60 مليار
ومشاريعكم لا تتجاوز العشرين مليار بما فيها سد مروى وتعلية سد الروصيرص
شارعين و3 كبارى وسد قديتونا بيهم قد
والبشير ينفى وجود فساد
يا شيخ على أنتم ماشين غلط لأن ACCUMULATION OF ERRORS كبير وفارقتم الجادة وطشيتوا ولو خليناكم تجلسوا فى الحكم الفجوة حتزداد
بقاؤكم دون شك سيكون سبب مقنع لتنفيذ مخطط برنارد لويس
ياجماعة لو الإخوان قعدوا ستفصل دولة دارفور
وستفصل دولة النوبة ومقرها حيكون دنقلا فى إنتظار فصل نوبة جنوب مصر وضمهما معا كدولة النوبة الكبرى وعاصمتها أسوان
لو شيخ على وجماعته بمافيهم الرئيس البشير خرجوا من حياتنا نهائيا سيأتى مهندس سياسى شاطر يصحح الوضع وتصحيح الوضع الحالى صعب يحتاج لخبير لتطبيق مايعرف بالـ DISTRIBUTION OF ERRORS إنتو عملتم أخطاء ومصائب كبيرة تحتاج لفريق من الخبراء بس مش من شاكلة طبيب الأسنان مصطفى عثمان
أمرقوا إتخارجوا سعيكم مشكور والله وديتونا فى ستين داهية

[email][email protected][/email]