عمرنا راح في الغربة تَبْ

اغتربنا واتنشلنا
عمرنا راح في الغربة تَبْ
ما فضَّل لينا شئ
الاغتراب أخد عمرنا وشبابنا
بينا وبين القبر…فَدْ شبر
كنا بنفتكر نزرع ورود
ونسقيها بالشوق والأمل
وبعد سنين طويله
عرفنا الحقيقة… كنا بنزرع الشوك
ونسقيه بموية سراب
تاني ما تقول لي اغتراب
قالوا الجدّاوي في الخرطوم وصل
حيجينا بالاثنين أو يوم الخميس
يجي بزفَّتو وكمان شُنط جلد
لابس ليهو تترون ولافي شال
وكمان شبط والساعة (سيكو فايف)
وقبل ما تسلِّم عليهو
تحس ريحتو ريحة مغترب جدِّ
يا حليل أيام زمان
أيام اللواري
والقبولاب وام الحسن
وتقسيمات السفنجه
في الباجه والصاجات كَرِبْ
ده حاج سابل وداك ابراهيم سعيد
وعثمان صالح قالو فَرْتك بالقُرير
تقول لي مغترب
الاغتراب ما كان زمان
أيام أخويِ وأخوك
وأبوي وأبوك
أيام أنْ كان القرش
يجيب فول وعيش
والخروف ستين قرش
تقول لي ده ما مغترب
وين الاغتراب…
عشانا فول وطعمية
وإنتو بتتعشو (بوش)
وإيه الفرق… بس في التسمية؟
فول وبوش ما هيه هِيَّهَ
نفس الملامح والشبه
وكمان إنتو موية فول زياده
ونحن فولنا معفّص ذي عجين
بزبالتو ووساختو
بفسادو… ولصوصو
أنا شايف.. سودانا أحسن
أصلو الغربة
ضياع زمن وخراب بيوت
[email][email protected][/email]