أربعاء وعقاب شهر
أربعاء وعقاب شهر
أسماء الجنيد
[email protected]
سلام يا اهلنا المنكم طولنا اريتكم طيبين جميعا ,في البداية ارجو أن تسمحوا لي وعذرا علي الإنقطاع ,
إن شاء الله عام خير عليكم جميعا وسنة جديدة سعيدة نسأل الله ان يفرجها ويخلصنا من الخازوق الخرب البلد وشتت اهله .
يعلم الله فترنا من تعدد مساويء الوضع الميل حال البلد
الكلام زاتو كمل والريق نشف وجف وسط الحلق , والواحد ما داير يقول إنه فقد الأمل , فرحمة ربنا تسع كل شيء الحمد لله ،، والفرج قد يأتي في لحظات بإذن الواحد الأحد
لكن الشيء الممل ومحبط ما يحدث من صمت اهل الوجعة في بلد المليون وجع مدفون في كل شبر من تراب بلدنا
الحكاية كل يوم تتوسع في همها وتضيق في افق من الحكام
حتى وصلت لان يستعينوا بي اعجاز الأحزاب الأكل عليها الدهر وشرب , وزادوا الطين طملة بضحكهم على دقون الشعب بترضية تلك الأعجاز بتوظيف احفادهم الما بلغوا سن النضج الفكرى ولا يفقهون شيئا عن إدارة دكان في الحلة ، ناهيكم عن السياسية !!!
ناس عايشة في عالم تاني خالص , وسط خدمهم وحشمهم ووسط الناس التي تقدس التراب الذي يمشون عليه هؤلاء الأباطرة .
الما عندهم أي فكرة عن الوضع الحاصل فى السودان ولا حتي عن جغرافيتة !!
وطبعا جماعتنا في الأحزاب المعنية ما فارقة معاهم مدام الخير واصلهم لي حلقومهم وده المطلوب !
ما مهمة سمعة البلد ولا مشاعر المنتمين لتلك الأحزاب المنتظرين نفحة خبر يبقى بشارة تهز ارض الوطن وترفع علم الحرية والانعتاق عاليا خفاقا ، والمصيبة ان دا ماممكن يحصل طالما عشعشت فى دواخلهم الانانية وحب الجاه والسلطة ، وما زالوا يفكرون بعقليتهم العقائدية البالية معتقدين ان كل شىء يمكن ان يورث ،
كأنوا السودان ده ملك حر ليهم وحدهم ومن يعيش فيه هم ضيوف في حيشان سادتهم الأكارم
وبرضو ما فارقة مع الحكام , بل كسبانين مدام سكتوا الكانوا عاملين ليهم حساب بي باقي فضلتهم النهبوها من حق الغلابة والمضيومين!
حقيقى بدينا نتساءل فى ياتو عصر نحن عايشين الآن؟ هل هو عصر الجاهلية ام عصر القرون الوسطى ام العصر الحجرى أم ان هؤلاء القوم يستخفون بعقولنا ويضحكون على شوارب الشعب لحدى ما بدينا نشك فى نفسنا زاتها ياربى هل نحن شعب ساذج ومتخلف للدرجة الممكن تخلى الناس ديل يبرطعوا وسطنا بافكارهم وتصرفاتهم الاستخفافية وكأنهم واثقين من اننا سوف ندين بالولاء والطاعة وتقبيل الايادى .
وجعى عليك ياسودان ووجعى على الرفعوا راية استقلالك وكتبوا اسمك فى يوم من الايام بماء الذهب فى صحائف التاريخ .
لكن نرجع ونقول الوضع اصبح اربعاء وعقاب شهر
يعني الكيكة كملت زمااااااان واصبحت فتات خبز بايت ومصوفن
مابيلم حولينها إلآ الذباب
……………
متاوقة
يا الجريتوا على اللآوطني وأنتميتوا ليه بلا خجلة من اجل المال والسلطة, كان فاكرين روحكهم كسبانين الترابة التكيل خشومكم لامن تفضل
سكتوكم زي جرقاس بي باقي عضمة من الكرتة , وبي عمليتكم دي سقطتوا شر سقطة وبقت ليكم وصمة عار معلقة في عبايتكم إلا ما شاء الله
وتأكدوا إنها بقت اربعاءوعقاب شهر وقريب بتفرج بإذنه تعالي
يمهل ولا يهمل
ليتك استمرتي في انقطاعك عن الكتابة…. حزب الامة هذا الذي تتهمي زعاماته انهم عايشين في واد اخر … هو من جاء باستقلال السودان الذي تتباكبن عليه… اقرئ التاريخ و افهمي اولا ايتها الصحفية حتى يكون قلمك موضوعي ….
و بالمناسبة اول صحيفة سودانية .. ايتها الصحفية… هي صحيفة الحضارة… و لمعلوماتك فان السيد عبد الرحمن المهدي كان من مؤسسيها… اذا هؤلاء لم يكرسوا للجهل كما تدعي..!!
