اعتقالات أعضاء من حزب البشير بشمال كردفان… والمعتمد التوم الفاضل
بسم الله الرحمن الرحيم
اعتقالات أعضاء من حزب البشير بشمال كردفان والمعتمد التوم الفاضل
صديق ابوعمار
[email protected]
إعتقلت السلطات الأمنية بولاية شمال كردفان الأستاذ نصرالدين الوسيله رئيس المؤتمر الوطنى بالمحلية ومعه بعض الشخصيات المعروفة بالمحلية بدعوى أنهم قاموا بتوزيع رسائل نصية على الهاتف المحمول تناولت النشاط التجارى للمعتمد التوم الفاضل معتمد الرهد ( اللهو مؤتمر وطنى ) وكمان أضافوا ( الجديد ) مناداتهم ومطالبتهم بإنشاء ولاية شرق كردفان ، شغلة عجيبة والله ، قوانين الدولة ( كان باقى منها شئ ) بتحرم على شاغلى المناصب الفيها القرار من دخول سوق الله أكبر مع الغلابة خوفا من الشغل بأمور التلات ورقات والتى يجيدها حرامية المؤتمر الوطنى بإتقان ، أخونا المعتمد التوم الفاضل ونستو ومساسكتو للبزنس أهم لدية من رعاية حوائج خلق الله فلا غرابة فى أن تحوم حوله الشبهات بعد أن تم ضبط شريكه فى ( شوية ) حاجات تجارية متمثلة فى شحنه ( ليها ضل ) من المخدرات داخل الولاية ، فى الدول المحترمة لما الشبهات تدور وتحوم حول مسؤول أهم حاجه عندو تقديم الإستقالة عشان يقول أنا أهو (مش ) الراجل فيكم يفتح خشمو ، شغلة الجماعة ديل خربانة من فوق ، شوف المتعافى وضعو زى جماعة حسنى مبارك (غسيل ومكوة وتقاوى وشوارع وكبارى ونفايات وقروش بن لادن وجمعة الجمع وبتاع قطر وفسيخ الدويم ) وبرضو ماقدم إستقالتو رغم نبيح المجلس الوطنى المامنو فايدة ، شوف على كرتى دفع شوية وشويات من ملايين الدولارات لشراء فندق قصر الصداقة وحايم بلقط فى بقية الاقساط وبالرغم من الفضيحه برضو سادى دى بطينة والتانية بعجينة ، والمعروف إنوالجماعة ديل فى جمع المال ماعندهم قشة مره ومستعدين للتجارة فى كل شئ والدليل بيع جنوب البلد ، والغريبة وزير العدل قال إقرارات ذمه والمعروف دوليا أن لعيبة المؤتمر الوطنى كرهتهم فى الدنيا دى للزول العندو ذمه ، والشئ العجيب كمان ولايات دارفور أهلها عاوزين يكونوا إقليم واحد والحكومة مصرة ( بكفكيف عضل ) على زيادة ولايات الاقليم من ثلاثة الى خمسة ، وولاية شمال كردفان لديها الرغبة فى أن تكون ولايتين والحكومة مصرة (بنطيط عيون )على أن تظل ولاية واحد ، يعنى فى كردفان زيادة الولايات خط أحمر وفى دارفور الإقليم برضو خط أحمر، دى معادلة عاوزة شرح شوية وفتوى من صالون الحكم الإتحادى ..
ياناس الحكومة كردفان تحتاج لبناء ورعاية فى مجمل شأنها ، لأنها تعانى العطش والتدنى فى الخدمات الصحية والإنهيار فى التعليم والبطاله بل إنهيار بنيتها التحتية بالكامل فهى الأشد بؤسا من بين ولايات السودان والأقل حظا فى المشاريع الكثيرة التى حظيت بها ولايات عديدة ، وعلى سلطة المركز ان تعلم بأن طريق بارا الأبيض أمدرمان خط أحمر ، ومشروع خور أبوحبل خط أحمر ، والقضاء على العطش بتوفير المياه من النيل الأبيض خط أحمر ، وقيام صندوق إعمار كردفان لنهضة الولاية خط أحمر.
صديق ابوعمار
[email protected]
يا أبو عمار يا أخي، هوى! البجم ديل، كلام أخوى و أخوك ماااا بيسمعوا!! لو قلتا كلام دواس، و آلله يجوك جارين كايسين للجودية، و بى كدا حقك تلقا
كردفان تعاني وانسانها يئن وحيواناتها تئن وابناها البلطجيه في المؤتمر البطني خانوها مع اسيادهم استغرب جدا مثلا شخص زي احمد ابراهيم الطاهر من منطقه يموت اهله بسبب سخيل اوجمل حوالي مائه قتيل ولايرمش له جفن ولم يقرا هذه الجريمه عقلانيا بينما يعيش هو مع اسياده يعاني اهله في المزروب وام كريدم فقر وجهل ومرض وعندما يمن احد اسياده بمركز تأمين صحي ياتي اليهم فرحا اتحداهو يكون عارف عدد الطلاب الجالسين للمساق العلمي انتا طالع من بارا الي حمره الوز الاجابه ستكون مخزيه
والله اخوى وأخوك مابتنفع مع الناس ديل ياناس كردفان داير ين حقكم بالطيبه بتاعتكم دى لى يوم الدين ماحتلقوهو مافيش طريقه غير أستعمال القوه مع الناس الوهم ديل وأنا قلت ليكم نظام الإنقاذ ده جهوى وعنصرى عديل كده يلا إتحركو اوروهم العين الحمراء .