فلنفرض بت الجيند ماعارفة التاريخ انت العارف التاريخ يا نحو صحافة واعية وموضوعية عليك الله وبذمتك البعمل فيه الصادق عندو علاقة بالمهدى او عبدالرحمن رحمة الله عليهما شتان بين هذا وهؤلائك مافى اى وجه مقارنة نعم هو حفيدهم ولكنه لا يشبههم فى الفكر اللهم الافى الشكل فلا تهاجم بت الجنيد ما قالته رائها فانت تعارضها الراى فليس معنى ذلك انها لاتعرف التاريخ فهناك من يؤيدها وهم كثرة هسى الكوجانة البسوى فيها الصادق اشطر عواسة بتعملها الليلة اجتماع مع البشير وبعد ساعا ت مع المعارضة والصباح هجوم على نسيبو والمساء ضحكات معاه دا غير الرحلات المكوكية فى الدول الغريبة بقول شنو وباى صفة موفود انقاذى امامعارضة ذاتو غلبنا البنسوى مع حفيد المهدى والله لو اعتزل السياسة يكون افضل له ولنا وللسودان خاصة وانه ورث ابنه بالقصر وبناتو بالحزب ويجزيه الله خيرا فيما فعله ان كان خير ويغفر له ان كان سئ
الى wahied الكلمة الصحيحة هي استقلال بالقاف و ليس استغلال بالغين.. شكلك كده ساقط عربي و معاه تاريخ كمان لانك ما عارف منو الجابو استقلال السودان
من قال ان حزب الامة هو من قام باستغلال السودان ؟؟؟؟؟ هل هذه حقائق تاريخية ( نحو صحافة واعية وموضوعية ! ؟ ) لنترك الحقائق التاريخية والتى يشهد على احداثها رجال لازالوا احياء يرزقون ولنفرض فرضا ان حزب الامة هو من قام باستغلال السودان من الاستعمار حسب راى هذا الهاوى فهل هذه شهادة وتبرير لابن السيد كى يكون مستشارا او مساعد رئيس ؟؟؟ الكل يا عزيزى يستغرب من تعيين ابناء هذين السيدين فى هذين المنصبين وفى هذه الظروف بالذات رغم علمنا بحداثة سنهما وعدم حملهما لشهادات علمية نادرة تؤهلهما لهذه المناصب والتى تحتاج لخبرة كبيرة وتجارب ثرة فى الحياة وللعلم ان احهما حتى الان لم يكمل نصف دينه . سودان العجائب والغرائب والنار فعلا تخره الرمــــاد .
اولا الحمد لله علي عودتك ثانيا البلد المصانع بتقيف قبل تبدأ فيها ومزارع بتيبس ونيلها ممدد جنازه ومقايص في بطون البسفو التراب ضاع البلد وضاعة خيراته بسبب الاحزاب التقليديه ووهم الصادق المهدي والميرغني والترابي خمسين سنه من العبس السياسي والكلام الخمج وفاضي حان للشعب السوداني ان يتجاوز هذه الشرزمه الخبيثه انتهي زمن الوصايه والتجريب
حمدا على السلامه بت الجنيد شفقتينا و قلنا يمكن الجماعة ديل دسوك ليك فى جحر من جحورهم او يكون لقوا ليك منصب كده مستشاره و فكيتينا عكس الهواء
شايف الجماعة المعليقن كتروا الكلام فى موضوع تاريخ السودان و منو الرفع راية الاستقلال للسودان . انا بقول ياريت لو ما اترفعت هذه الراية التى سلمناها للجنوب بعد 54 سنه حتى لو كان الصادق او المرغنى هذه الاحزاب التى عجزت عن مواكبة التطور حتى فى نهجها الداخلى ناسيك عن قضية السودان نحن لا ننتظر منهم جديد او تجديد هم السبب فى هذا الخازوق الذى نعانى من المه 23 سنه هم السبب فى تاخر السودان 54 سنه بعد الاستقلال و هم السبب فى كل كوارث السودان بما فيها انفصال الجنوب اتمنى فقط ان يفهموا الشعب السوانى ما سر حشر الاميرين اليافعين فى حكومة طحنت عظام البلد
انا اري ان خزب الامة ورئيسه الصادق المهدي سبب رئيسي في كل هذه الهرجله كذلك فان الاحزاب التقليدية بما فيها اليسار شاركت بشكل او باخر عليه فن الدعوه لفسح المجال امام اوعية جديده بعيدة عن كل خزعبلات المهدي والمهدية مع احترامي فقط لشخصية الامام المهدي وكارزميته كقائد وموحد للامة السودانية في فترة من الفترات اما ابناؤه واخفاده فهم سبب رئيسي لادخال السودان في ازماته وفشله .
… يمهل ..ويمهل …ويمهل ..اخر العلاج ..الكى ..و..التنقية البدنية .
الله يخليك بت الجنيد على الكلام الحلو وجميل ويرد الروح التعبانة من شوكة الحوت التي أبت تنبلع ولا تفوت لكن للصبر حدود. بإذن الله تفرج ولا بد لليل أن ينجلي والقيد أن ينكسر. وظهر الضوء في آخر النفق.
حقيقة نورت الراكوبة بعودتك وآمل أن تتواصل وتتدفق وتنساب كلماتك على نهر الحماس الجماهيري السوداني وكل كلمة هي مدفع في صدر الخوازيق وتسقط ركن من أركان الخداع الدماري الجاري في الوطن. وكل مقال يحس الجماهير على عدم الخنوع والانبطاح لهؤلاء القوم هو صاروخ يضرب قاعدة من قواعد الحرامية الذين تحكموا في أرواح الشعب.
ولك منى تحية على تواصلك .